Эссе

Мектеп жасына дейінгі балаларды дамыту мен тәрбиелеудегі заманауи педагогтің рөлі.

«Ақырын жүріп, анық бас,

Еңбегің кетпес далаға ,

Ұстаздық қылған жалықпас,

Үйретуден балаға» – деп Абай Құнанбайұлының қара сөзінен бастағым келеді. Ұстаздық ұлы жол, жауапкершілігі мол, әрі ізденісті жиі талап ететін, мұнымен қатар жас ұрпақты ізгілікке баулап, жақсылыққа тәрбиелейді. Ұстаз дегенде ең бірінші көпшіліктің ойына тек мектеп мұғалімдері ойға келіп жатады. Бірақ мен балабақша тәрбиешілеріне тоқталып өткім келеді. Ең бірінші баланың ортаға қалыптасып бейімделуіне септігін тигізіп мектеп қабырғасына дейінгі дайындықты беретін дәл осы балабақша. Балабақшаның қазанында қайнап тәрбиеші болып еңбек етіп келгеніме 16 жылдың төбесі болып қалды. Үнемі өзбетінше еңбектену, өзіндік өсуге ұмытылу, өзін-өзі тәрбиелеу, білімімді ұштау менің мамандығымның бір бөлігі.

Әрине XXI-ғасыр –саналы тәрбиемен сапалы білім ғасыры. Балабақшадағы әрбір бүлдіршінге дұрыс тәрбиемен жан-жақты білім беру-заманауи педагогтың бірден –бір міндеті. Балабақша табалдырығын алғаш аттаған бүлдіршін ашылмаған кітаппен тең. Не берсең соны қабылдайды, не айтсаңыз ол әрекетті бұлжытпай орындайды. Тәрбие тал бесіктен басталады. Баланың еңбекқор, ақылды, тәрбиелі болып өсуіне ата-анасы жауапты. Ал тәрбиеге келетін болсақ қазақ халқы баланы, жастан емес-ау бесіктен, тіпті ана құрсағынан бастап тәрбиелеу керек –деп өсиет қалдырған. Әрине баланың түп қазығы алтын ұясы- отбасы. Сондай-ақ балалардың қиялына қанат бітіріп, тіл байлықтарының молаюына тәрбиешілердің де сіңірер еңбегі мол.

Жұмыс уақыты басталған сәттен бастап бүлдіршіндерімді күліп, құшақ жая қарсы аламын. Әр сабағымды баланың өз тілінде, өзіне қызықтырар ойын түрлерімен өткізіп әр баланы қайрымдылыққа, ізгілікке баулып, оның тәрбиесіне үлес қосамын. Мұнымен қатар, күнделікті ұйымдастырылған оқу қызметін ойын түрінде қызықты өту үшін , әртүрлі әдіс тәсіл пайдаланып балалардың зейіні мен қызығушылығын арттырамын. Әр ойынның өз мәнінде өрбуі үшін, оған қажетті атребуттар, ойыншықтар дайындаймын. Бұл еңбекпен, табандылықты талап ететіні сөзсіз.

Жалпы тәрбиеші жұмысы қиялға ерік беріп, жан-жақты ізденіп, шабыттанып жауапкершілікті талап ететін мамандық. Жалпы бала жанының бағбаны болу- асқан жауапкершілікпен шыдамдылықты талап етеді. Өйткені, бала-пәк, бала-тап-таза мөлдір бұлақтың бастауы. Бала біздің болашағымыз. Сол балаға жүйелі білім беріп, ынта-ықыласын дұрыс бағыттау, қабілет –қасиеттерін дамытуды балабақшадан бастауымыз керек. Соныдықтанда мен өз мамандығымды сүйгендіктен, одан ләззат аламын бақыт табамын.