Елбасының елді елең еткізген, рухани серпіліс тудырған «Болашаққа бағдар: рухани жаңғыру» мақаласы қазақ елінің өткен тарихы мен бүгінгі күндері жеткен жетістіктеріне, әдеби-мәдени құндылықтарына қайта сараптау жүргізуге мүмкіндік берді. Кеңестік кезеңде ХІХ ғасырда өмір сүріп, соңына өшпес мұра, өлмес дүние қалдырған Дулат Бабатайұлы, Сүйінбай Аронұлы, Майлықожа Сұлтанқожаұлы сынды ақындар шығармашылығына біржақты көзқарас тұрғысынан қарады. Аталған ақындар шығармашылығындағы қайшылықты тұстарға көбірек көңіл бөліп, адам жанын байытатын, тыңдаған жұрттың жандүниесіне сәуле шашатын қуатты шығармаларына аса мән берілмей келді. Сондықтан да бүгінгідей «дүние дидары өзгеріп», еліміз өзінің өткен тарихы мен әдеби құндылықтарына жаңаша сипатта көңіл қойып жатқан тұста біз де осы дәуірде өмір сүрген алып ақындар шығармашылығына қайта сараптау жүргізуге бекіндік.

Елбасымыз Н.Ә.Назарбаев: «ХХ ғасырдағы батыстық жаңғыру үлгісінің бүгінгі заманның болмысына сай келмеуінің сыры неде? Меніңше, басты кемшілігі – олардың өздеріне ғана тән қалыбы мен тәжірибесін басқа халықтар мен өркениеттердің ерекшеліктерін ескермей, бәріне жаппай еріксіз таңуында. Әжептәуір жаңғырған қоғамның өзінің тамыры тарихының тереңінен бас­тау алатын рухани коды болады. Жаңа тұрпатты жаңғыруды ең басты шарты – сол ұлттық кодыңды сақтай білу. Онсыз жаңғыру дегеніңіз құр жаңғырыққа айналуы оп-оңай»,-деп айтқанындай, ХІХ ғасырда өмір сүріп, елдің елдігін, жердің тұтастығын, ұлттың тазалығын ойлаған Дулат, Сүйінбай, Майлықожа сынды ақындарымыздың шығармаларында қанша уақыт өтсе де ескірмейтін, өзінің өзектілігін жоймаған ұлттық құндылықтарымыз молынан сақталған [1,1].