. Халық пен тарих егіз төл ұғым, ұлттық тарихы жоқ халық болмайды. Бүгінде егеменді ел болған Қазақстан жаһандану дәуіріне аяқ басып, замана дәуірімен бірге ел, оның тарихы, жады қайта түлеп, танымы жаңа мазмұнға ие болуда. Еліміз өткен өміріндегі құндылықтарды түгендеп, ұлттық тарихын қайта қарап таразылау, оның сабақтары мен үлгілерін жұртшылыққа таныту мүмкіндігіне ие болып отыр. Ал осы құндылықтарымыз бен ұлттық тарихымызды жұртшылыққа танытар , болашаққа жеткізер тағылымды тәрбие орны - мұражай болып табылады.

Қазақстан Республикасының Тұңғыш Президенті Нұрсұлтан Назарбаевтің «Болашаққа бағдар: рухани жаңғыру» атты бағдарламалық мақаласы XXI ғасырдағы ұлттық сананың қалыптасуын, әбден таптауырын болған қасаң қағидалардан арылу қажеттігін, озық дәстүрлерді жаңғыртудың маңызды алғы шартына айналдыра білу керектігін алға тартқан ұлттық бағдарламаға айналып отыр. Біз тарпаң тарих талай қиындықтарды алдымызға тосып, асыл құндылықтарымызды тарих шаңына көмсе де, ұлттық болмысымыздан ажырамай, бірегейлігімізді сақтап келе жатқан халықпыз. Төл тарихымыз бен мәдениетімізді тереңірек білу – асылдарымызды ардақтау, өркениеттің жақсысын алу, жаманынан жирену жаһандану толқынында жұтылып кетпеудің бірден-бір жолы.