«№ 137 негізгі орта
мектебі»
КММ-нің 9 «А» сынып
оқушысы
Еренсизова Ақбота
Бериковна
Латын әліпбиіне көшу –
қазақ тілінің болашағы
Қазақ тілі -мемлекеттік
тіліміз болып табылады. Осы тұрғыда қарағанда, жазуымызды латын
әріптеріне көшірудің мемлекеттік тілдің дамуы мен қолданыс аясын
кеңейтуге де қосар үлесі зор деп білеміз. Қазіргі таңда мемлекеттік
тіліміз керегесін кеңге жайып, егеменді елімізбен бірге дамып,
мемлекеттік тілге деген сұраныс та артып келеді. Сондықтан
Қазақстан сияқты бүкіл әлемге танылған елдің мемлекеттік тілінің
жазуы да заман талабына сай келуін күнделікті өмірдің өзі де талап
етіп отыр. Қазақстанға әлемнің назары ауып отырған тұста еліміздегі
өзге ұлттармен қатар, шетел азаматтарының да мемлекеттік тілді
үйренуге деген ынтасы артып отыр.
Еліміздің латын әліпбиіне көшу
ұлтымыз үшін жасалған маңызды қадамдардың бірі. Қазақ әліпбиі мен
жазуын латын графикасына көшіру мәселесі туралы еліміз егемендік
алған алғашқы жылдардан бастап ғылыми ортада сөз қозғала бастаған
еді. Ғылыми қауыммен кездесулерде, басқа жағдайларда да тіл
мәселесіне ерекше назар аударып жүретін Тұңғыш Елбасымыз Қазақстан
халықтары Ассамблеясының 2006 жылы 24 қазанында өткен XII
сессиясындағы сөзінде «Қазақ әліпбиін латынға көшіру жөніндегі
мәселеге қайта оралу керек. Бір кездері біз оны кейінге қалдырған
едік», - дей келіп, «біз бұл жерде асығыстыққа бой алдырмай, оның
артықшылықтары мен кемшіліктерін зерделеп алуымыз керек», - деген
болатын. Латын әліпбиі туралы алғаш сөз қозғалғаннан бері ғылыми
ортада латын әліпбиінің мүмкіндіктері мен оны қазақ әліпбиіне
көшіру мәселесі жөнінде түрлі дәрежедегі талқылаулар болып,
көптеген ғылыми зерттеу мақалалар да, түрлі авторлардың құрастырған
әліпбилері де жарияланды.
Сонымен бірге қазақ жазуының
латын әріптеріне көшірілуі ел болашағы - жас ұрпақтың оқу – білім
және ғылым жолындағы ізденістеріне де жол ашады. Қазіргі заман -
жазу заманы, ғылым мен техника, оқу – білім, ақпарат, жаңа
техналогиялар заманы. Адам жазу арқылы білім алады, жазу арқылы
бір-бірімен байланыс жасап, жүрген – тұрғаның, жасаған жұмыстарын
да жазып отырады, яғни хаттама, түрлі қатынас іс қағаздары,
компьютер, интернет т.б. арқылы хабарласулар – бәрі де жазу арқылы
жүзеге асады. Жер бетінде латын әліпбиі барлық салада қолданылатыны
байқалады. Осы заманда өмір сүріп, білім алу, еңбек ету, белгілі
бір мамандықты игеру, т.б. адамның белсенді іс-әрекеттері
мемлекеттік тіл мен ағылшын тілінен, оның жазуынан айналып өте
алмайды. Сондықтан латын әріптері өркениеттің жазуы ретінде өмірдің
өзі талап етіп отырған басты қажеттіліктердің бірі деп білеміз.
Латын әріптермен жазу арқылы басқа тілді де меңгеру, оны жазу да
бір-біріне жақындап, бір әріптен екінші әріпке ауысып отыру
қиындығын жеңілдетіп, тілдің қолданысына да оң әсер етеді. Осындай
жағдайда білім алып, мамандығын шыңдап жатқан жастарға әлемнің қай
жерінде жүрсе де кедергі келтірмей, жұмысын жеңілдетуге ықпал
етеді. Ендеше латын әліпбиінің болашағы да
зор.
Қорыта келгенде, латын
әліпбиіне көшу – ұлтымыздың санасын бұғаудан босатады, түркі және
жаһандық әлемімен ықпалдасуға, қазақ халқы ертеден қолданған
әліпбиімізге қайта оралып, ұлттық санамыздың қайта жаңғыруына жол
ашады демекпін. Латын графикасы арқылы таңбаланған қазақ әліпбиі
мен жазуы қазақ елін осы биіктерге бастайтынына кәміл
сенеміз.