Әл-Фараби атындағы ҚазҰУ-дың даму стратегиясындағы басқару психологиясының рөлі

Әл-Фараби атындағы Қазақ ұлттық университеті — Қазақстандағы ең беделді жоғары оқу орындарының бірі. 1934 жылы негізі қаланған бұл оқу орны еліміздің білім және ғылым жүйесінің көшбасшысы ретінде танылған. Университет өз миссиясын – сапалы білім беру, ғылымды дамыту және ұлттық құндылықтарды сақтай отырып, бәсекеге қабілетті мамандар даярлау бағытында сәтті жүзеге асырып келеді. Университетіміз халықаралық QS World University Rankings рейтингінде жоғары орындарға ие болып, әлемнің үздік университеттерімен иық теңестіріп келеді.

ҚазҰУ тек білім берумен ғана шектелмей, студенттердің тұлғалық дамуына, әлеуметтік жауапкершілігі мен көшбасшылық қабілеттерін қалыптастыруға зор көңіл бөледі. Университетімізде студенттерге арналған түрлі қосымша білім беру бағдарламалары мен курстар да ұйымдастырылуда, олар болашақ мамандарды кәсіби тұрғыдан дамытуға бағытталған. Осыған байланысты университеттің имиджін көтеру – әрбір студент пен оқытушы үшін ортақ мақсат болуы тиіс. Бұл имиджді қалыптастыруда оқу үдерісінің мазмұны, ғылым мен тәрбие, сондай-ақ студенттердің бойындағы психологиялық мәдениет те маңызды рөл атқарады.

Біз, «Басқару психологиясы» пәнін оқып жатқан студенттер ретінде, пән оқытушысымен бірге университеттің имиджі мен психологиялық ортасын жақсартуға арналған түрлі тақырыптарды бірге зерттеп, талқылап келеміз. Атап айтқанда, «Ұйымдағы тұлғааралық қабылдауды қалыптастыру механизмдері» атты дәріс бізге ерекше әсер етті. Осы мақалада аталған тақырып негізінде университет имиджінің қалыптасуындағы психологиялық факторлар жайлы пікірімізбен бөлісеміз.

Басқару психологиясы және тұлғааралық қабылдау

Басқару психологиясы пәніндегі дәрістер барысында біз ұйым ішіндегі тұлғааралық қатынастардың қаншалықты маңызды екеніне көз жеткіздік. Соның ішінде «Ұйымдағы тұлғааралық қабылдауды қалыптастыру механизмдері» тақырыбын оқытушымен бірге талқылап, бұл тақырып адамның басқа адамды қабылдау ерекшелігіне, мінез-құлқын дұрыс түсіне білуіне, тұлғааралық қатынастағы сенім мен өзара түсіністікке негізделгенін анықтадық.

Ұйымдағы тұлғааралық қабылдауды қалыптастыру механизмдерінің басқару психологиясындағы рөлі өте маңызды. Қабылдау механизмдері — адамдар арасындағы қарым-қатынасқа, сенімге, түсіністікке, өзін-өзі басқаруға ықпал ететін психологиялық құралдар. Тұлғааралық қабылдаудың дұрыс қалыптасуы ұйымның жұмыс сапасын арттырып, оның имиджіне де оң әсер етеді. Біз дәрісте адамдардың мінез-құлқы мен сезімдерін дұрыс түсінудің, оларды қалай қабылдау қажеттігіне байланысты түрлі әдістерді талқыладық.

Университет ішіндегі қарым-қатынас мәдениетінің сапасы — оның сыртқы имиджінің көрінісі. Студенттер мен оқытушылардың өзара қарым-қатынастары мен бір-біріне деген қабылдауы университеттің ішкі мәдениетін қалыптастырады. Мұның нәтижесінде университетке деген құрмет, сенім және жоғары бағалау қалыптасады, бұл өз кезегінде оқу орнының имиджіне әсер етеді.

ҚазҰУ – сапа мен мүмкіндіктердің ордасы

Біз білім алып жатқан Әл-Фараби атындағы Қазақ ұлттық университеті – болашаққа жол ашатын сапалы білім мен дамудың орталығы. ҚазҰУ әлемдік деңгейде танылған оқу орны болып, халықаралық серіктестік пен ғылыми зерттеулерге ерекше көңіл бөледі. Университетімізде студенттер мен оқытушылардың өзара ынтымақтастықта жұмыс істеуіне барлық жағдай жасалған. ҚазҰУ-дың зерттеу орталықтары мен ғылыми зертханалары әлемдік деңгейдегі зерттеулер жүргізуге мүмкіндік береді.

Университетіміз студенттердің ғылыми жұмыстарымен айналысуға қолайлы жағдай жасап, түрлі ғылыми конференциялар мен симпозиумдар ұйымдастырады. Бұл студенттердің өздерінің зерттеушілік қабілеттерін дамытуға, ғылыми ортада танытуға және әлемнің түкпір-түкпіріндегі ғылыми қоғамдастықтармен байланыс орнатуға көмектеседі.

Сонымен қатар, университетіміздің академиялық ұтқырлық бағдарламалары арқылы студенттер әлемнің үздік университеттерінде білім алып, тәжірибе жинақтай алады. Мұндай мүмкіндіктер студенттерге тек білім алуға ғана емес, өздерінің мәдениетін, құндылықтарын халықаралық деңгейде танытуға мүмкіндік береді.

Қорыта айтқанда, біз — Әл-Фараби атындағы Қазақ ұлттық университетінің студенттері және «Басқару психологиясы» пәні бойынша оқытушымызбен бірге — университет имиджінің тек сапалы білім мен ғылыми жетістіктерге ғана емес, ішкі қарым-қатынас мәдениетіне де тікелей байланысты екенін айта аламыз.

Тұлғааралық қабылдау механизмдерін терең түсіну арқылы біз ұжымда, университет қабырғасында және болашақ қызметтік ортада үйлесімді қарым-қатынас орнатудың жолдарын меңгердік. Бұл білім мен тәжірибе – біздің кәсіби қалыптасуымызға ғана емес, университетіміздің беделін нығайтуға да үлес қосады.

Университетіміз — өз түлектерін заманауи талаптарға сай, психологиялық тұрғыдан дайын, бәсекеге қабілетті маман ретінде даярлайтын беделді оқу орны. Біз осы жолда өз үлесімізді қоса отырып, ҚазҰУ-дың болашағы үшін бірге еңбек етеміз.

Тленчиева Н.С.

Педагогика ғылымдарының кандидаты

Омарбек Н.А.

«Қолданбалы және есептеу математикасы» мамандығының

1-курс магистранты

Әл-Фараби атындағы Қазақ Ұлттық Университеті