«Мен инженер боламын,

Жерден алтын табамын.

Жолын қуам әйгілі

Академик ағаның»,-

Деп Арман бір қуанды

Сергек, ұшқыр көңілмен.

Қоштадым да құп алдым

Бұл талабын оның мен.

«Мен ғарышкер боламын,

Жұлдызға ұшып барамын.

Жолын қуам атақты

Тоқтар сынды ағаның»,-

Деп Серік бір қуанды

Сергек, ұшқыр көңілмен.

Қоштадым да құп алдым

Бұл талабын оның мен.

«Мен дәрігер боламын,

Үлкеннің де, баланың

Қиналғанда қасына

Бірінші боп барамын»,-

Деп Ботам бір қуанды

Аппақ, адал көңілмен.

Қоштадым да құп алдым

Бұл талабын оның мен.

«Ал мен ақын боламын,

Сусылдаған қаламым.

Адамдардың жүрегін

Жырмен жаулап аламын»,-

Деді Қамбар қуанып

Аңқылдаған көңілмен,

Тұрдым іштей құп алып

Бұл талабын оның мен.

«Бірің алтын іздесең,

Бірің жазсаң өлеңді,

Жұлдыздардан біреуің

Жолдап жатсаң сәлемді.

Бірің болып дәрігер,

Емдеп жатсаң ауруды,

Құрмет тұтып қалың ел,

Сыйлап жатса бар гүлді,

Бәріміз де жейтұғын,

Ең алдымен нан керек.

Көтеруге ел туын

Қуат керек, әл керек.

Нан беретін баршаға

Жер маманы болам мен.

Барып жүрмін бақшаға

Агроном ағаммен.

Гүл егемін жеріме

Осындай ой бар менде.

Жер жемісін еліме,

Сыйлап өтсем арман не»,-

Деді Құрман ойланып.

Мен құп алдым айтқанын.

Ал өзім-ақ қой бағып

Дайындармын ет жағын.

Дереккөзі: https://www.zharar.com/kz/takpak/10379-profession.html

1. Мәтін мазмұны бойынша кестеде берілген мамандықтарды қай кейіпкердің таңдағанын жазыңыз. Кейіпкерлердің әрекетіне қатысты мәтіннен бір дәлел келтіріңіз.

2. Аталған мамандық иелерінің бірін таңдап, оған тән қасиетті сипаттайтын екі сөз жазыңыз.

3. Тірек сөздер мен суреттерді пайдаланып, «Мамандықтың бәрі жақсы» тақырыбына әңгіме құрастырыңыз.

Т ірек сөздер: кәсіп, білікті, маңызды, сала, арман, мақсат, еңбекқор, пайдалы, қажетті, мамандық иесі.