«Көркем еңбек» сабақтарында 3D-модельдеудің практикалық тәжірибесіне енгізу

«Көркем еңбек» сабақтарында 3D-модельдеудің

практикалық тәжірибесіне енгізу

Мемлекеттік білім беру стандарты шеңберінде жүзеге асырылатын білім беруде ақпараттық-коммуникациялық технологияларды жаңғырту бірінші кезектегі міндеттерді анықтайды, олардың орындалуы білім сапасына, оның ішінде мектептегі білімге жоғары талаптар қояды. Адамға ең бірінші өмірлік қажеті - еңбек екенін уақыт дәлелдеуде. Сол себепті, әр оқушыға оның қабілеттеріне сәйкес келетін білім беру өрісі қажет.
Баланы еңбекке баулуда оның қызығушылығына, бейімділігіне сай оқыту – пән мұғалімінің басты міндеті. Көркем еңбек пәні АКТ енгізу бойынша білім беру жүйесін кеңейтуге мүмкіндік береді. «Көркем еңбек» пәні мұғалімдерінің білім беру процесінде 3D-модельдеуді қолдану құзыреттіліктерін дамыту мақсатында Қостанай облысы әкімдігінің білім басқармасының Рудный қаласы білім бөлімінің Бейімбет Майлин атындағы №7 мектеп-гимназиясы" КММ «Көркем еңбек» сабақтарындағы 3D модельдеу» шеберлік сыныбы өтті. «3D-модельдеудің қолжетімді құралдары қолданбалы 3D-модельдеудің ерекшеліктері» тақырыбында көркем еңбек пәні мұғалімі ретінде өзім және әріптесім информатика пәні мұғалімі Серікбай Ерік Ниязбекұлымен бірігіп тәжірибе бөлістік. Шеберлік сыныпта қатысушылармен заманауи 3D-модельдеу технологияларының түрлерімен таныстырып, «Көркем еңбек» сабақтарында 3D-модельдеудің практикалық тәжірибесіне енгізу және «Көркем еңбек» және «Информатика» пәндерінің оқу процесіне 3D-модельдеуді кіріктіру мәселелері ашылды. Көркем еңбек сабақтарында қолдануға тиімді 3D бағдарламаларымен танысып осы бағдарламаларда жұмыс жасау процесі көрсетілді. Pepakura Designer, Google SketchUp, Sweet Home 3d, TinkerCAD бағдарламаларын көркем еңбек сабақтарында қолдануға ыңғайлығын, тиімділігін көрсеттік. 3D модельдеу бағдарламасын пайдалану мыналарды жасауға мүмкіндік береді: оқуға оң мотивацияны қалыптастыруға жағдай жасау; оқушылардың өз бетінше білім алуға деген тұрақты қызығушылығы мен ұмтылысын қалыптастыру; қазіргі заманғы автоматтандырылған жобалау (АЖЖ) жүйелерімен және олардың қызметтің әртүрлі салаларында қолданылуымен танысу; конструкторлық және технологиялық құжаттамаларды әзірлеуде білімдерін кеңейту; әртүрлі заттардың үш өлшемді модельдерін және сызбаларын құруды үйрету; оқушыларға кәсіптік және өмірлік жолды еркін және мағыналы таңдауды анықтайтын білім беру. Өз тәжірибемде Google SketchUp бағдарламасы бойынша конус, саукеле жасауды сабақтан үзіндісімен бөліссем және Sweet Home 3d 9- сыныпта «Интерьер/ экстерьердегі ландшафт элементтері» бөлімінде ландшафт элементтерінің 3D нұсқасын құрастыру(макет визуалдау) шеберлігіммен бөліссем, ал Ерік Ниязбекұлы SketchUp бағдарламасында құмыра салып көрсетіп және TinkerCAD жүйесінің де артықшылықтарын атап өтті. Шебер сынып қорытындысында қатысушылар өз пікірлерін чатқа жазып, алғыстарын білдірді. Қорытындылай келе бүгінде заман ағымына ілесе отырып, рухани ұлттық құндылықтарымызды сақтай отырып, қажетімізге қарай заманауи техникалар мен технологияларды өмірімізге енгізу қажет. Ал жаңашыл ұстаздың бірден-бір міндеті озық технологияларды меңгеріп, білім алушыларға үйретіп оны дамыту болып табылады деп ойлаймын.

Кульбаева Тамаша Александрқызы

Рудный қаласы білім бөлімінің

Бейімбет Майлин атындағы

№7 мектеп-гимназиясы" КММ «Көркем еңбек» пәні мұғалімі