Талаптыға нұр жауар

Сабақ мақсаты:

Дұрыс әрекет құндылығын негізге ала отырып, оқушыларды жақсылыққа талаптандыру туралы түсініктерін кеңейту.

Міндеттері:

Оқушыларға сыпайылық, талаптанудың адам өміріндегі маңыздылығын ұғындыру;

Оқушылардың бойына шыдамдылық, сыпайылық қасиеттерін дамыту;

Оқушыларды шыдамдылыққа, табанды болуға тәрбиелеу.

Ресурстар:

(АКТ,оқулық, дәптер, ватман,маркер,сөздержазылған қима қағаздар,суреттер,желім, қайшы)

Сабақ барысы:

1.Ұйымдастыру кезеңi. Тыныштық сәті. Нұрға бөлену.(баяу әуен қойылады)

Нұрға бөлену

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын таза, әсем гүл сіздің әр ойыңызды, әр сезіміңізді, эмоцияңызды, тілек қалауыңызды шайып, жүрегіңіздің қауызын ашты.

Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Ойша осы нұрды қолдарыңызға бағыттаңыз. Сіздің қолдарыңыз нұрға бөленіп, сәуле шашуда. Қолымыз тек жақсы, тек ізгі істерді істейді және баршаға көмектеседі.

Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады.Олар нұр мен махаббат құралына айналды.

Одан әрі Нұр сіздің аузыңызға, тіліңізге тарады.Тіліңіз тек шындықты және жақсы, ізгі сөздер ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді.

Нұр көзімізге де жетті. Көзіміз тек жақсыға қарап, бәрінен жақсылықты ғана көреді.Сіздің басыңыз түгелдей нұрға бөленіп, басыңызға тек ізгі, сәулелі ой келеді.

Нұр бірте-бірте қарқынды және шұғылана бастайды, сіздің денеңізден шығып, жан-жағыңызға сәуле шашады. Осы нұрды туысқандарыңызға,мұғалімдеріңізге,достарыңызға,

таныстарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз.Олардың да жүрегі нұрға толсын.

Осы Нұр бүкіл әлемге: барлық адамдарға, жан- жануарларға, өсімдіктерге, тірі жанға таралсын... Ғаламның барлық түкпір-түкпіріне нұр бағыттаңыз.

Ойша айтыңыз: «Мен Нұрлымын...Нұр менің ішімде...

Мен - Нұрмын »

Осындай Нұр, Махаббат және Тыныштық күйінде отыра тұрыңыз...

Енді осы Нұрды жүрегіңізге орналастырыңыз. Нұрға толы бүкіл әлем сіздің жүрегіңізде.Оны осындай әсем қалыпта сақтаңыз.

Ойша нұрға бөленгеннен кейін жайымен көзіңізді ашуға болады.Рахмет!

5 Т-ны еске алу.

Тәртіп

Талап

Тыныштық

Тазалық

Татулық

2.Үй тапсырмасын тексеру: сабақ №16, 82 бет,

Ө Ақыпбеков «Өзіңді тану» өлеңін мәнерлеп оқу.

(2-3 оқушыға оқыту)

Бұл өлеңнен қандай жақсы қасиеттерді ойларыңа түйдіңдер?

Сабақ барысын талдау:

3.Дәйексөз. Талаптан да білім мен өнер үйрен,

Білімсіз, өнерсіз болады ақыл тұл.

Ш. Құдайбердіұлы

3.1. Дәйексөзді хормен айтқызу.

3.2. Дәйексөздің мағынасын ашу.

-Балалар, сендер осы дәйексөзді қалай түсінесіңдер?

3.3. Дәптерге дәйексөзді жатқа жазғызу.

4.Әңгімелеу. Қанат пен Жанат Б. Әділов

Жанат үшіншіге өтті. Қанат біріншіні бітірді. Екеуінің мінезі екі басқа. Жанат - көрсеқызар, ұшқалақтау да, Қанат - ойлы, салмақты. Ауылдағы атасының үйіне қыдырып келген.

Бір күні қонақ келді. Қанжығасына бөктерген дорбасы бар. Шоқша сақалды. Атасы қуана қарсы алды, құшақтасып көрісті.

Қонақ атай әзілкеш екен.

- Көрмегелі көп айдың жүзі болды. Аман-есен жүрсің бе, Баршын келін? - деп, үйге әндете кірді.

Баршын күле жүріп, төрге көрпе төседі. Атасы Қанат пен Жанатты шақырды:

- Дәулет жыршы аталарың - мына кісі. Сәлем беріңдер.

Екеуі қос қолдап сәлемдесті.

