1-сынып бойынша кездесетін қиындықтар туралы ақпарат

1-сыныпта оқушыларда жиі кездесетін қиындықтар бірнеше бағытта байқалады:

1. Оқу үдерісіндегі қиындықтар

1-сынып оқушыларының оқу әрекетінде келесі мәселелер жиі кездеседі:

• Оқу мен жазуды меңгерудің баяулығы, әріптерді тану және дыбыстарды қосып оқуда қиналу;

• Қолдың ұсақ моторикасының жеткіліксіз дамуы. Бұл сурет салуда, жапсыру мен қию жұмыстарында қайшыны дұрыс ұстай алмауы арқылы көрінеді;

• Сыныптағы оқушылардың жас ерекшеліктерінің әртүрлілігі (5,5 жастан 7 жасқа дейін). Бұл оқу қарқынының тең болмауына, кейбір оқушылардың тез шаршауына немесе тапсырманы қабылдауда артта қалуына әкеледі.

• Қыркүйек айында сыныптың тең жартысында «КЕҢІСТІК КӨРУ» нашар дамыған. (Бала-бақшадан бастап қалыптасады.)

2. Тілдік қиындықтар

Кейбір оқушыларда сөйлеу және тілдік даму деңгейінің жеткіліксіздігі байқалады:

• Сөздік қорының аздығы, күнделікті қарапайым сөйлеу нормаларының (мысалы, «сіз» деп сөйлеу мәдениетінің) отбасында қалыптаспауы;

• Өз ойын толық, жүйелі түрде жеткізе алмау;

• Дыбыстарды дұрыс айта алмау, сөйлеу кемшіліктерінің (логопедиялық мәселелердің) болуы.

3. Отбасылық факторлар

Оқушының оқу жетістігіне отбасындағы жағдай тікелей әсер етеді:

• Үйде оқу режимінің болмауы, үй тапсырмасының жүйесіз орындалуы;

• Балаға ата-ана тарапынан жеткілікті назардың бөлінбеуі;

Қорытынды және ұсыныс

Жоғарыда аталған қиындықтардың алдын алу үшін 1-сыныпқа қабылдау барысында алдын ала диагностика жүргізудің маңызы зор. Сонымен қатар ата-аналардың пікіріне, баласының мектепке дайындығы жөніндегі алаңдаушылығына құлақ асу қажет. Ата-ананың «Балам 1-сынып бағдарламасын меңгере алмайды, әлі кішкентай» деген пікірлері ескерілмеген жағдайда, мұндай оқушылар оқу процесінде мұғалімге қиындық тудырып қана қоймай, сыныптың жалпы оқу сапасына да кері әсерін тигізеді.

Сондықтан:

• мектепке қабылдау кезінде психологиялық-педагогикалық дайындық деңгейін анықтау;

• ата-анамен бірлескен шешім қабылдау;

• қажет жағдайда баланы мектепке бір жылға кеш қабылдау немесе қосымша қолдау ұйымдастыру
  сыныптағы оқу сапасын арттырудың маңызды алғышарты болып табылады.