Қазіргі қоғамның қарқынды дамуы, цифрлық технологиялардың кеңінен енуі және еңбек нарығындағы өзгерістер білім беру жүйесіне жаңа талаптар қойып отыр. Бүгінгі мектеп түлегі тек теориялық біліммен ғана шектелмей, өмірлік жағдаяттарда тиімді шешім қабылдай алатын, логикалық ойлайтын, бәсекеге қабілетті тұлға болуы тиіс. Осы тұрғыдан алғанда математикалық ойлауды дамыту – заманауи білім берудің негізгі бағыттарының бірі. Математикалық ойлау – талдау, салыстыру, жалпылау, дәлелдеу, жүйелеу сияқты интеллектуалдық әрекеттерді қамтитын күрделі үдеріс. Ол оқушының сыни көзқарасын қалыптастырып, ақпаратты құрылымдауға және нақты қорытынды жасауға үйретеді. 9-сынып кезеңі – оқушының болашақ кәсіби бағытын айқындай бастайтын маңызды саты. Сондықтан осы кезеңде математикалық білімді кәсіби бағдармен ұштастыру ерекше мәнге ие.

Жаңартылған білім беру мазмұны оқушының пәндік білімін өмірлік тәжірибемен байланыстыра отырып қалыптастыруды көздейді. Осы талапқа сәйкес 9-сыныпта жүзеге асырылған «Болашаққа бағдар: математикалық ойлау мен кәсіби даму» авторлық бағдарламасы математикалық білімді кәсіби бағдармен ұштастыруға бағытталды. Бағдарлама бір оқу жылы көлемінде факультативтік курс ретінде жүргізілді. Сабақ барысында кәсіби бағытталған есептер, жобалық тапсырмалар және зерттеу жұмыстары қолданылды. Оқушылар экономист, инженер, ІТ маманы, статистик сияқты мамандықтарға қатысты практикалық есептер орындады.