І. Диктант жазуды ұйымдастырудың мақсаты мен міндеттері

1. Мақсаты – Қазақстан Республикасы Тәуелсіздігінің 30 жылдығына орай білім алушылардың мемлекеттік тілде жазу мәдениетін дамыту, сауаттылығын қалыптастыру, мәтін мазмұны арқылы ұлттық құндылықтарды білім алушылардың бойына сіңіре отырып, патриоттық тәрбие беру.

2. Міндеттері:

• білім алушылардың мемлекеттік тілді білуі мен сауаттылық деңгейін байқау және тілге деген құрметін арттыру;

• білім алушылардың мемлекеттік тілде сауатты жазу дағдысын қалыптастыру;

• мемлекеттік тілдің мәртебесін арттыру және білім алушылардың бойына ұлттық құндылықтарды сіңіру;

• білім алушылардың еліне, жеріне, отанына деген сүйіспеншілігі мен мақтанышын ояту.

10-сынып

Тәуелсіздік – басты құндылығымыз

Тәуелсіздік күні – ерекше тарихи маңызы бар ұлттық мереке. Биыл ел тәуелсіздігіне 30 жыл толып отыр.

Ата-бабаларымыздың сан ғасырлық арманы болған тәуелсіз ел болу бақытын көру біздің замандастарымызға бұйырды.

Экономикалық дағдарыс, тұрақсыздық пен тоқырау кезеңінде Тұңғыш Президентіміз Елбасы Н.Ә. Назарбаев қазақстандық қоғамды басқарудың дара жолын айқындады. Ұлттық ерекшеліктерімізді, шетелдік озық тәжірибені терең зерделей отырып, жас мемлекетті дамытудың жаңа бағыттары қарастырылды. «Ынтымағы жарасқан елдің ұпайы түгел» демекші, бірлігі бекем ел барлық қиындықты еңсерді. Сан ғасыр бойы ақ білектің күшімен, ақ найзаның ұшымен қорғалған қасиетті жерімізді сақтау, тәуелсіздігімізді нығайту – жастарға аманат.

Бүгінде тәуелсіздік құрдастары ойы толысқан отыз жасқа толды. Егемен елде дүниеге келіп, өсіп-жетілген олардың санасы сергек, көзқарастары да, өмір-салттары да ерекше.

Тәуелсіздіктің 30 жылдығы жасампаздық пен өрлеудің, өркендеудің жаңа белесіне айналуына бәріміз мүдделіміз. Еліміздің тұғыры мығым, мерейі үстем болсын! (129 сөз)