Жасөспірімдерді адамгершілікке тәрбиелеу

Гүлия Жайлауовна Касенова, педагог-психолог

«Горное негігі мектебі» КММ

Іс-шараның мақсаты: Оқушыларды адамгершілік қасиеттерге тәрбиелеу және оны күнделікті өмірде қолдануға үйрету.

Міндеттері:

• мұғалімдер мен оқушылар арасында жылы қатынас тудыру;

• оқушыларды әр түрлі адамгершілік қасиеттермен таныстыру;

• оқушыларды мейірімділік пен қатыгездікті айыра білуге, жақсы қылықтарды үйренуге, жаман қылықтардан аулақ болуға үйрету.

Ұйымдастыру кезеңі. Сәлемдесу.

Балалар шеңбер құрып құрып отырады. Жақсы сөздерін айтады, бір-бірімен амандасады.

• Қайырлы күн, бар жақсылығы өзімізге – деп қолымызды жайып, қайта түсіреміз. Қатысушылар өз қалауларымен есімдерін өзгертеді, өз есімі ретінде өзіне ұнайтын адамның атын таңдауына болады. Бұл есім тренингтің соңына дейін аталатыны түсіндіріледі. Бұл тәсілді қолдану арқылы өзінің атымен байланысты өз өміріндегі өзіне ұнамайтын жағдайлардан шығып кетуіне психологиялық негіз болады. Қатысушылар бір-бірінің жаңа атын есте сақтау үшін сол атауға арналған жүгіртпе ойындарын ұйымдастырамыз.

Танысу жаттығуы.

Шеңбер бойымен отырып, допты бір-біріне лақтыру арқылы ойыншының жаңа атын атап, өзі білгісі келетін сұрақтарды қояды. Мысалы, сенің алға қойған мақсатың қандай? Сенің сүйікті әншілерің кімдер? Сенің сүйікті пәндерің қандай?

«Аяқталмаған сөйлем»

Топтың әрбір мүшесі ортадағы үстелден кезектесіп қағазды алады, онда жазылған ойды аяқтау керек.

«Жақсы қасиет» деп __________________________________________?

«Жаман қасиет» деп __________________________________________?

Адамның бойындағы қасиеттер _________________________________?

Ақылды болу үшін не істеу керек _______________________________?

Сыныптастар арасында адамгершілігі мол деп кімді айтар едің? Өз бойыңда адамгершілік қасиеттер бар деп ойлайсың ба?

Түйін: оқушылар өз ойын айтуға дағдыланады, ой пікірі қалыптасады. Тез ойлап, шешім шығара білуге, шын көңілден жауап беруге үйренеді.

Жаттығу: «Ой талқы».

Балаларға сұрақ қойылады. Жақсы адам деп қандай қасиеттерге лайық адамды атайды? Сендер сұрақтың жауабын күн сәулесінің шуағына жазуларың керек. Мысалы, мейірімді, ақкөңіл, сыпайы.

Жақсы адам

Түйін: жақсы адам Күндей айналасына жылу береді. Әл-Фараби бабамыздың «Ақыл дегеніміз екі жақсы нәрсенің жақсырағын таңдап алу қасиеті» демекші, ақылдың атқаратын жұмысы – ол салыстыру. Осыған байланысты қасиеттерді салыстырып көрейік.

«Мен және айна» жаттығуы.

Бұл ойында ойыншылар бір-біріне қарап, жұп құрып отырады. Әр жұптағы ойыншының біреуі жағымсыз қасиеті бар адам туралы айтса, оны екіншісі жағымды қасиетке айналдырып айтады.

Мысалы: жалқау – еңбекқор, ұялшақ – батыл. Бірінші бала жалқау бала туралы әңгіме айтса, екіншісі оны қалай еңбекқор адам етуге болатыны туралы өз көзқарасын айтады.

Қорытынды: Бұл ойында жаман қасиеттерден аулақ болуға, жақсы қасиеттерге үйретеді.

Сергіту сәті.

Мынау менің жүрегім

Бәрі осыдан басталған.

Мына басым ақылды,

Бәрін осы басқарды.

Мынау менің оң қолым,

Мынау менің сол қолым.

Барлық істі атқарған.

Балалар өлеңді айтып тұрып, дене мүшелерін көрсетіп, жаттығу орындайды.

Жаттығу. «Адамгершілік жүрегі».

Алғыр, жүйрік, ойлы, адал, батыл, ойшыл, зейінді, ақылды. ере

Балаларға сұрақ: Ақылды болуымыз үшін не істеуіміз керек? Қандай қасиеттерді бойымызға дарытуымыз керек?

Осы сұраққа жауапты әр оқушы жүрекшеге жазады.

Психолог: Күн бізге шуағымен жылу береді, ал адам жылы сөз айту арқылы бір-біріне жылылық танытады. Шын жүректен бір-бірімізге жақсы тілектер айтып, сабағымызды қорытындылайық.