Табиғаттың жандандыратын күші

Мақсаты: Оқушыларға табиғатты аялау керектігін түсіндіре отырып, Қиянат жасамау құндылығының мәнін ашу.

Міндеттері:

1. Білімділік: Оқушыларға табиғатқа ешқашан зиян келтірмеудің маңыздыдығын түсіндіру.

2. Дамытушылық: Оқушылар бойындағы табиғатға қамқорлық жасау қасиеттерін дамыту.

3. Тәрбиелік: Оқушыларды табиғат берген сыйына жауапкершілікпен қарауға тәрбиелеу.

Ресурстар:

(материалдар, дереккөздер)

1.bilim-all.kz

2.https://infourok.ru

https://angimeler.wordpress.com

Сабақтың барысы:

1. Ұйымдастыру кезеңі.

5. Т – ережесі:

1. Тәртіп.

2. Талап.

3. Тыныштық.

4. Тазалық.

5. Татулық.
   Балалар ережені есімізге түсіріп, сыныптың тәртібін сақтап, оқып - білуге талаптанып, тыныштықты орнатып, тазалықты сақтап, бүгінгі күнімізді татулықпен өткізейік.

Жағымды күйге келу.

«Сантики, Фантики, Лимпопо». Барлығы шеңбер бойымен тұрып, бір баланы таңдайды да бөлменің сыртына шығарады. Шеңбердегі балалардың ішінен бір баланы жүргізуші етіп сайлайды, ол шеңбердегі балаларға қозғалыстарды көрсетіп тұрады. Барлық ойыншылар жүргізушінің артынан көрсеткен қимылдарды қайталау керек. Қимылдарды қайталаған кезде жүргізушіге қарамай, білтіртпей жасау керек. Шеңбердегі балалар шапалақ ұрып, «САНТИКИ, ФАНТИКИ, ЛИМПОПО» деп айтып ойынды бастайды. Бөлме сыртында тұрған бала ойыншылардың дауыстарын естіп, бөлмеге кіреді де шеңбердің ортасына тұрып, кім жүргізуші екенін табу керек. Егер жүргізушіні тапса, жүргізуші есіктің сыртына шығады. Ойын сол ретімен жалғасып отырады.  

2. Үй тапсырмасы.

1. Келесі сабақ. №27 – сабақ, оқулық,139 бет «Көзата бұлағы» аңыз әңгімесін оқып келу.

Сұрақтар:

• Қазығұрт тауының етегінде қандай адам өмір сүрген?

• Оған неліктен адамдар ағылып келетін болған?

• Әулие мазарының жанында қандай ғажап оқиға болды?

• Бастауды неліктен шипалы дейді?

• Өзің «Бұлақтай таза болу» дегенді қалай түсінесің?Айтып бер.

3. Сабақтың дәйексөзі.

«Біз ата-бабамыздан табиғатты мұраға, ал болашақ ұрпақтан қарызға алдық»

Халық даналығы

Сұрақтар:

1. Табиғатқа қамқорлық дегенде нені түсінесіңдер?

2. Табиғатқа не үшін қамқорлық жасау қажет деп ойлайсыңдар?

3. Сендер табиғатқа қандай қамқорлық жасап көрдіңдер?

4. Дәйексөзден қандай ой түйдіңіз?

Біздің ата-бабамыз біздің жақсы өмір сүруіміз үшін табиғатты қорғап, күтіп-баптап, сақтап бізге жеткізді. Ал енді осы мұраны жоғалтып алмай өзімізден кейінгі болашақ ұрпаққа тапсыру біздің мойнымыздағы қарыз. Ол үшін өз ауылымыз бен қаламыздағы ағаш бұталарды кеспей, санын көбейтіп, көктем сайын ағаш егіп, су көздерін тазалап отыру, ауаны таза ұстау – біздің міндетіміз.

4. Оқиға айту (Мұғалім сыйы).

Бақтағы бақылау

Жәнібек «Құрылысшылар» бағына жақын бес қатарлы үйде тұрады. Мұның оған бір қолайлы жері: баққа волейбол, шахмат, қол добы, стол үстіндегі теннис, спорттың басқа да түрлерімен айналысатын шағын алаңдар бар. Жәнібек қолы бос кезде сонда барып жаттығады, кейде жай демалып қайтады.

Бақтың өне бойы жапырағы жайқалған жасыл терек, қалың қарағай, емен, шырша және басқа көрікті ағаштар. Олардың арасындағы алаңғыттар түкті кілем төсегендей көк майса. Серуендеуге, тынығуға таптырмайтын сая бақ. Сондықтан да мұнда келушілер көп.

