Менің Отаным-Қазақстан

Тақырыбы: Менің Отаным - Қазақстан
Мақсаты: Отаны туралы білімдерін кеңейту. Ата Заңымыз туралы ұғым беру. Еліміздегі татулықты, достықты паш ету, ассамблея туралы ұғым қалыптастыру. Елін сүюге, халқына қызмет етуге тәрбиелеу.
Көрнекіліктер: Ту, Елтаңба, шарлар, гүлдер, нақыл сөздер жазылған плакат.
Сабақтың барысы

Қазақстан – туымен тұғырлы.
Елтаңбасымен еңселі
Әнұранымен айбатты.
Әнұран орындалады
Бүгінгі біздің тәрбие сабағымыздың тақырыбы: «Менің Отаным - Қазақстан»
Мұғалім: Отан дейміз от жаққан жерімізді,
Отан дейміз өсірген елімізді.
Отан дейміз туған жер, атамекен –
Биік тау, орман, тоғай, көлімізді.
Отан дейміз кең – байтақ астананы,
Жасыл жайлау, жаңа жол, жас қаланы.
Отанның шеті де жоқ, шегі де жоқ,
Ол бірақ өз үйіңнен басталады.

Қазақстан біздің сүйікті - Отанымыз. Көрсең көз тоймас асқар шыңды таулары, айдын шалқар көлдері, жайыла аққан өзендері, ормандары бар. Осының бәрі Алтай менен Атырау, Ақжайық пен Алатаудың аясында құлаш жайып, жайнай түрленіп жасанып - жасарып жатыр.
«Отан отбасынан басталады» - деп халқымыз айтқандай Отан кең мағыналы, қасиетті ұғым. Әрбір адамның отбасы, тұрған мекені, өскен ортасы, аймағы, мемлекеті – оның жарық дүниедегі жансаясы, өмір өрісі, оттай жандырған Отаны.

Отанымызды сүйіп, аялау үшін еліміз, туған жеріміз оның тарихы, өткені мен бүгіні жайлы жақсы білуіміз қажет.
Мұғалім: Ал қане, балалар,30 тамыз күні қандай мереке?
30 тамыз күні 1995 жылы Қазақстан Республикасының Конституция – Ата Заңымыз қабылданған күн. Ата Заңымыз 98 баптан тұрады. Әр баланың, адамдардың құқығы қорғалады. Ата Заңым – бабалардың лебізі. Ата Заңым – барлық заңның негізі. Арқа сүйер Ата заңда адамды. Артық санау кемсітудің жоқ ізі. Ата Заңым мемлекет айбыны Ата Заңым асыл ойдың айдыны Туған жердің - Қазақстан елінің Ата Заңмен қорғалады байлығы.
Мұғалім: Отан деген не? Оны қалай түсінесіңдер?
«Отан отбасынан басталады» дегенді қалай түсінесіңдер?

Отан - өз үйім, ата – анам, достарым, бауырым, тау, тас, өзен - көл, туған жер, бәрі Отаным болады.
- Дұрыс айтасыңдар. Ендеше Отан туралы балалар не дейді?
Қазақ елінде тұратын адамдардың
Отаны – Қазақстан Республикасы.
1 - оқушы
Туған жер – алтын таң.
Кең далам, таулы орман.
Ұл мен қыз қорғаймыз,
Бақытты ұлы Отан.
2 - оқушы
Отан дейміз от жаққан жерімізді
Отан дейміз өсірген елімізді
Отан дейміз туған жер, атамекен.
Биік тау, орман, тоғай, көлімізді
3 - оқушы
Отан дейміз кең - байтақ астананы
Жасыл жайлау, жаңа жол, жас қаланы
Отанның шеті де жоқ, шегі де жоқ
Ол бірақ өз үйіңнен басталады.
Мұғалім: Бүгінгі Қазақстанымыз – қашан да мақтанышымыз. Осы жылдар ішінде мемлекетіміз көркейіп, гүлденді. Өзге елдерімен терезесі тең болып; болашаққа жол ашты.
Қазақстан тәуелсіз мемлекет болып қай кезде жарияланып еді?
1991 жылы 16 желтоқсанда. Осы күнге жету үшін қазақ халқы талай қиындықтарды бастан кешірді, қасіреті қаншама!
Қазақстанның рәміздері: Ту, Елтаңба, Әнұран қабылданды.
4 - оқушы
Қазақстан Республикасының
болашағы елім, жерім, ата - бабам
күрескен, кіндік қаным тамған туған жерім.
5 - оқушы
Жарқырап нұрын төгіп көгінде күн.
Жұлдызың жарқырайды бүгін сенің
Тәуелсіздік мерекең құтты болсын.
Қазақстан Республикам – елім менің!
8 - оқушы
Жарқырап нұрын төгіп көгінде күн
Жұлдызың жарқырайды бүгін сенің
Тәуелсіздік мерекең құтты болсын
Қазақстан Республикам менің.

Мұғалім: Біздің Республикамыз қалай аталады?
- Қазақстан Республикасы
- Қазақ жері қандай?
- Қазақ жері өте бай, әрі кең.
- Отанымыздың астанасы?
- Астана қаласы
- Ал сең білесің бе, осыған дейін қандай астаналар болған?
- Бұған дейін Орынбор, Қызылорда, Алматы қалалары астанамыз болған
- Астана қаласы бұл 13 - ші астанамыз екен.
- Астана қаласы күннен - күнге жаңарып, гүлденіп, көркейіп келеді.
- Аз ғана уақыт ішінде жаңа тұрғын үйлер, зәулім ғимараттар, гүлзарлар мен фонтандар, әсем ескерткіштер бой көтеріп қалған

«Қызықты ұйқастар»
1. Өрмекші құрды тұзақ
Менің ұлтым... /қазақ/
2. Биіктеуде жас қала,
Бас қаламыз... /Астана/
3. Менің досым салмақты
Бұрынғы астанамыз.../Алматы/

Қорытынды:
Рефлексиялық - бағалау кезеңі.
Сын тұрғысынан сұрақтарға жауап беру (иә, жоқ)
1. Қазақстан жері кең байтақ
2. Қазақстан 5 мемлекетпен шектескен
3. Астанасы – Алматы
4. Ұлты қазақ
5. Пайдалы қазбаларға өте бай
6. Өсімдіктер әлемі алуан түрлі
7. Ертіс, Сырдария, Есіл, Жайық - өзендер
8. Ту, Елтаңба, Әнұран еліміздің рәміздері
9. Мемлекеттік тіл – орыс тілі
10. Менің Отаным – Қазақстан
- Міне, балалар, «Менің Отаным – Қазақстан»- деген тақырыптың мәнін терең түсіне алдыңдар деп ойлаймын. Ел алдындағы, болашақ ұрпақ алдындағы жауапкершілікті ұмытпайық. Ерінбей, жалықпай білім алыңыздар, ел болашағы сіздердің қолдарыңызда.