Күздің бір күнінде жасы жеткен бір ғұлама ғалымның жанына ең озат шәкірті келіп:

-Айтыңызшы, ұстаз, өз іліміңіздің бізге қаншасын үйреттіңіз? – деп сұрайды. Ұстазы болса қолына жерден күзгі жапырақтарды уыстап алды да:

- Қалай ойлайсың? Мына орманда жапырақ көп пе, әлде менің уысымдағы жапырақ көп пе?- деп сұрады. Шәкірті ормандағы сарғайып түсіп жатқан сансыз жапырақтарға қарап тұрып:

- Әрине, ұстаз ормандағы жапырақ сіздің уысыңыздағымен салыстырғанда әлдеқайда көбірек,- деді.

-Менің сендерге айтып үлгергенім, уысымдағы бірнеше жапырақ қана, - деді ұстаз, - қалғанының барлығын сендерге өздерің ізденіп, еңбектеніп, ақылдарыңмен тануларың керек! – деді.

- Осының бәрін сіз неге ертерек айтпағансыз? – деді шәкірт.

-Себебі ол сендерге ешқандай да пайда бермес еді. Ілім дегенді адам өз басынан өткізіп барып жинайды. Сендер ғұмыр кешулерің керек. Ал сөз деген – бар-жоғы сыбдырлаған жапырақтардың шуы ғана! – деп сөзін аяқтады ұстаз.

1. Ұстаз сөзінің түйіні.

А. Саналы адам сағын сындырмас

Ә. Өнерлінің өрісі кең

Б. Өз ақылын шамалаған қор болмас

В. Ақыл жастан, асыл тастан

Г. Ізденген жетер мұратқа

2. Шәкіртіне берілген білімін салыстыра көрсеткен зат

А. Уыс

Ә. Таразы

Б. Шүберек

В. Жапырақ

Г. Орман

3. Шәкірттің ұстазына қойған алғашқы сұрағы

А. Ұстаз, өз іліміңіздің қаншасын бізге үйреттіңіз?

Ә. Уысыңызда қанша жапырақ бар

Б. Жапырақтың сарғайып түсуінің мәні неде?

В. Осының бәрін сіз неге ертерек айтпағансыз?

Г. Мына орманда жапырақ көп пе, әлде менің уысымдағы ма?

4. Ғұламаның берген ақылы

А. Жапырақтардың түр-түсін білу

Ә. Ұстазына көмектесу

Б. Ұстаздан білім алу, ақылын тыңдау

В. Өз бетімен іздену, еңбектену

Г. Өзіне адал дос іздеу

5. Ілім дегенді ...

А. Адам өз басынан өткізіп барып жинайды

Ә. Жапырақтардың шуы ғана

Б. Ақылмен тану

В. Уысымдағы бірнеше жапырақ

Г. Ормандағы жапырақтар