Кешкілік Жәнібек кластас жолдасы Елемес екеуі осында демалып отырған. Серуенге шыққан адамдар арлы-берлі өтіп жатыр. Қайсы біреулер бұрылыста көк майсаны айналып өтудің орнына, оны таптап, тура тартып барады. Көк шөк әбден тапталып, әбден тақырға айналған.

Осыны байқап отырған Жәнібек орнынан тұрды да, жұрт таптап тастаған тақырға барып оның ортасына бормен үлкен сұрау белгісін қойды. Содан соң орнына келіп Елемес екеуі «енді қайтер екен» дегендей, айналма бұрышты қайтадан бақылады.

Серуендеушілер тақырдағы сұрау белгісіне тоқтайтын емес, бұрынғысынша көк майсаны таптап өтіп жатыр. Болмаған соң енді Елемес барып тақырға тағы бір сұрау белгісін қойды. Бірақ бұдан да нәтиже болмады. Көше тәртібін бұзуға дағдыланғандар көп екен, екі сұрау белгісін де елемей, бұрылыста көк майсаны кесіп өтуде...

Жәнібек алған беттен қайтпайтын қайсар бала болатын. Орнынан атып тұрды да, тақырдағы қос сұрау белгісін өшіріп, орнына үлкен әріптермен «Жол жоқ!» деп жазды және жанына «айқайлатып» леп белгісін қойды.

Мына бала не жазып жатыр деп тоқтаған адамдар оқуды оқыған соң мырс етіп күліп, көк майсаны көріне таптамай, асфальт жолмен айналып өте берді... Ал табиғатты қорғауға аз да болса үлес қосқан Жәнібек пен Елемес бақты бір айналып, үйлеріне беттеді.

Сұрақтар:

1. Жәнібек пен Елемес қандай дұрыс әрекет жасады?

2. Қай баланың бойында жақсы қасиеттер басым деп ойлайсыңдар?

3. Жәнібек табиғатқа қандай қамқорлық жасады?

4. Өздеріңнің табиғатқа жасаған қамқорлықтарың туралы әңгімелеп беріңдер.

М.Құрманалин

5. Шығармашылық жұмыс, топпен жұмыс.

1 – топ: «Күн»

2 – топ. «Су»

3 – топ: «Ауа»

Тапсырма: «Табиғат сұлулығы» тақырыбында сурет салу.

6. Топпен ән айту.

Көктем өрнегі

Өлеңін жазған Ермек Өтетілеуов

Әнін жазған Ибрагим Нүсіпбаев

Біздің ауыл тап-таза бұлағы да,

Ән салады майысып құрағы да.

Жаз жайлауға барамын демалыста

Асау тайдың ойнаймын құлағында.

Қайырмасы:

Біздің ауыл алма бақ,

Өрік, жүзім жетеді.

Сағынарым қайда да – Алатаудың етегі.

Сол ауылға жазда мен ораламын,

Сағынған соң құшағын жан ананың.

Бұлт ішінде жүрдім мен биік өрлеп,

Жас орманын жалықпай араладым.

Қайырмасы.

Біздің ауыл Алатау етегінде,

Құс боп ұшып мен оған жетем күнде.

Менің атам жүреді қойын бағып,

Ақ боз аты келеді жетегінде.

Қайырмасы.

7. Үй тапсырмасы.

1. №26 – сабақ. Дәптермен жұмыс. 6 – тапсырманы орындау.

2. Келесі сабақ. №27 – сабақ, «Тұзкөл» аңызын оқып келу

8. Сабақтың қорытынды сәті.

Тыныс алуға зейін қою.

Баяу музыка қойылады.

Мұғалім: Сіздерден аяқ-қолыңызды айқастырмай, түзу отыруыңызды өтінемін. Біз қазір тыныс алу жаттығуын жасаймыз. Тыныс алуға зейін қойған кезде, біздің ақылымыз дем алады. Ауаны ішке жұту кезінде тыныштық пен қуаныш қабылдаймыз. Демді сыртқа шығарған кезде өзіміздегі мазасыздықтарды сыртқа шығарамыз.

Кәне, дайындалайық, балалар. Көзімізді жұмамыз..., арқамызды тіктейміз..., қолдарыңды тізеге қоюға болады...

Д е м а л..... ш ы ғ а р... (жаймен 9-10 рет) немесе 1..................2 [3]. Рахмет!

Бүгінгі сабақтан игерген жақсы қасиеттерді есімізге түсіріп, жүрегімізге сақтайық.