Сыныптан тыс іс - шара

Мұғалім:

Өз-өзіне сенімді, ой-өрісінің тәуелсіздігімен ерекшеленетін, құндылықтарды бойына сіңіре білген, сыни тұрғыдан ойлана білетін тұлға тәрбиелеу НЗМ іс-тәжірбиесін тарату мақсатында №24 мектеп – интернатында «Шаңырақ» оқушылар қауымдастығы жұмыс жасайды.

Мектептегі «Шаңырақ» қауымдастығының мақсаты - бірыңғай топтар құру арқы-лы оқушыларды ауызбірлікке, біртұтастыққа бейімдеу, жоғары сынып пен төменгі сынып оқушылары арасында бауырмалдық, қамқорлық қарым-қатынас қалыптастыру.

Мұғалім:

«Бірлік» шаңырақ қауымдастығы 5 б және 7а,ә сыныптарынан құралған. Жоғарғы қазақ сынып оқушылары төменгі орыс сыныптағы балаларға қамқор болып, көмектеседі, осы арқылы көшбасшылық қасиеттері дами түседі, өзара сыйластық, жауапкершілік, кішіге қамқор болу сынды жоғары адами құндылықтар жүзеге асады.

Ынтымақтастық құндылықты тұлғаның бойына сіңіру мақсатындағы «Бір шаңы-рақ астында» жобасы аясындағы «Салт - дәстүрім – таусылмайтын байлығым» атты қазақ халқының дәстүрлерін дәріптеуге негізделген іс – шарамызды назарларыңызға ұсынамыз.

1 - жүргізуші:

Ата салтым – асыл мұрам, ардағым,
Бабалардың жалғастырар арманын.
Сан ғасырда қалпын бұзбас қадірім,
Өткенімді бүгінменен жалғадым.

2 - жүргізуші:

Қазағымның салт - дәстүрі жаңғырған,
Тәлімді ой сынағы, тәрбие көзі қалдырған.
Салт - дәстүрді ардақтайық, ағайын.
Қазақ атты үлкен, кіші, балдырған.

1 - жүргізуші:

Жиналыппыз сәтті күні бәріміз де,
Үлкен, кіші, жасымыз, кәріміз де.
Төрлетіңіз, қадірменді қонақтар,
Гүл - гүл жайнап мына біздің төрімізге.

2 - жүргізуші:

Өнерлі халық - өміршең халық, қазақтың әдет ғұрпына бағытталған «Салт – дәстүрім – таусылмайтын баылығым» атты тәрбие сағатымызды бастаймыз.

фонда: «Қазақтың салт - дәстүрлері»әні

1 - жүргізуші:

Шашу, шашу шашайық,
Ақ сандықты ашайық.
Бұл мереке, бұл тойда,
Керемет рәсім жасайық.

Бала:

Сүйінші, сүйінші, дүниеге сәби келді.!

Әжелер:

Ой айналайын балам, бұл қуанышты хабар ғой! Сүйінші сұрау шын қуаныштың белгісі. Қазақ сүйіншіден нені аяған, мінекей сүйіншіңді ала ғой.

1 - жүргізуші:

Ой қандай керемет, дүниеге бір қазақ келді десейші!. Балаға қандай ат қойсақ болады екен?

Қазақтың ғұрыптарының бірі «Ат қою» рәсіміне кезек берейік

«Балаға ат қою» рәсімі жасалады.

2 - жүргізуші:

Енді дүниеге келген баланы бесікке салуға әжелеріміз де дайын сияқты. Қызықты үзбей «Бесікке салу» рәсіміне кезек берген дұрыс сияқты, сен қалай ойлайсың?

«Бесікке салу» рәсімі жасалады.

1 - жүргізуші:

Халқымның қолөнері аса көркем,
Қуанады, сүйсінеді оны көрген.

1 - жүргізуші:

Қазақ халқының тұрмыс тіршілігіне бір сәт саяхат жасап қайтсақ қайтеді?!. Бүгінгі кеште ұйымдастырылған қолөнер бұйымдарын қарашы, қандай керемет! «Шешеден көріп тон пішер, әкеден көріп оқ жанар» демекші біздің сыныптың қыздары кесте тігіп, тоқыма тоқып, көрпе құрап отыр, ұлдарымыз болса қамшы өріп қызу жұмыс үстінде. Бұның өзі қазақтың тұрмысының тамаша көрінісі емес пе?!

2 - жүргізуші;

Айтпақшы біз атын қойған кешегі сәбиіміз бүгінде жүруге талпынып жүрген тәрізді. Бүгін әжелеріміз сол сәбидің тұсауын кеседі дейді.

«Тұсау кесу»рәсімі жасалады.

Әже:

Жолың болсын деселік,
Жолыңа нұр төселік.
Жарылқасын алдыңнан,
Тұсауды кесейік,
Күрмеуіңді шешейік.

(Сәбидің тұсауын ала жіппен кеседі.)

1 - жүргізуші:

Баталы құл арымас,
Батасыз құл жарымас.
Батаменен жер көгереді.
Баламызға аталарымыз батасын берсін....

2 - жүргізуші:

(Бата беріледі)
Қарашы, ана жақта да қазақ жастары уақыттарын қызықты өткізіп жатқан тәрізді. Сол жаққа барып қайтсақ қайтеді...

Қыздар бұл ойнап жатқан ойындарың қандай ойын, қалай аталады?

(Қыздар «Бес тас» ойынын түсіндіріп береді.)

1 - жүргізуші:

Жігіттеріміз де қызу ойынға кіріскен тәрізді, ал жігіттер қандай ойын ойнап жатсыңдар?

(Ұлдар «Асық» ойынын түсіндіреді.)

2 - жүргізуші:

Бүгінгі кешіміз қызықты өтуі үшін келесі кезекті танымдық ойынға берейік. Мына қоржында асықтар салынған. Ол асықтардың бетінде сан жазылған. Қоржыннан кез - келген бір асықты аласыңдар. Шыққан сол санға байланысты сұрақ қоямыз, кім

көп жауап береді екен.?

1 - жүргізуші:

Құрметті оқушылар, бүгінгі біздің сабағымыздың мақсаты - заман өзгерсе де ұлттық салт - дәстүріміздің көнермейтіндігін еске салып, ұлттық мұраны қайта жаңғырту. Бүгінгі тәрбие сағатымызда өздеріңіз куә болған дәстүрлерді көкейлеріңізге тоқып, саналарыңызға сіңіріп алсаңыздар артық болмас.

2 - жүргізуші:

«Тоқсан ауыз сөздің тобықтай түйіні бар»демекші, салтын сүйген әрбір жас ұрпақ болашақта халқын сүйетін, еліне адал қызмет ететін, тілінің, салт - дәстүрінің жанашыры болатындығына сенімдімін.
Еліміздің жарқын болашағы сіздердің қолдарыңызда, құрметті оқушылар!