Білім беру саласы: «Коммуникация»
Бөлімі: «Сөйлеуді дамыту»
Тақырыбы: «Қыс қызығы»
Мақсаты: Қыс мезгілі туралы түсініктерін кеңейту. Мнемокесте арқылы тақпақ жаттатқызу, сөйлеу қабілеттерін дамыту. Өзіне тән ерекшеліктерін ажырата білуге, өз ойын толық жеткізе білуге үйрету. Қысқы ойындарға қажетті құралдарды атау. Табиғатты аялауға, әсемдікті сезініп, көре білуге тәрбиелеу.

Әдіс - тәсілдері: Әңгімелесу, түсіндіру, сұрақ – жауап, көрсету, ойын, сергіту сәті.

Көрнекілігі: Интерактивті тақта, суреттер, фетрдан жасалған көрнекіліктер.
Тәрбиешінің іс - әрекеті:

Шаттық шеңбер:
Арайлап таң атты,
Алтын сәуле таратты.
Жарқырайды күніміз,
Жарқырайды даламыз.
Қайырлы таң достарым,
Қайырлы таң қонақтар.

Тәрбиеші: Балалар мен сендерге жұмбақ жасырайын, шешуін таба аласыңдар ма?
Балалар: Әрине.
Тәрбиеші: Аяз қысып,
Өрнек сызып,
Терезені торлайды
Қар омбығып,
Бет домбығып, балдырғандар ойнайды.
Бүлдіршіндерім, айтыңдаршы, бұл қай кезде болады?

Балалар: Қыс мезгілінде.

Тәрбиеші: Ал қазір қай жыл мезгілі?

Балалар: Қыс мезгілі.

Ізденушілік кезең:

Тәрбиеші: Қазір, балалар, біз сендермен жыл мезгілдерін атап шығайық.

( Интербелсенді тақтамен жұмыс).

-жыл мезгілдерін сұрау.

-табиғаттың ерекшеліктерін атап өту.

-қысқы ойындар.

- қысқы киімдер.

- қысқы мерекелер.

Тәрбиеші : -Балалар, енді біз бір ойын ойнайық «Жыл мезгілдерінің ерекшеліктерін ата»

Тәрбиеші: Жақсы, балалар, қазір біз мнемокесте арқылы тақпақ жаттайық.

Хормен бірнеше рет қайталап айтқызу.

Бір топ бала далада,

Қардан соқты аққала.

Мұрны сәбіз үп-үшкір,

Көзі көмір қап-қара.

Сергіту сәті:

 Тәрбиеші: Қар жауады, аяз болып, боран соғады.
Ендеше, боран соққанын қимылмен қалай көрсетеміз?
( Балалар қолдарын жоғары көтеріп, гуілдейді)
Тәрбиеші: Қатты аяз болып, тоңғанда не істейміз?
(Қолдарын қусырап, аяқтарын топырлатады)
Тәрбиеші: Ал, күн шыққанда не істейсіңдер?
(Алақай, деп қолдарын көтереді)

Топпен жұмыс:

1. топ- қысқы ойындарды табу;

2 топ – қысқы киімдерді табу;

3 топ- қыс ерекшеліктерін табу.

Жеке-дара жұмыс:

«Аққала құрастыру»

Тәрбиеші: ойындарымызды ойнап болдық, енді тағы бір рет тақпақты қайталап шығайық.

Қорытынды кезең:

Тәрбиеші: - Неше жыл мезгілі бар?

Балалар: -4 мезгіл.

Тәрбиеші: -Қазір қай жыл мезгілі?

Балалар: -Қыс.

Тәрбиеші:- Қыста ауа райы қандай болады?

Балалар: -Күн аяз, қар жауады.

Тәрбиеші: -Қыста қандай ойындар ойнайсыңдар?

Балалар:- шаңғы, шана, коньки тебеді, қардан аққала жасайды.

Балаларды мақтау, мадақтау.