Ұстаз мәртебесі - Елбасы назарында

Ұстаз мәртебесі – Елбасы назарында

Алматы қаласы Алатау ауданына қарасты Ахметова Г.М. басқарып отырған №156 жалпы білім беретін мектепте биылғы оқу жылында 3665 оқушы білім алуда. Мектебіміз үш тілді, екі ауысыммен оқиды. 2018 жылдың басында мектебімізге қосымша ретінде 650 орындық жаңа ғимарат салынып, іске қосылды. Мектебімізде оқушыларды білікті де білімді 236 ұстаз білім нәрімен сусындатуда.

2018 жылдың 5 қазан күні Елбасымыз Н.Ә.Назарбаев Қазақстан халқына арналған кезекті Жолдауын жариялады. Бұл жолдауда халық табысының өсуі, тұрмыс сапасын арттыру, өмір сүруге жайлы орта қалыптастыру, азаматтар сұранысына бейімделген мемлекеттік аппаратты қалыптастыру, тиімді сыртқы саясатты жүргізу, әрбір қазақстандықтың еліміздегі өзгерістер үдерістеріне атсалысуы сияқты өзекті мәселелер қарастырылды. Осы қарастырған мәселелердің ішінде білім саласы қызметкерлері де назардан тыс қалдырылған жоқ.

Елбасымыздың жолдауы мектебіміздің кезектен тыс педагогикалық кеңесінде талқыланды. Мұғалім мәртебесін көтеру жөніндегі Елбасының сөздері ұстаздарымызды бір марқайтып тастады. Мұғалім – елдің болашағын көркейтіп, рухын биікке көтеретін, саналы ұрпақ, білімді азамат тәрбиелейтін жауапкершілігі мол киелі мамандық. Сөйлеген сөзінен, айтар ойынан әсемдік әлемі көрінетін, көкірегі жақсылыққа толы, мейірімді, білімі біліктілікке ұласқан ізденімпаз, адамгершілігіжоғары адам. Елбасының ұстаздарға рух беретін «Педагог мәртебесі туралы» заңды қабылдауы жарқын болашаққа бастайтын Жолдау болды. Назарбаев зияткерлік мектептерінің оқыту жүйесі мен әдістемесі бұдан былай жалпы орта білім беретін мектептер үшін бірыңғай стандарт болатыны қуанышты. Шәкірттерді білім нәрімен сусындатуда, өнегелі тәлім-тәрбие беру, оқушының бойында адамгершілік қасиеттерді дарытуда ұстаздың еңбегі зор.

Елбасы Нұрсұлтан Назарбаев «Болашақта еңбек етіп, өмір сүретіндер – бүгінгі мектеп оқушылары, мұғалім оларды қалай тәрбиелесе, Қазақстан сол деңгейде болады. Сондықтан ұстазға жүктелетін міндет ауыр», - деген еді. Сол себепті ұстаз әрдайым қасиетті тұлға ретінде ерекшеленеді.

«Ел болам десең, бесігіңді түзе», - демекші, болашақты түзегіміз келсе, болашағымыздың жарқын болғанын қаласақ, ұстаз мәртебесін көтеру – орынды да маңызды шешім. Осы жолдау дұрыс жолға қойылса, ел болашағы – жастар тәрбиесі, білімі, біліктілігі де оң шешімін таппақ.