Ұлы ерлік ұрпаққа үлгі

Ұлы ерлік ұрпаққа үлгі

Биыл 2020 жыл, бірер күннен кейін, адамзат өзінің тарихында жазылған қаһарлы соғыстағы Ұлы Жеңістің 75 жылдық мерекесін тойлағалы отыр. Қанша уақыт өтсе де, түрлі өзгерістер болып жатса да, ұрпаққа ең ыстық мейрам болып қала береді. Бұл Жеңіс күні - соғыстан оралмай қалған жауынгерлердің рухына бас иіп, ал арамызда азайып бара жатқан соғыс ардагерлеріне бұрынғыдан да құрметпен қарап, олардың ерліктеріне тағзым ететін күн болып мәңгілікке қалмақ. «Ер бақыты ел қолында, ел бақыты ерлер қолында» - деп батыр Бауыржан Момышұлы атамыз айтып кеткендей, ер жүрек жауынгерлеріміз - Қазақстан халқына бейбіт өмір мен тыныштық, береке мен бақыт орнатып кетті. Сұм соғысты басынан өткеріп, бізді жеңіске жеткізген, сол жылдарда қиындыққа төзіп, Отан үшін от кешкен аталарымыз бен апаларымыз ел есінде. Соғыс майдангерлері Отанға деген сүйіспеншілігімен, қайсарлығымен елін, жерін қорғауды ұрпағына үлгі етіп, тарихта өшпес ерліктерімен мәңгілікке жазылып қалды. Майданда қан кешкен жауынгерлер ерлігі, ерен еңбегі ешқашан ұмытылмайды!

Бүгінде біздің азаматтық міндетіміз – болашақ ұрпақты Отанын сүюге, елінің, жерінің адал патриоттары болуына және достық пен бірлік туралы түсінік беру арқылы отан сүйгіштікке тәрбиелеу.

Қазір қашықтықтан оқып жатқан кезде де менің оқушыларым сыныптан тыс іс- шараларға қатысуды тоқтатқан емес. Оқушылары қазіргі жағдайда қашықтықтан оқыту технологиясы арқылы Ұлы Жеңістің 75 жылдығына орай «Отан үшін от кешкендер» тақырыбында өлеңдер оқып, эссе жазып, суреттер салу арқылы өздерінің Отанға және соғыс ардагерлеріне деген құрметтерін білдіруде. Сөз соңында айтарым, әр жеке тұлға Отан соғысы батырларының ерліктерін ұмытпаса деймін. Сол ата - бабаларымыздың ерліктерін жадында сақтай отырып, келешекте елін сүйер, жерін қорғар жас өрендер өсіп келері анық.

Еліміздің көк аспанында бейбітшіліктің, тәуелсіздіктің, азаттықтың туы әрқашан желбірей берсін! Тарихымызда қалған бұл сұрапыл соғыстың кеселінен өткен ата- апаларымызға тағзым етіп бас иеміз. Ұлы жеңіс күні құтты болсын!

Алматы қаласы

Алатау ауданы

№ 201 мектеп-гимназия мұғалімі

Райымкулова Мархабат Кыргызбаевна