«Бауырсақ» ертегісі

/Ортаңғы топ/

Сабақтың тақырыбы: Ұннан жасалған тағам бауырсақты үлгіге ала отырып, жеңіл және ритмикалық жүгіруге үйрету, доптан секіру дағдыларын бекіту, секіргенде тізесін бүге білу. Еңбекке баулу және нанды құрметтеуге тәрбиелеу, тілді дамыту жұмыстарын жалғастыру.

Қажетті құралдар: Бала санына қарай доптар, құрсау, секіргіш, 3 гимнастикалық ұзын орындық, «бауырсақ».

Сабақтың барысы:

І бөлім

/Домалап залға «бауырсақ» кіреді, артынан тәрбиеші кіреді/

-Ой, балалар, «бауырсақ» сендерге домалап келе жатыр. Ол сендермен бірге дене шынықтыру сабағына қатысқысы келіп тұр, өсіп, денем шынықса екен дейді, рұқсат етесіңдер ме?

Біздер бүгін дене шынықтыру сабағында «Бауырсақ» ертегісіне саяхат жасаймыз.

Тәрбиеші: Енді шеңбер жасап жүреміз.

1. Қолды белімізге қойып, кеудені тік ұстап аяқтың ұшымен жүреміз.

2. Қолымызды желкемізге қойып, кеудені тік ұстап өкшемен жүреміз.

3. Қолымызды белімізге қойып, табанның ішкі қырымен, сыртқы қырымен жүреміз.

4. Қолды жанымызға қойып, тез-тез жүреміз.

5. Қолды белімізге қойып, «аттар» жүрісін саламыз.

6. Ақырын жүгіру, жылдам жүгіру, ақырын жүгіру.

7. Қолды жоғары көтеріп «ап» деп демді ішке тартып, «уп» деп шығарамыз. Қолымызды түсіреміз.

Доптарды алып балалар шеңберге тұрады.

ІІ бөлім Жалпы дамыту жаттығулары /доппен/

1. Ертеде шал мен кемпір өзен жағасында тұрыпты, үйлері ағаштан жасалған екен.

Н.т:-тік тұру, допты арқасына артында ұстау, оңға, солға еңкейту.

2. Олар қаймаққа иленген бауырсақты жақсы көрген.

Н.т:-жартылай отыру, арқасындағы допты бір қолдан екінші қолға домалату.

3. Әженің күші келмесе де, ол қамыр илеген.

Н.т:-тік тұру, отыру-доп алға.

4. Ал әженің немересі ыстық бауырсақты қолдарында домалатқан.

Н.т:-тізерлеп тұрып, доп еденде, отыру, допты қол арасында домалату. Алға, артқа, солға, оңға.

5. Тәтті де емес, ащы да емес, теп-тегіс болып шықты.

Н.т:-отыру, аяқты жанына жайып қою, доп төменде.

Допты оңға қою-алға еңкею,

Допты солға қою-алға еңкею.

6. Дөп-дөңгелек, тәп-тәтті, жеуге де қимайсың.

Допты жоғарыға лақтыру және ұстап алу.

7. Сұр тышқан жүгірді, ой, бауырсақтың иісі қандай. Тышқанға да бір үзім берейік.

Н.т:-тік тұру, доп еденде, допты айналып жүгіру, бір орында жүру.

Негізгі қимылдар:

1. «Бауырсақ» көпірдің үстімен жүрді, ойында дым жоқ. «Бауырсақтың» жүрмейтін жері жоқ.

«Көпірдің үстімен»-ұзын орындықтың үстімен допты домалатып жүру.

2. «Бауырсақ» бір жерде тұра алмайды, домалауға шаршамайды, орманға да домалап кетуі мүмкін, оны түлкі жеп қоюы мүмкін. Кәне, мына құрсау «бауырсақ» болады, «Тығылыспақ» құрсауға жанымен кіру.

Қимылды ойын: «Қу түлкі» қимылды ойыны.

Шарты: Тәрбиеші бір баланы түлкі қылып сайлап алады, ойын 3 рет ойналады, «Қу түлкі қайдасың?» Түлкі ортаға шығып «Мен мұндамын» дейді, балалар жан-жаққа қашады.

Жай қимылды ойын: «Кім шеңбер бойында жүріп, бауырсақты табады?» Шарты: Тығылып қалған бауырсақты табу керек.

Сабақты қорытындылау, балаларды мадақтау.