Жамбыл облыстық мүгедек балаларды оңалту және бейімдеу орталығы

Дефектолог мұғалімі : Нұрсеит Мәншүк Тәкенқызы

Сабақ: Қарапайым математикалық ұғымдар

Сабақ түрі: Жаңа сабақ. Жеке жұмыс

Тобы: I «Б»

Сабақтың тақырыбы: «Негізгі пішіндер» (домалақ, үшбұрыш, шаршы)

Сабақтың мақсаты:

1.Білімділік: Негізгі геометриялық пішіндермен (домалақ, үшбұрыш, шаршы) таныстыру. Пішіндерді тануға, көрсетуге, атауға үйрету, салыстырып және ажырата білуге, пішіндерге ұқсас заттарды көріп, топтастырып білуге үйрету. Бұрыштарды санай отырып, пішіндердің түрлерін анықтауға үйрету. Пішіндерге ұқсас бейнелермен сәйкестендіруге үйрету.

2.Түзетушілік: Балалардың заттық-әрекеттік ойлауын, қиялын, зейін тұрақтылығын, шоғырлануын, көру, есту арқылы есте сақтауын, қабылдауын, салыстыру, жалпылауға, сөздік қорын және қолдың ұсақ моторикасын, қарапайым математикалық ұғымдарын дамыту.

3.Дамытушылық: Балалардың сабаққа, заттарды салыстыра білуге деген қызығушылығын тудырып, ой - өрісін, белсенділігін, сана-сезімін, өзін-өзі ұстауын дамыту.

4.Тәрбиелік: Ойынның шартын сақтап ойнауға, ұйымшылдыққа, шапшаңдыққа, ұқыптылыққа тәрбиелеу.

Сабақ әдіс тәсілдері: түсіндіру, көрсету, сұрақ-жауап, сергіту сәті, нейрогимнастика, ойындар, мадақтау, қорытындылау.

Көрнекі құралдар: пішінді макеттер, қорапшалар, суреттер, пішінді поезд, материалдар.

САБАҚ БАРЫСЫ

Ұйымдастыру кезеңі: Сәлемдесу, көңіл-күйін сұрау.

Шаттық шеңбері: Сәлемдесейік иіліп,

Жылы жүзбен жымиып.

Қызығы мол сабақта,

Ойнайық та күлейік.

Ал енді осындай көтеріңкі көңіл-күймен сабағымызды бастайық.

- Жандос қазір біз сабағымызды бастамас бұрын, бүгінгі сабағымыз туралы видеороликты тамашалап алайық.

Негізгі бөлім:

- Жандос, біз бүгін «Негізгі пішіндермен» домалақ, үшбұрыш, шаршы пішіндерімен танысатын боламыз.

- Мынау пішін «домалақ» деп аталады.

- Қалай аталады екен? Қане бірге қайталайықшы?

- Домалақ пішінінің бұрыштары болмайды. Домалақ пішін допқа ұқсайды екен, себебі доп секілді домалай алады.

- Ал мынау пішін «үшбұрыш» деп аталады.

- Қалай аталады екен? Қане бірге қайталайықшы?

- Үшбұрыштың үш бұрышы, үш қабырғасы болады. Қане санап көрейік: бір, екі, үш. Үшбұрыш домалай алмайды, өйткені бұрыштар бөгет жасайды. Үшбұрыш пішіні пирамидаға ұқсайды.

- Ал мынау пішін «шаршы» деп аталады.

- Қалай аталады екен? Қане бірге қайталайықшы?

- Шаршының төрт бұрышы, төрт қабырғасы болады. Қане санап көрейік: бір, екі, үш, төрт. Ал шаршы пішінге текше ұқсайды екен.

- Саған барлығы түсінікті болса, қане ойынымызды бастайық.

1. Ойын. «Пішінді вагондар» 

Шарты: Бала поезд жолында кездескен пішінді кедергілерді вагондағы өз орнына тізу керек.

Сергіту сәті: Нейрогимнастикалық жаттығу.

Мидың жұмыс істеу өнімділігін арттырады.Ұсақ және ірі моториканы дамытады. Ақпаратты тез қабылдап, қорытуға көмектеседі. Зейінді шоғырландырады. Есте сақтау қабілетін арттырады.

Сабақты жалғастыру:

- Жандос, қарашы мұнда қызықты ойын тұр екен. Қане, осы ойынды ойнап көрейік.

2. Ойын. «Пішінге ұқсас суретті тап»

Шарты: Балаға үш түрлі «домалақ, үшбұрыш, шаршы» пішінді қорапша беріледі. Суреттерде әр түрлі пішіндерге ұқсас бейнелер көрсетілген (доп, алма, күн, пирамида, үйдің шатыры, балмұздақ, текше, терезе, теледидар). Әр бейне қай пішінге ұқсас келсе, сол пішінді қорапшаға салу керек.

3. Ойын: «Қимылды ойын»

Шарты: Бала үлгіге қарап аталған пішінге жүру арқылы сол пішінді ажыратып, таба білу қажет.

Сабақты қортындылау.

- Жандос біз бүгінгі сабақта негізгі пішіндермен таныстық. Енді сол пішіндерді ажырата аламыз ба?

- Түрлі қызықты ойындар ойнадық. Саған бүгінгі сабақ ұнадыма?

- Баланы мақтап-мадақтап, бағалау.