“Алаш арманы” туындысы

Алаш арманы

Қанат Шүкірбеков

«Алаш арыстары бізге мемлекеттілік идеясын ту етіп көтеруді табыстап кетті. 1991 жылы құрылған Қазақстан Республикасы атты мемлекет – сол арыстардың асыл арманының жүзеге асуы».

-Нұрсұлтан Назарбаев

Шындық қанша бұрмаланса да , тарих таразысы ертелі - кеш өзі туралы ақиқатты жырлайтынына көз жеткізіп келеміз. Сондай тың тақырыптардың бірі мәңгі өлмейтін Алаш рухы. Алаш қайраткерлерінің бейнесі ұлттық құндылықты дәріптеудің басты символына айналған бірегей көрініс.. Қазақстан суретшілер одағының мүшесі, қылқалам шеберінің майталманы атанған профессор Қанат Шүкірбековтың шығармашылығынан да шындыққа толы тарихи сюжеттерді көптеп кездестіреміз. Сондай көркем туындыларының бірі - 2017жылы жарық көрген “Алаш арманы”.

Жарқын болашаққа сеніп, Отанымыз бен халқымыздың сұлулығын жырлаған ұлы тұлғалар - Әлихан Бөкейханов , Ахмет Байтұрсынұлы және Міржақып Дұлатұлы сынды туындыдағы басты кейіпкерлер мүмкіндігінше табиғи әрі тұлғалық, әлеуметтік және рухани құндылықтарымен бірге кескінделген.

Қазақ халқына тән ерекше көріністер картинада жанданып, әдемі идея төңірегінде әсерлі шешім тапқан. Шаңырақпен аспанның тұстатып кетуі,шаңырақ астында көрініс тапқан алты алаштың алып тұлғалары, ал оның төменгі бөлігінде еліміздің елордасының бейнеленуі - Алаш рухы мен ұраны туралы өзіне тән философиялық ойларды баяндайды.

Шаңырақ- тарих тереңіне тән ерекше символды сипаттап,өткен күннің елесі туралы сыр шертсе, Астана - бүгінгі күні бейбітшіліктің бас қаласына айналған киелі мекен. Жайқалған зәулім үйлер, архитектурасы ерекше көзге түсетін алып Байтерек сынды биік -биік ғимараттар, тәуелсіздік тұғырына тұрғызылған монументтік кешендердің барлығы жаңа заман дамуының үрдісі. Тарих пен жаңа дәуірдің ортасында орналасқан алаш қайраткерлерінің образы - екі кезеңнің кездесуі іспетті өте әсерлі сомдалып, дәуір шындығы жайлы еріксіз сөз қозғап тұрғандай.

Түспен, кеңістікпен және сызықпен батыл жұмыс істеген көркем туынды авторы Қазақстанның таңғажайып әдемі табиғатын, оның заттық әлемін бейнелеуде қанық түстерге баса назар аударғаны да көрерменнің назарынан тыс қалмайды. Жанды колоритпен темпераментті жазуы арқылы суретшінің қолтаңбасы одан әрмен айқындала түседі.

Картинада ұлттық демократиялық мемлекет құру Алаш арыстары ұсынған идеяның негізі екені анық баяндалып, тәуелсіз мемлекет құру деген мақсаттың орындалғанын, және ол азаттық қазақтың маңдайына біткен бақыты, ел ағаларының аманат екені айқын көрініс тапқан.

Қанат Шүкірбеков қазақ ұлттық және бейнелеу өнерінің үздік дәстүрлеріне жаңа образдар жасаудың қас шебері. “Алаш арманы” - отанды адал және риясыз сүюге бағыттайтын, ұрпаққа үлгі болған озық туындылардың бірі де бірегейі.

Темірбек Жүргенов атындағы ҚҰӨА

Тұрсынғазы Гина

“Өнертану” 2курс