Ашық сабақ "Менің сыныбым-менің ұжымым" 4 сынып

Сабақ мақсаты: Адам өмірінде мақсатқа жету жолдарының маңыздылығын ұғындыра отырып, ақиқат құндылығының мәнін ашу.

Міндеттері:

1.Оқушыларға өміріндегі мақсатқа жету туралы айта келе, шындық қасиетінің мәнін ашу;

2.Оқушылардың бойында, төзімділік қасиетін дамыту;

3.Оқушыларды шындыққа, төзімділікке, өз-өзін сенімділікке

тәрбиелеу.

Ресурстар:(құралдар, мәлiметтер)

АКТ мүмкіндігі, оқулық, дәптер, музыка

Сабақ барысы

1.Ұйымдастыру кезеңi. Тыныштық сәті. (Баяу «Орманға саяхат» тақырыптық музыка қойылады)

Орманға саяхат.

Көзімізді жұмамыз, терең демаламыз, әр демімізбен өзімізді еркін, тыныштықта сезінеміз.

Қазір біз орманға дем алуға барамыз. Елестетіңіз, сыныптан шығып, дәлізден өтіп, далаға бет алдыңыз.

Таза ауаны сеземіз, самал ескен жылы жел мен күннің нұры ақырын ғана бетімізден өбеді, шашымызды сипайды.

Біз ақырын орманға қарай бет аламыз. Абай болайық, жердегі жәндіктерді аяғымызбен басып кетпеуге тырысайық. Бір минутқа тоқтап, айналамыздағы әсемдікке көз салайық. Құлпырып өскен гүлдердің иісі мұрынды жарады, қандай керемет иіс! Айналамыздағы әрбір әсемдікті көзімізден таса қылмай, ары қарай бет аламыз.

Орманның ішіне де келдік. Құстардың әсем әуені, шөптердің сыбдыры жан дүниемізді жаулап алғандай. Айналамызда түрлі ағаштар. Сол ағаштың ішінен бір қайыңды таңдап алыңыз. Бауырында отырып, біраз тыныстап алыңыз.

Мен бақыттымын, менің жан дүнием тыныш. Табиғат қандай тамаша! Мен табиғаттың бір бөлшегімін, менің табиғатқа зияным тимеуі керек, кез- келген уақытта мен осы ағаштың түбіне келіп дем аламын.

Енді орнымыздан ақырын тұрып, айналамызға тағы көз жібереміз. Келген ізімізбен, мектепке қарай аяңдаймыз. сыныпқа келіп өз орнымызға отырайық.

Тыныштық пен разылықты жүрегімізде сақтап, көзімізді ашамыз, бір-бірімізге қарап күлімсірейміз.

Тыныштық сәтінен алған әсерлеріңіз қандай?

5 Т-ны еске алу.

Тәртіп

Талап

Тыныштық

Тазалық

Татулық

Сабақ барысын талдау:

Үй тапсырмасын тексеру.

2.Үй тапсырмасын тексеру.

№3 сабақ

Асан мен Үсеннің бойындағы қасиеттерді оқыту. (1-2 оқушы)

3.Дәйексөз. Ұжымда болу-бақыт

Ә.Табылдиев

3.1.Дәйексөзді оқыту.

3.2. Дәйексөздің мағынасын ашу.

- Дәйексөздің мағынасын қалай түсінесіздер ?

3.3. Дәйексөзді дәптерге жатқа жазу.

4.Әңгімелеу.

Күмән

  Машқар Гумеров

Оқушылар соңғы сабаққа кіргенде, сыныптағы үлкен терезенің бір көзі сынғанын көрді. Кезекші Рақила болатын.

– Терезені Боранбай сындырды. Өз көзіммен көрдім,–деп айқайға басты ол.

Боранбай танып әлек. У-шу ұлғайып бара жатқанда, мұғалім кірді де, жағдайды білген соң:

– Сабақтан кейін сыныпта қалыңдар. Анықтаймыз. Ал қазір тынышталыңдар, сабақ бастаймыз,–деді.

