Құстардың көзі үлкен, өте жақсы көреді. Көздің айналасында қабағы бар. Күндізгі жыртқыш құстар мен түнде белсенді тіршілік ететін үкі, жапалақ, т.б. құстардың көзі өткір, заттың түсін де ажыратады. Есту мүшесі де жақсы жетілген. Құстарда есту мүшесі ішкі және ортаңғы құлақтан тұрады (бұл жағынан жорғалаушыларға ұқсас). Құстардың құлағы өте нәзік дыбыс тербелістерін қабылдайды. Иіс сезу мүшесі құстарда нашар дамыған. Тек кейбір құстарда ғана (дауылпаздар, киви т.б.) дамыған. Олар қорегін иісі арқылы іздеп табады.

Құстардың жамбасқа жақын орналасқан екі бүйрегі жақсы жетілген. Ол зат алмасудың қарқынды жүруіне тікелей байланысты. Зәр заттарының құрамында су аз болады. Ұшуға бейімделуіне сәйкес құстарда қуық болмайды. Бүйректе түзілген зәр қышқылы екі несепағар түтігімен – клоакаға, одан нәжіспен бірге саңғырық түрінде сыртқа тез шығарылады.

Құстар – дара жынысты, іштей ұрықтанады. Құстар іштей ұрықтанып, тек ұрықтанған жұмыртқа арқылы көбейеді. Жұмыртқадан балапанның шығуы үшін белгілі температура, ылғалдылық қажет. Тауық жұмыртқасынан 21 тәуліктен соң балапан шығады. (143 сөз)

6. Құстарда не болмайтынын көрсетіңіз.

А) Есту мүшесі

В) Иіс сезу мүшесі

С) Бүйрек

D) Өт

Е) Қуық

7. Тауық жұмыртқасынан неше тәуліктен соң балапан шығатынын белгілеңіз.

А) 30 тәуліктен соң

В) 1 тәуліктен соң

С) 21 тәуліктен соң

D) 27 тәуліктен соң

Е) 9 тәуліктен соң

8. Киви құсы азығын қалай табатынын көрсетіңіз.

А) Құлақ арқылы

В) Көз арқылы

С) Тұмсық арқылы

D) Аяқ арқылы

Е) Дұрыс жауабы жоқ

9. Мәтінде қандай дерек берілмегенін айтыңыз.

А) Үкі, жапалақтың көзі өткір, зат түсін тез ажыратады.

В) Жұмыртқадан балапанның шығуы үшін ылғалдылық қажет.

С) Құстардың екі бүйрегі жақсы жетілген.

D) Иіс сезу мүшесі құстарда нашар дамыған.

Е) Ұшуға бейімделуіне сәйкес құстарда өт болмайды.

10. Мәтіннің стилін табыңыз.

А) Көркем әдебиет стилі

В) Публицистикалық стиль

С) Ғылыми стиль

D) Ресми іс-қағаздар стилі

Е) Ауызекі сөйлеу стилі