Жыр алыбы-Жамбыл

Биыл- жыр алыбы Жамбыл Жабаевтың туғанына 175 жыл. Жамбыл Жабаев 1846 жылғы ақпан айының 28-і күні Жамбыл облысындағы Жамбыл тауының етегінде дүниеге келген. Ол өзінің ғасырға жуық ғұмырында тау мен даланы жырлады. Поэзия əлеміндегі туған халқының мақтанышы, əлемдік деңгейдегі жыр алыбына айналды. Оның ақыл-ойға, парасатқа, терең тарихқа, мөлдір сырға, нəзік сезімге, бай образға толы поэзиясы өлеңге құштар, өнерсүйер əрбір жанды сүйсінтті. Жамбыл Жабаев 1945 жылғы мауысым айының 22-інде Алматы облысының Ұзынағаш елді мекенінде 99 жасында дүниеден өтті.

Қазақ поэзиясының дүлдүліне айналған, даналығымен әлемге танылған, қазақ халқының рухани көсемі Жамбылдың жалынды жырларын дәріптеу, ақындық тұлғасын таныту жұмысы кітапханада кеңінен жалғасуда. Атап айтқанда, «Жыр патшалығының алыбы» тақырыбындағы виртуалды кітап көрмесі әлеуметтік желіде ұсынылса, «Қалалық қазақ саңыраулар қоғамы мәдениет Үйі» КММ мекемесінде ұйымдастырылған Жамбыл Жабаевтың 175 жылдығына орай «Жыр алыбы - Жамбыл» тақырыбындағы танымдық сағатына «Жыр патшалығының алыбы» атты кітап көрмесі ұйымдастырылып, оқырмандар назарына ұсынылды.

Ұлы Отан соғысы кезінде Жамбыл өлеңдері қазақ даласынан бастау алып, күллі майданды шарлап, қаншама жас өрендерге рух, жалын, жігер бергені сөзсіз. Бізге танысы, жатталған жырдың бірі – "Ленинградтық өренім" жыры. Өлең тарихы белгілі. Ленинградты қорғаушы бар майдангерлердің құлағында радиодан жатталып, сұрапыл соғыс жылдарындағы ауыр күндерде әр жауынгерге дем берді. Оның рухты өлеңі тек Ленинградтық өрендерді ғана емес, майдан шебіндегі қан жұтқан қаншама сарбазға күш-қуат бере білді. Биыл "Ленинградтық өренім" жырына 80 жыл. Осыған орай, кітапхананың инстаграм парақшасында поэзиялық слэм оқырмандар назарына ұсынылды. Слэм барысында "Дастан ата", "Өлеңдер.Айтыстар.Дастандар", "Жамбыл әлемі", "Жамбыл бейнелеу өнерінде", "ЖАМБЫЛ энциклопедия", "Жамбыл Жабаев", "Халық- менің мың атым" атты әдеби кітаптар желі пайдаланушыларға ұсынылды.

Халықтық жырдың негізінде немесе жыраулар поэзиясының үлгісінде бүгінгі мен өткенді сабақтастыра жырлайтын ақындар сол кезеңде жоқтың қасы болатын. Жамбыл сол үрдісті қалыптастыра білді. Ол сонысымен де қымбат.

Жамбыл Жабаевтың 175 жылдық мерейтойына орай кітапханада әлі де көптеген шаралар ұйымдастырылады. Рухани мұралар қатарындағы Жамбыл жырлары ұрпақтың санасында өшпек емес.

Ләззат Қобландина

Ақтөбе қаласы,

№6 Қарғалы селолық «модельді» кітапхананың меңгерушісі