«Air Astana:Қазақстан әуесаласының айнасы»

Air Astana — Қазақстан Республикасының тәуелсіздігімен қатар қалыптасып, әлемдік авиация сахнасында беделге ие болған ұлттық әуе тасымалдаушысы. Ол 2002 жылы 15 мамырда өзінің алғашқы рейсін орындап, содан бері ТМД және Орталық Азиядағы ең табысты және сенімді авиакомпаниялардың біріне айналды. Бұл компания тек ұшақпен тасымалдау қызметін ұсынатын оператор ғана емес, сонымен қатар мемлекеттің жаһандық беделін көтеруші, мәдениет пен қауіпсіздіктің символына айналған заманауи ұлттық бренд.

Air Astana-ның пайда болуына себеп болған жағдайлар Қазақстанның сол кездегі әуекөлігіндегі дағдарыспен тығыз байланысты. Кеңес Одағы ыдырағаннан кейін республикада көптеген аймақтық және халықаралық бағыттар жабылды, инфрақұрылым ескіріп, кадр тапшылығы байқалды. Осы орайда, мемлекет пен British Aerospace арасындағы серіктестік нәтижесінде жаңа авиакомпания құрылды. Бұл – Air Astana болатын.

Питер Фостердің басшылық етуімен компания алғашқы күннен бастап халықаралық стандарттарға сай қызмет көрсетуді, флотты жаңартуды, клиентке бағытталған мәдениетті дамытуды мақсат етті.

Air Astana-ның флотына қазіргі таңда Airbus A320neo, A321neo, Boeing 767, Embraer E190-E2 және тағы басқа заманауи ұшақтар кіреді. Бұл – тек заманауи техникаға иелік етумен шектелмейтін артықшылық. Компания ұшақтардың үнемі техникалық күтімін, авиациялық қауіпсіздік талаптарын, экологиялық стандарттарды сақтауын басты орынға қояды.

FlyArystan бюджеттік бағыты да осы флоттың бір бөлігін құрайды. Бұл – ішкі нарықты дамытуға және төмен бюджеті бар азаматтарға қолжетімді сапалы рейстер ұсынуға бағытталған маңызды жоба.

Air Astana бірнеше жыл қатарынан Skytrax World Airline Awards сыйлығы бойынша “Орталық Азия мен ТМД-ның үздік әуе компаниясы” атағын иеленіп келеді. Бұл тек батыс сарапшыларының пікірі ғана емес, жолаушылардың нақты бағалауы.

Сонымен қатар, компания APEX және Airline Strategy Awards сынды ұйымдардың жоғары марапаттарына ие болып, Азия мен Еуропа нарығында сенімді серіктес ретінде танылған.

Air Astana-ның басты ерекшелігі – жолаушыға деген ерекше құрмет. Компания әрбір рейсте жайлы жағдай жасауға тырысады: заманауи ойын-сауық жүйесі, қазақ тіліндегі аудиокітаптар, дәстүрлі тағамдар, арнайы диеталық мәзірлер ұсынылады.

Сонымен қатар, “Shanyraq” бизнес-залдары мен “Nomad Club” бағдарламасы жиі ұшатын клиенттерге ерекше артықшылықтар береді.

Air Astana әлеуметтік жобаларға да белсене араласады. Компания түрлі қайырымдылық шараларын, жастарға арналған білім беру бағдарламаларын қолдайды.

2024 жылы іске қосылған “Upcycling for the Future” жобасы — экологияға деген жауапкершіліктің көрінісі. Ұшақтың пайдаланудан шыққан бөлшектері интерьерлік бұйымдарға, жиһазға айналдырылып, қайта өңдеудің үлгісін көрсетті.

Компания алдағы бес жылда флотты 80 ұшаққа дейін арттырып, жаңа халықаралық бағыттарды дамытуды көздеп отыр. Әсіресе, Азия мен Таяу Шығыс бағыттары басты назарда.Сондай-ақ, кадрлық резерв дайындауға да ерекше көңіл бөлініп отыр. Қазақстанның жас ұшқыштары мен авиациялық инженерлерін даярлау үшін арнайы орталықтар ашылып, симуляторлар мен халықаралық тренингтер енгізілуде.

Air Astana — бұл жай ғана авиакомпания емес. Бұл — тәуелсіз Қазақстанның абыройы мен беделін аспандатып жүрген ұлттық бренд. Оның табысы — сапа, тәртіп және үздіксіз даму жолындағы қажырлы еңбектің жемісі.Әрбір рейсі – Қазақстанның көгінде желбіреген тудың символы. Әрбір жолаушысы – сенімділік пен сапаның куәсі.

Сыздыққызы Фемида

ФИ 23-11К1