Мейірім шуағы
“Сүйемін туған тілді – анам тілін,
Бесікте жатқанымда-ақ берген білім.
Шыр етіп жерге түскен минутымнан,
Құлағыма сіңірген таныс үнін…” –
деп, Сұлтанмахмұт Торайғыров жырлағандай, балалар дүниеге шыр етіп түскен
минутынан бастап, ананың үнімен айналаны тани бастайды. Анасының жүзін
танып, иісін сезініп, ана тілін түсіне бастайды. Әрбір бала ата-анасының мейірімі
мен махаббатына, жүрек жылуы мен қолдауына мұқтаж. “Лашын құсқа ауа
қадірлі, жүйрік атқа дала қадірлі” демекші, баланы үлкен азамат етіп өсіру үшін
шыдамдылық, жауапкершілік, ізденіс, уақыт керек. Ата-ананың басты міндеті –
баланы білімді, ұлтжанды, халқын сүйетін азамат етіп тәрбиелеу. Бала – үйдің
айнасы. Үйдегі тәрбие қандай болса, баланың сыртта өзін ұстауы да соны
көрсетеді. “Ұяда не көрсең, ұшқанда соны ілесің” дегендей, бала, әсіресе, өтпелі
кезеңде ата-анасының қолдауына зәру болады. Осы сөзіме дәлел ретінде мына
оқиғаны мысалға келтіргім келіп тұр:
Өткен оқу жылында өзін-өзі тану пәнінің мұғалімі Нысанғалиева Меңсұлу
апайдың бастауымен “Жұлдыз” ықшам ауданындағы “Кәмелет жасқа толмаған
балаларды бейімдеу орталығына” бардық. Олардың жағдайын көріп, тіршілік
көзіне су қалай қажет болса, балаларға да ата-ананың ауадай қажет екеніне көзім
жетті. “Қолда барда алтынның қадірі жоқ” дегендей, балаларға да ата-ананың
қадірін түсіне білулері керек. Ата-анамыз бізге өмір сыйлайды, жан-жақты жақсы
тәрбие береді және “қанаттыға қақтырмай, тұмсықтыға шоқтырмай” өсіреді. Ал
біз өз кезегімізде олардың ақ үміттерін ақтауға тырысуымыз қажет.
“Әке – асқар тау, ана – бауырындағы бұлақ, бала – жағасындағы құрақ”
дегендей, баланың қызығушылықтарына мән беріп, оны әрқашан қолдап отыру
керек. Баланы еңбекқорлыққа, адамгершілікке, мейірімділік пен
кішіпейілділікке, адалдық пен қамқорлыққа және отансүйгіштікке тәрбиелеу өте
маңызды. “Отан – отбасынан басталады” дегендей, егер ата-аналар балаларын
ақылды, зерек, мықты, адал азамат етіп тәрбиелеп өсірсе, еліміз өркендеп, ұлттық
салт-дәстүріміз бен мәдени құндылықтарымызды сақтай отырып, әлемдегі
дамыған отыз ірі мемлекеттердің қатарына жылдам енетініне сенемін.
“Өнер-білім бар жұрттар
Тастан сарай салғызды,
Айшылық алыс жерлерден,
Жылдам хабар алғызды” –
деп, Ыбырай Алтынсарин атамыз жырлағандай, мен де жақсы оқып, жоғары білім
алып, еліміздің жоғары дамуына өз үлесімді қосқым келеді.
Алматы қаласы Түрксіб ауданы

№142 ЖББ мектептің
8 “Б” сынып оқушысы
Серікбай Сымбат Қуанышқызы

Жетекшісі: Нысангалиева М.К