Абай Мұрасы

Абай мұрасы - қазақтың қасиетті қазынасы

Елбасы Н. Ә. Назарбаев:

«Абай – қазақ халқының рухани

қазынасына өлшеусіз үлес қосқан

ғұлама ғана емес, сонымен қатар,

ол қазақ халқының ел болуы жолында

ұлан-ғайыр еңбек еткен данагер».

Абай мұрасы - қазақтың қасиетті қазынасы деп бекерден бекер айтпаса керек. Абай атын естігенімізде оның қасиетті сөздері, еліне деген сүйіспеншілігі, даналығы, ең бастысы халқына жанашыр болғандығы есімізге түседі. О заманнан бұл заманға дейін маңызын жоймайтын өзіндік тарихы бар ұлы тұлға. Сонымен қатар ақын шығармаларында адам баласын еңбекқорлыққа, білім мен өнерге, қарапайым, адал, бауырмал болуға жауапкершілікті терең сезінетін толық адам болуға үндеген. Сондай - ақ халықты жақсылыққа үндеп қана қоймастан қоғамның барлық саласы туралы ой қозғап отырған. Қоғамдағы келеңсіздіктер, бай мен кедей арасындағы әділетсіздіктер, мансапқұмарлықты сынап, еріншектік, жалқаулық, рақымсыздық туралы шығармаларында айтып өткен.

Абайдың әндері құлақтан кіріп бойды алса, қара сөздерінде терең философиялық мағына жатыр. Бізге Абай мұрасының сыртқы сымбаты емес, оның ішкі мәні де қажет. Данышпан ақынның айтып-жазғандарының барлығы, болмыстың түпкі мәнін түсіндіруге арналғандығын білеміз. Сондықтан, Абайдың сырлы сөздері адам болмысын, қоғам өмірін, тіпті бүкіл әлемнің мағынасы мен мақсатын түсіну кілті болып табылады.

Абайдың рухани мұрасынан әркім өз керегін алып, өмірінің өзегіне айналдырары сөзсіз. Елбасы Нұрсұлтан Әбішұлы Назарбаев айтқандай, «Абай сөзі – қазақтың  бойтұмары, Абай мұра­сы – қазақтың ең қасиетті қазынасы. Абай тілі-қазақтың мәдени тарихы».

Абай халық қазынасының бүкіл тарихи дәстүрін, ұлтының рухани байлығын бойына сіңіре білген, туған тілінің тұнығын жүзіп ішіп, артында шын мәніндегі терең сырлы сөз, парасатты ой қалдырған өз елінің пір тұтар- біртуар ұлы.

Ұлы кемеңгер ақынның шығармалары болашақ ұрпақ үшін сарқылмас қазына бола бермек!