Ашық сабақ: Пішіндер

Күні: 29.10.2021г.

Баланың аты – жөні: Мырзақан Жандос

Қорытындысы: Даун синдромы. Микроцефальды синдром. Тіл және психикалық дамуының тежелуі.

Жасы: 7 жаста.

Тақырыбы: Пішіндер.

Сабақ мақсаты: Тақырып бойынша жан – жақты білімдерін кеңейте отырып, сенсорлық қабілеттерін дамыту.

Міндеттері:

1. Білімділік: Пішіндер туралы білімдерін қалыптастыру. Пішіндерді бір – бірінен ажырата білуге үйрету;

2. Түзету: Сөйлеу тілін түзету;

3. Дамытушылық: Сенсорлық қабілетін дамыту. Айналадағы қоршаған орта заттарын қабылдау қабілетін және танымдылық қабілеттерін дамыту. Ұсақ қол моторикасын дамыту;

4. 3.Тәрбиелік: Ұқыптылыққа, тиянақтылыққа, тапсырманы шыдамдылықпен орындауға тәрбиелеу.

Әдіс – тәсілдері: Түсіндіру, сұрақ – жауап, бақылау, педагогтың және балаланың іс - әрекеті, әңгімелесу, баяндау, мадақтап отыру.

Көрнекілігі: Пәндік және иллюстративтік құралдар: пішіндер, кубиктер, дамытушы планшеттер, сеген тақтасы, сенсорлық ұяшықтар, таяқшалар, және т.б.

Сабақ түрі: Жаңа сабақ

Жұмыс түрі: Жеке жұмыс

I.Ұйымдастыру кезеңі

Амандасу рәсімі: - Армысың әлем!

Армысың Жарық күн!

Армысыңдар Достарым,

Саламатсыздар ма қонақтар!

Сұрақ – жауап арқылы сабаққа деген қызығушылығын арттыру:

• Жондос қазір қай мезгіл?

• Ауа – райы қандай?

• Күн күлімдеп шығып тұр, айнала сары алтынға боялған, алайда күн салқын, өйткені қазір күз мезгілі (күз құбылысын қол - саусақ икемділігімен көрсету: жел улейді у-у-у, жаңбыр жауады тырс – тырс...).

КҮННІҢ БЕЙНЕСІ

II. Өткен сабақты пысықтау:

- Біз өткен сабақта «Түстер» тақырыбын өткенбіз.

- Мен көрсеткен түстерді ата! ( қызыл, сары, көк, жасыл т.б.)

- Дамытушы планшеттермен жұмыс. Сәйкес түстерді табу.

Үй тапсырмасын сұрау, тексеру. Бағалау. Мадақтау!!!

Түстерді ажыратуға арналған дамытушы планшет

ІІІ. Жаңа сабақ: Балаға тақырып бойынша жан – жақты білім беру.

• Жандос бізге қонаққа алыстан поездбен пішіндер келіпті. (Әр вогондағы пішіндермен жеке – жеке таныстыру: төртбұрыш, үшбұрыш, дөңгелек, тіктөртбұрыш, жұлдызша т.б.).

Әр пішінге жеке тоқталып, сипаттама беру, яғни үшбұрыштың үш бұрышы – үш қабырғасы бар т.б.

Сенсорлық тақта

IV. Сергіту сәті: Жел улейді у-у-у,

Құйын келіп билейді зу-зу-зу,

Жапырақтар қол соқты гу-гу-гу,

Қатты – қатты жел соқты гу-гу-гу.

Қимылды – сергіту жаттығуын сөз бен қимыл - әрекетті сәйкестендіре отырып орындау.

V. Сабақты бекіту: Тапсырмалар арқылы жаңа сабақта алған білімдерін бекіту.

1 – тапсырма: Дамытушы планшеттермен жұмыс. «Пішіндердің орнын тап!» дидактикалық ойыны

2 – тапсырма: «Таяқшалардан пішіндер жасау!»

Мақсаты: Пішіндердің неше қабырғадан және бұрыштан тұратынын балаға ұғындыру. Ұсақ – қол моторикасын дамыту.

Барысы: Балаға әр – түрлі суреттер беріледі, сол суреттерде кездесетін заттарды бала таяқшалардан құрастыру керек. Мысалы: баскиім – үшбұрыш, қорапша - төртбұрыш пішіндерімен берілген.

3 – тапсырма: Сенсорлық ұяшықтармен жұмыс.

Мақсаты: Сенсорлық қабілеттерін дамыту. Пішіндер мен түстер туралы ой - өрісін кеңейту.

Барысы: Сенсорлық ұяшықтарға түстері сәйкес келетін пішіндерді салу, жинақтау.

4 – тапсырма: «Пішіндерден үй соғайық!» Дамытушы планшетпен жұмыс.

Мақсаты: пішіндерді ажырату қабілеттерін дамыту. Үйдің құрылысы қандай пішіндерден құралатынын ұғындыру. Ұсақ – қол моторикасын дамыту.

Барысы: Балаға әр түрлі пішіндер беріледі. Сол пішіндерді пайдалана отырып үй құрастыру ұсынылады. Яғни түймелеу, жабыстыру, ілу дағдыларымен жүзеге асырылады.

5 – тапсырма: Ұсақ қол моторикасына арналған тапсырмалар.

Мақсаты: Ұсақ қол моторикасын дамыту. Қол ептілігін, икемділігін, қол – саусақ координациясын дамыта отырып, сенсорлық қабілеттерін қалыптастыру.

Барысы: Бау байлау, дамытушы планшеттермен жұмыс.

VI. Сабақты қорытындылау:

- Бүгін біз қандай сабақ өттік?

- Қандай пішіндермен таныстық?

- Қандай тапсырмалар орындадық?

- Саған бүгінгі сабақ ұнады ма?

VIІ. Үйге тапсырма беру: Бояғыштармен жұмыс!

- Жарайсың, сен барлық тапсырмаларды өте жақсы орындадың!

Мадақтау!

Байзақ аудандық «Психологиялық – педагогикалық түзету кабинеті» КММ

Ашық сабақ

Тақырыбы: Пішіндер

Дефектолог: Жарасова Н.Н.