Мен мектеп үйлестірушісі ретінде өз тәжірибемді қалай дамытамын?

Мен мектеп үйлестірушісі ретінде өз тәжірибемді қалай дамытамын?

(эссе)

«Ізденген жетер мұратқа».

(халық мақалы )

Бағалау - мұғалім үшін де, оқушы үшін де жауаптылықты қажет ететін үдеріс. Жаңартылған білім беру мазмұны аясында критериалды бағалау жүйесінің мақсат-міндеттерін жүзеге асыруда мектеп үйлестірушісінің ролі зор.

Осы талапты түсіне отырып, бағалау жүйесін сапалы басқаруда, қалыптастырушы, жиынтық бағалау үдерістерін жүзеге асыруда мектеп үйлестірушісі ретінде білімім мен тәжірибемді қалай пайдаланамын, өзімнің және мұғалімдердің білімі мен дағдыларын жетілдіру және олардың мектеп тәжірибесін жақсарту қызметін жандандыруда қандай әрекет жасайтыным туралы рефлесивті ойлар мені үнемі мазалайтыны анық.

«Қазір сіз кешегі ойларыңыз қайда әкелді, сол жердесіз.

Ал ертең бүгінгі ойларыңыз қайда апарады, сонда боласыз» - деген қанатты сөзде айтылғандай, әр уақытта мектептегі іс-тәжірибемдегі жетістіктер мен жеткен межелерді саралап, ой елегінен өткізу күнделікті дағдыға айналды. Үнемі болашақ жұмыс жоспарыңды да ойша жобалап, түрлі ойлар мен идеялардың басын біріктіріп, нақты іске жүзеге асырғанша ерінбеу - табысты еңбекке жетелері сөзсіз. Әрине, ең бастысы - кәсіби құзыреттілігімді арттыру, ол үшін үнемі ізденуден, үйренуден жалықпау керектігін естен шығармауым маңызды.

Білім беру үдерісіндегі педагогикалық жобалау технологиясы – «Кері дизайн» - әдісімен қарасақ, мені мектептегі бағалау үдерісінде жетуіміз қажет нәтижелер қызықтыратыны анық. Ол бағытта айқын мақсатты белгілеп, нақты жоспармен жүйелі жұмысты жүргізу қажет.

Оған дәлел ретінде, критериалды бағалау жүйесі бойынша нормативтік құжаттарға қатысты түсіндіру жұмыстарын жүргізу, қалыптастырушы бағалаудың сабақта қолдану жолдарын қадағалау, жиынтық бағалауды ұйымдастыру, өткізу, «Оқу мақсаты, Ойлау дағдыларының деңгейі, бағалау критерийлері, дескрипторлар құрастыру» тақырыбында мұғалімдермен пікірлесу, мұғалім қажеттілігіне қарай кеңестер беру, әдістемелік қолдау көрсету, «Өңірлік және мектеп үйлестірушілеріне арналған критериалды бағалау бойынша нұсқаулықты» пайдалану, басқа мектеп үйлестірушісімен байланыс орнату секілді әрекеттер - мектеп үйлестірушісінің күнделікті еңбек тәртібінде дағдыға айналуы тиіс. Осы әрекеттерді жүзеге асыра отырып, тәжірибе жинақтау арқылы кәсіби тұрғыдан өсуге қол жеткізуге болады.

Бүгінгі таңда қоғамның білімге талабы жоғары. Ақпараттар ағыны өте көп. Болашақ ұрпақты тәрбиелейтін жауапты мамандық иесі ретінде әрбір жаңалықты қалт жібермей, үнемі іздену, оқу, үйренуден жалықпауды басты қағидаға айналдырып, тәлімгерлік арқылы мектеп мұғалімдерінің өзара әрекеттесуіне ықпал ете отырып, өз тәжірибемді үнемі дамытуға мүмкіндік жасай аламын деп ойлаймын.

Есенова Бекзат Бактыгуловна

Батыс Қазақстан облысы Орал қаласы

№37 жалпы орта білім беретін мектеп

директордың оқу ісі жөніндегі орынбасары

Самал көшесі – 72

www.bekz@mail.ru