- Енді Тілепбай ағаларыңды шақырып келіңдер. Әп-сәтте үй іші адамға толды. Ақсакал әңгіме бас-

тады. Ел ұйып тыңдап отыр. Әншейінде «аяқтыға жол, ауыздыға сөз бермейтін» Әубәкір қария да тым-тырыс. Сирек сақалын тарамыс саусақтарымен сипап қойып, ойлана құлақ тосады.

Ет те желінді. Шай да ішілді. Жанат қолға су құйды.

Өркенің өссін, балам! Қатарыңнан кем болма! -деді атай. Жанаттың іші жылып сала берді.

Ендігі кезекті ән-жырға берейік, - деді Әубәкір шал. Неге екенін кім білсін, үні бәсеңдеу.

Жыршы асыкпай домбырасын қорабынан суырды, құлақ күйін келтірді. Үй ішін әсем дауыс, саз ырғағы кернеді.

- О, бәрекелді! - десті шалдар. Әжейлер жаулық-тарының ұшымен көздерін сүртті. Ән де, күй де көпке созылды. Жиналғандар таң ата тарасты.

Ертеңіне қонақ аттанып кетті. Жанат пен Қанат та атасымен бірге ұзатып салды.

- Үлкен жігіт болыңдар! - деді қонақ.

Жолда келе жатып Жанат атасына өтініш айтты:

Ата, маған домбыра алып берші. Атасы мұртыңан күлді.

Жарайды, балам.

Айтқандай-ақ ертесіне су жаңа домбыра әкеп берді.

- Шертіп көрейінші, - деп, Қанат қиылса да, ұстатпады. Өзі бар өнерін салып бақты. Сөйтсе де, домбыра дегеніне көнер емес. Ыңылдап шертіп еді, үні қосылмады. Жанаттың ызасы келді.

- Мә, сен-ақ шертші, - деп, інісіне қарай лақтырып жіберді. Қағып алған Қанат домбыраны қолтықтап, тысқа ата жөнелді. Жанаттың домбыраға көнілі қалды. Қолына ұстамай қойды.

Арада біраз күн өткен. Бірде үй ішінен күмбірлеген домбыра даусы естілді. Ішке енсе, інісі! Мұны байқар емес. Атасы да ұйып қалған, екі көзі Қанаттың нәзік саусақтарында. Елтіп отыр. Күй бітті.

Кім үйретті? - деді, Жанат жақын келіп, қызыққанын жасыра алмай.

Ешкім де... Өзім... - деді Қанат жай ғана. Жанат сенбеді.

- Балам, - деді атасы сонда, - «Талаптыға нұр жа уар» деген. Талаптансаң, алмайтын асу жоқ, біліп қой!

Жанат ұялғаннан қызарып кетті.

Сұрақтар:

4.1.Атасының үйіне келген қонақ кім еді? 
4.2. Қанат домбыраны үйренуге қалай талаптанды? 
4.3. «Талаптыға нұр жауар» деген сөздің мағынасын қалай түсінесіңдер? 
4.4. Сен Жанаттың орнында болсаң не істер едің ?

5.Шығармашылық іс-әрекет, топтық жұмыс.Тапсырма.

Топқа бөлу(сыйластық, талаптану сөздері жазылған қима қағаздар арқылы топқа бөлінеді)

1-топ - Эссе жазу. «Атамның өсиеттін тыңдап өсемін»

3-топ - Сахналық көрініс. «Қанат пен Жанат» әіңгімесіндегі кейіпкерлердің рөліне еніп, дұрыс әрекет жасау.

Тапсырманы қортындылау

6.Топпен ән айту. Мен талапты баламын Сөзі: Б. Исаевтікі

Әні: А. Асановтікі

Ойнап бал - бұл жанамын, Кітап оқи аламын.

Әке сөзін тыңдайтын Мен талапты баламын.

Талпынамын, тойлаймын,Талабымды жоймаймын.

Ұлы мақсат шыңына,Шықпай әсте қоймаймын.

Есейемін толамын,Қиға ұшып қонамын.

Ойлаумұрат бүгіннен,Өскенде кім боламын.

Адал ұлмын халқыма,Адал болам антыма.

Кім болсам да , елімніңДақ салмаймын даңқыңа!

7.Үй тапсырмасы

Сабақ №17, Дәптермен жұмыс 24 бет орындау.

Сабақ №18, 91 бет С. Сұлтанқұлованың «Бүлдіршіндер әні» өлеңін оқып келу.

8. Сабақтың соңғы тыныштық сәті

Енді, бүгінгі өткен сабағымыздан нені түсіндік, қандай жақсы әсер алдық? Бүгінгі сабағымызға сүйене отырып, көз алдарыңа өнерге, білімге деген балалардың талпынысын, отбасындағы сыйластық, тіл алғаштық қасиеттерін жүрегімізде сақтайық.