Эссе

Менің педагогикалық философиям

Менің педагогикалық философиям қазіргі таңда білім беру жүйесін дамыту стратегиясының басты мақсаты – ұлттық білім моделін жасау. Ұлттық білім беру формасының негізгі бағыты – адамды қоғамның ең негізгі құндылығы ретінде тану, оның қоғамдағы орны мен рөліне, әлеуметтік жағдайына, психикалық даму ерекшелігіне мән беру, сол арқылы оның рухани жан-дүниесінің баюына, саяси көзқарасының, шығармашылық еркіндігі мен белсенділігінің, кәсіби іскерлігінің қалыптасуына жағдай жасау, мүмкіндік беру.

Бүгінгі қоғам – үздіксіз даму мен жаңашылдықтың қоғамы. Осы тұрғыда баланың болашағы мен біліміне және тәрбиесіне көңіл бөлмесе болмайды. Сол себепті ұстаздар қауымының алдына зор міндеттер жүктелен. Ұлт ұстазы, ағартушы, ғалым Ахмет Байтұрсынұлы: «Мектептің жаны – мұғалім. Мұғалім қандай болса, мектебі де сондай болмақшы, яғни мұғалім білімді болса, білген білімін басқаға үйрете білетін болса, ол мектептен балалар көбірек білім біліп шықпақшы. Солай болған соң, ең әуелі, мектепке керегі – білімді, педагогика, методикадан хабардар, оқыта білетін мұғалім», – деп мұғалім мамандығының маңыздылығын және жауапкершілігін айқындап берген.

Мұғалім тек білім ғана емес, ұлттық тәрбие де бере білу керек. Ол үшін мұғалімнің өзі де білімді әрі ұлттық тәрбиені бойына сіңірген заманауи маман болуы керек. Өйткені мұғалімға қарап оқушы бой түзейді. Оған қарап еліктейді. Қазіргі қоғамда жастар арасында батыстан кірген әдепсіз қылықтар мен теріс ағымдар кездесіп жатады. Ондай жастар уақыт өте келе имандылықтан да ада болып, елі тұрмақ ет жақынына да жақсылық істемейтін тасбауырға айналады. Қатігездікті қалай қалыптастырғанын байқамай, қоғам үшін өзінің жат элемент екенін де сезбей қалады.

Қазіргі қоғамда орын алып жатқан бұндай оқиғаның барлығы тәрбиеден. Осындай келеңсіз жағдайларға жол бермей, оның алдын алу үшін мұғалім – тек білім беретін тұлға ғана емес, ақылшы әрі жол сілтеп, бағыт беретін және инновациялық технологияларды жетік меңгерген кәсіби маман болуы қажет.

Дана Абай жақсы адамның сипатын былай деп айтып кеткен екен: «Адамның адамшылығы жақсы ата-анадан, жақсы ұстаздан, жақсы құрбыдан болады». Мұғалім ретінде өз басым үнемі ізденісте болуға тырысамын. Сабақ барысында жаңа әдістер мен тәсілдерді қолданып, оқушылардың білімін арттырып, танымын кеңейтуді көздеймін.

Дүйсенбаева Ләззат Оралбайқызы- қазақ тілі мен әдебиеті пәнінің мұғалімі, педагог -зерттеуші