Үй жануарлары

Күні: 11.02.2020 ж.

Сынып: 5 «А»

Сағат: 15⁰⁰

Өтілетін орны: Демалыс бөлмесі

Тақырыбы: Үй жануарлары.

Білімділік мақсаты: Балалардың үй жануарлары туралы білімдерін толықтыру. Олардың адамға пайдасы туралы түсінік беру.

Тәрбиелік мақсаты: Үй жануарларына қамқорлық танытып, бағалай білуге, оларды қорғауға, еңбексүйгіштікке тәрбиелеу.

Дамытушылық мақсаты: Сөздерді бір-бірімен дұрыс байланыстырып сөйлеуін қадағалау. Сұрақ-жауап арқылы баланың ой-өрісін дамытып, сөздік қорын жетілдіру.

Түзету мақсаты: Есте сақтау қабілеттерін арттыру. Дыбыстардың дұрыс айтылуын қадағалау.

Көрнекілігі: Үй жануарларының суреттері, қима қағаздар,

плакатқа жазылған сұрақтар, жұмбақтар.

Жаңа сөздер: Үй жануары, төрт түлік төл, үйшік, күзетеді.

Барысы:

Тәрбиеші: - Балалар, амандасамыз.

Тәрбиеші: - Балалар, ашық тәрбие сағатымыздың тақырыбын бірге оқимыз.

Оқушылар: - Үй жануарлары (бірге оқимыз).

Тәрбиеші: - Балалар, үй жануарларының ішіндегі төрт түлік – халқымыздың

байлығы да, берекесі осы малдар.

Тәрбиеші: - Балалар, үй жануарларына нелер жатады?

Оқушы: - Түйе, сиыр, жылқы, қой, ешкі, ит, мысық.

Тәрбиеші: - Ит пен мысық қайда тұрады?

Оқушы: - Ит үйдің сыртында үйшікте тұрады.

Ол үйді күзетеді.

Тәрбиеші: - Мысық қайда тұрады?

Оқушы: - Мысық адамдармен бірге үйде тұрады.

Тәрбиеші: - Балалар, осы жануарлардың аттарын атаңдар. (сурет)

Оқушы: - Түйе, сиыр, жылқы, қой, ешкі.

Тәрбиеші: - Балалар, төрт түліктің адамдарға қандай пайдасы бар?

Оқушы: - Етін жесе – тамақ, сүтін ішсе – сусын, жүні – кисе киім,

мінсе – көлік болған.

Тәрбиеші: - Дұрыс, балалар!

Тәрбиеші: - Балалар, енді төрт түлік туралы жұмбақтар шешеміз.

Тәрбиеші: Кезекті бір жануар

Үстінде екі тауы бар. (Түйе)

Тәрбиеші: Басында екі таяғы бар,

Төрт аяғы бар.

Бірақ тағы сақалы бар. (Ешкі)

Тәрбиеші: Екі айнасы бар,

Екі найзасы бар.

Төрт жылтырмағы бар,

Бір шыпыртқысы бар. (Сиыр)

Тәрбиеші: Еекуі елеңдеп келеді

Төртеуі төбелесіп келеді. (Жылқы)

Тәрбиеші: - Балалар, сендерді ата-әжелерің қандай сөзбен еркелетеді?

Оқушы: - Ботақаным, құлыным, қошақаным, қозым, кішкентай лағым.

Тәрбиеші: - Балалар, сендерді сүйкімді жануарлармен еркелетеді екен.

Тәрбиеші: - Балалар! Енді төрт түліктің өз төлдеріне арнаған тақпақтарын

айтыңдар.

Сиыр: Ақ бұзауым ұнайды,

«Мө-мө» деп сүт сұрайды.

Тұмсығын созып қарайды,

Тілімен мұрнын жалайды.

Қой: Кіп-кішкене момақан,

Қошақанды ұнатады.

Сүйеді апам қозым деп,

Қошақаным өзім деп.

Жылқы: Құлыншағым, құндызым,

Құлдырайды шабады.

Жылтылдаған жұлдызым,

Құстай қанат қағады.

Түйе: Айналайын, ботам,

Қандай күлте, жотаң.

Табандарың жалпақ,

Теріп жейсің жантақ.

Ешкі: Шөре-шөре лағым,

Тентек болма шырағым.

Секектеме деміңді ал,

Селтеңдемей құлағың.

Тәрбиеші: - Жарайсыңдар, балалар!

Тәрбиеші: - Балалар! Енді кестемен жұмыс жасаймыз.

Тәрбиеші: - Балалар! Өз үйлеріңде малдарға қалай қарайсыңдар?

Оқушы: - Малдарға шөп береміз, жем береміз, астын тазалаймыз,

су береміз.

Тәрбиеші: - Малды ұруға, тебуге болады ма?

Оқушы: - Төрт түлікті ұруға, тебуге болмайды.

Оларды бағалай білу керек. Қорғау керек.

Тәрбиеші: - Дұрыс, балалар!

Тәрбиеші: - Балалар! Енді сөйлемді жалғастырып жазамыз.

Оқушы: - Бие сүтінен жасалатын сусын - ... .

Түйе сүтінен жасалатын сусын - ... .

Ұйытылған сүт - ... .

Май, қаймақ алынады - ... .

Тәрбиеші: - Қане, балалар! Енді орнымыздан тұрып жылулық шеңберін

құрайық. Жылқы жылына арналған тілектерімізді айтайық.

Оқушы: Еліміз аман болсын!

Аспанымыз ашық болсын!

Деніміз сау болсын!

Ата-анамыз қасымызда болсын!

Жылқы жылы бақыт әкелсін!

Төрт түлігіміз түгел болсын!

Ақ мол болсын!

Бәріміз дос болайық!

Бәріміз аман болайық!

Тәрбиеші: - Балалар, тілектеріміз қабыл болсын!

Тәрбиеші: - Жарайсыңдар, балалар!

Қорытынды: - Бүгін ашық тәрбие сағатымызда қандай тақырып өттік?

Біз не істедік?

Не білдік?

Балалар: - Біз сөйледік, сұрақтарға жауап бердік, кестемен жұмыс

жасадық, жұмбақтар шештік, малдың төлдерін білдік.

білдік.

Тәрбиеші: - Дұрыс, жарайсыңдар!

Сендер бүгін жақсы сөйледіңдер.

Сендерге көп рахмет!

Балалар қоштасамыз.