Балалар Абай әлеміне қанып өссе

Қазақтың бас ақыны , хәкім Абайдың 175 жылдық торқалы тойы еліміздің төрт бұрышында түгел тойланып, қайталанбас тұлғаның шығармашылығын меңгеріп үйренуден сайысқа түсіп, өнер жарыстырып, бақ сынасып, баға жетпес - асыл сөздерін, дәмі кетпес - қара сөздерінен нәр алып, ақынның жақсы үлгі-өнегесін шашуда. Сондай айтулы бір іс-шара қалалық кешкі мектеп оқушылары арасында өтіп, өнер сайысында «Телғара», «Абай», «Ибраһим» топтары өзара бәсекеге түсті. Жарыстың «Өлең- сөздің патшасы, сөз сарасы» деген бірінші бөлімінде мәнерлеп оқудан Мерейдің өнері қонақтар мен қазылар алқасына қол соқтырса, «Сен білесің бе?» тақырыбында өткен ақын өмірі мен шығармашылығы негізінде құрылған сұрақтарға берілген көптеген оқушылардың жауабы мектеп ұстаздарының мерейін өсірді. Ақынның аудармалары бойынша өзге ұлт өкілдерінің дайындығы басым болды. Соңғы « Сөз тапқанға қолқа жоқ» кезеңінде ақынның бір өлеңінің бір ғана тармағы оқылса, бәсекелестер жалғасын оқып, ақын өлеңдерін жатқа еркін меңгеру біліктілігінің көрігін қыздыра түсті

Бұл бәсекеге қалалық білім бөлімі ардагерлері атынан келген қонақ Мылтықбай Мұстафаұлы кештің тартысты әрі мазмұнды болғанына, оқушылардың белсене қатысқанына куә болды және әділ қазылар алқасының төрайымы, мектеп директоры Абашова Айнұр да кеш соңында бүгінгі сайыс - білім-өнер, шығармашылық пен ізденістің нақты көрінісі деп жоғары бағалады, сондай-ақ мектептің ардагер ұстазы Совет Ризимов да Абай шығармаларын насихаттау, ақынның хадистермен көмкерілген иманигүлін шашқан бәсеке өз мақсатына жетті және бұл тақырып әлі жалғасын табады деген сенім білдірді. Әрине, жас жеткіншектерге берілген жақсы тәрбие ғана мәңгілік елдің бәсекеге қабілетті, білімді, елімздің гүлденуі мен өркендеуіне өз үлесін қосатын, ұлы мақсаттар үшін талмай ізденіп, биік белестерді бағындыруға талпынатын ұрпағын тәрбиелеуге бастары даусыз, әрі кешкі мектеп жағдайында өнерге, еңбкке баулу имандылыққа апарар деген сенімдеміз