Сынып ішіндегі мына у-шу сол айтыстың жалғасы еді. Мұғалім қағаздарын тастап, қайтып оралмақ. Істің ақиқатына жетудің орнына, салғыласа берсе, ұзақ отырып қалмай ма? Әтіргүлдің қарны ашты, үйіне қайтуға асықты. Тамағын кенеп, бар даусымен:

– Балалар! – деді. – Қазір апай келеді. Не айтамыз? Құр сарылып отыра береміз бе? Терезені кім сындырды? Айтсаңдаршы біреуің! Рақила, сен анық көрдің бе? Кім сындырды? Әйнек өз-өзінен сынбайды ғой.

Осы кезде көпшілік арасынан Дәуіт деген қара домалақ бала суырылып шығып:

– Сындырған мен! – деді.

Сыныптағылар аң-таң. Дәуіт ең момын бала еді.

– Өтірік! – деді Рақила қызараңдап.

– Түк те өтірік емес. Рас. Мен сындырдым.

– Ендеше неге бірден айтпадың? – деді Әтіргүл. – Жұртты осынша дауластырып қойғаның не?

– Е,маған сөз тиді ме? Өздерің ғой шуылдасып…

Онысы рас. Жұрт шуылдасып жатқанда, бұның өмірі үні шықпайтын.

Дәуіт терезені қалай сындырғанын айтып берді. Терезеде қалбалақтап жүрген әдемі көбелекті ұстаймын деп, байқамай әйнекті сындырып алыпты да, сасқанынан сыртқа зып беріпті. Бұл кезде сыныпта ешкім жоқ екен.

Балалардың барлығы Рақилаға қарады.

– Ау, кезекші! Бұл қалай? Боранбай сындырды деп ең? Оны қайдан көрдің? – деді екі-үш бала.

Рақила қысылғаннан жұртқа тура қарай алмады. Есікке тұра ұмтылды.

Мән-жай анықталған соң балалар көңілденіп, парталарына жайғасып отырды.

Көрмегенді көрдім деу – ең жаман әдет, әрі-беріден соң ол – жалақорлық.  Жиында басқасынан гөрі осы туралы көбірек сөз болды.

Әтіргүл ұстаз үстелінің қасында жалғыз өзі тұр еді. Жолдастары алдында тауы шағылған Рақилаға жаны ашып, есіктен көзін алмады. «Ұят-ай! Бұрын да осындай ұсақ-түйек оқиғалар болған. Бұдан былай балалар Рақиланың шын сөзіне де сенбей, күмәнданатын шығар-ау. Жолдастарының сеніміне кіру үшін оған қанша уақыт қажет боларын кім білсін!.»

 Сұрақтар:

1. Әңгімедегі оқиғадан Дәуіттің қандай жақсы қасиеттерін көруге болады?

2.Ұжымда бақыт болу үшін қандай қасиеттер керек.

3.Өз сыныптарыңда осыған ұқсас оқиғалар бола қалса, сендер не істеген болар едіңдер?

5.Шығармашылық іс-әрекет, топтық жұмыс.

5.1.Топқа бөлу. 2 сурет бойынша ( ұйымшыл сынып бойынша суреттер)

5,2 Дәптерде берілген бос жолдарға өз сыныбының үлгі етерлік жақтарын жазғызу.

Мұғалімнің қорытындысы.

6.Топпен ән айту. Дос болайық бәріміз

Сөзін жазған:Х. Талғаров

Әнін жазған: И.Нүсіпбаев

Әрқашан дос, біргеміз,

Ажырамас іргеміз.

Ілгері жүріңдер.

Достық жырын біліңдер,

Ту ғып ұстап бірлікті,

Еңбекті сүйіңдер!

Қ-сы

Дос болайық, бәріміз,

Жарасып тұр әніміз.

Тыныштықты сақтаймыз,

Атсын күліп таңымыз.

7.Үй тапсырмасы.

№4 Эссе .Ұжымда болу-бақыт. (6 сөйлем.)

№5 сабақ .29- беттегі өлеңді оқу «Бала арманы»

8.Сабақтың соңғы тыныштық сәті. Баяу музыка әуені ойнайды.

Балалар бүгінгі сабақтан алған жақсы қасиеттерімізді жүрегімізге сақтап қояйық. Бір-бірімізге жақсы ой тілеп, сенімділік қасиетін жүрегімізге орнатайық. Осымен сабағымыз аяқталды. Сау болыңыздар. Рахмет