Мақала "Жаңартылған білім мазмұнына көзқарас"

Жаңартылған білім мазмұнына көзқарас

Абай атамыздың «Адам баласы бір-бірінен ақыл-ой, оқу-білім және парасатпен озады. Басқасымен оздым деу ақымақшылық», - деген сөзінен көп нәрсені аңғаруға болады. Енді сол артықшылықтың  бірі болған оқу білімнің мазмұнына бүгінгі таңда жаңарту енгізілуде.

Бүкіл əлемде білім беру жүйелерінің келешек ұрпаққа қандай білім беретіні туралы мəселе қайта қаралып, ғажайып өзгерістер енгізілуде. Осы уақытқа дейінгі дәстүрлі оқыту үрдістері қазіргі заман талаптарына сай болмағандықтан, білім саласына көптеген бастамашыл топтар өз идеяларын ұсынды. Білім саласын, оқытуды зерттейтін ғылыми институттар өз бағдарламаларына шетелдік озық стандарттарды қоса бастады. Білім беру саласындағы ауқымды өзгерістер күн санап қарқынды түрде дамуда.

Ақпараттық технологиялардың өте дамыған кезеңінде жас буын оқушыларға заман талабына сай, бәсекеге қабілетті білім алуға лайықты оқыту үрдістерін қолға ала бастадық.

Қазіргі кезде мектеп директорлары үшін де, мұғалімдер үшін де ең басты, маңызды мәселе: «XXI ғасырда нені оқыту керек?» және де «Мұғалімдер оқушыларды XXI ғасырда өмір сүруге қалай дайындайды?». Сонымен қатар, оқушылардың тілдік дағдысын қалыптастыру. Сондықтан да, жаңартылған оқу бағдарламасындағы әдіс-тәсілдерді қолдану арқылы сабақ жүргізу –  оқушының өзін-өзі дамытуына, өз біліміндегі олқылықтарды өзі тауып, өз сұрағына өзі жауап іздеп жан-жақты білім алуына көмектеседі және оқушыға қалай оқу керектігін үйрету, соның нәтижесінде еркін, өзіндік дәлел - уәждерін нанымды жеткізе білетін, ынталы, сенімді, сыни ойлай алатын, пікір-көзқарастары жүйелі дамыған, сандық технологияларда құзырлылық танытатын оқушы қалыптастыру.

Ұлы ағартушы Ахмет Байтұрсыновтың «Ұстаз үздіксіз ізденгенде ғана, шәкірт жанына нұр құя алады», – деген сөзі ізденімпаз, жаңаша ұстаздарға арналғандай. Мұны әрбір мұғалім жадында сақтауы тиіс.