Бүлінген жерлерді биологиялық жолмен қайта құнарландыру

Бүлінген жерлерді биологиялық жолмен қайта құнарландыру

Биологиялық қайта құнарландыру – құнарландыру кезеңі, техникалық құнарландырудан соң жүзеге асырылатын, жануарлардың, өсімдіктердің, саңырауқұлақтар мен микроорганизмдердің тіршілігін қайта жандандыруға және жердің шаруашылықтық өнімділігін қалпына келтіруге бағытталған агротехникалық және фитомелиоративтік шаралар кешені.

Бұзылған жерлерді биологиялық жолмен қайта құнарландыру әдісін ұйымдастыру, әсіресе тау-кен өнеркәсібінде, еңбекті көп қажет ететін кезеңдердің бірі. Үйінділердің ауылшаруашылығына жарамдылығын анықтау үшін біршама аналитикалық зерттеулер жүргізіп, олардың құрамындағы жыныстардың физикалық, химиялық, механикалық қасиеттерін, органикалық заттектердің мөлшері мен құрамын, қышқылдығын, тұздылығын, минералдық қоректену элементтерінің мөлшерін анықтау қажет. Осы көрсеткіштерге негізделіп, рекультивация жүргізіліп, қандай өсімдіктерді қоныстауға болатынына тұжырым жасалады.

Бүлінген жерлер рекультивациядан өткесін ауыл шаруашылығында ағаш отырғызуға, су қоймаларын, өнеркәсіптік, тұрғын үй, тұрмыстық және мәдени құрылыстарын салуға, демалыс аймақтарын жасауға қолданылады. Мәселен, Москваның Ленинград жолындағы бұрынғы кірпіш зауыттарына жататын карьерлердің орнына Достық саябағы ұйымдастырылды, Қарағандыда көмір өндіруден шыққан террикондар (жыныстарының үйіндісі) Алматы-Астана көлік жолдарын салуға қолданылды, Ақтау, Жамбыл, Жаңа өзен, Қарағанды қалалары және басқа да ел мекендерінде жеоді рекультивациялаудан кейін көгалдандыру жұмыстары жүргізілген, осы жағдайлар бүлінген жерді қалпына келтіруге айқын мысал болады.