АЛАШ БЕКЗАТЫ

Зұлмат жылдар бөлегенде тасқынға,

Айбарланып кемеліңнен тастың да,

Өр кеудеге рух сыйлады алты Алаш,

Тізе қосып Алаш туы астында.

Соның бірі Бекзат болып жаралған,

Хәкім Абай сөздерінен нәр алған.

Елдің бойын асқақтатқан-Ғаббасов

Асыл текті Тарақтыдан таралған.

Жандандырып ата-баба кәсібін,

Іскерліктің тауып айла-тәсілін.

Сонау Ресей аймағына ет тасып ,

Қақ Мәскеуден алды адал нәсібін.

Озық туып өз заманын жаңғыртты,

Жапондардан техникасын алдыртты.

Сол қоғамда-ақ жаһандану жасаған,

Техникалық оқу-орнын салдыртты.

Қырда өскен қыран құстай қырағы,

Шынардай шың биігіне шығады.

Елі үшін оттай жанып, жалындап,

Саясаттың саяздығын сынады.

«Сарыарқадай» газетіңді ашқаның,

Ел-жұртыңды игі жолға бастадың.

Ахметтің «Қазағына» серік боп,

Алаш үнін әр-бір қырға тастадың.

Іші сезіп «Ұлы жұттың» қарсаңын,

Сандалысын текті ұлттың сарсаңын.

Сталинмен екі мәрте тікелей

Тілдескенде талап етті аңсарын.

Төгіп нұрын шолпандай таң алдында,

Меңзең жұртты бір тірілтіп алдың да.

Алғаш қазақ милициясын жасақтап,

Қайта өрлеттің, көкке қанат жайдың да.

Ұлы дала бекзатына теңейді,

Алып қалған Ақмола мен Семейді.

Жалған ғұмыр найзағайдай жарқ еткен,

Тарихта енді қайталанып келмейді.

Сөздерінен ерлік рухы шарпыған,

Қайыспайтын тағдыр берген талқыдан,

Арыстарым азат таңда туса егер,

Озар едік барша әлем халқынан .

Алты алашым қайратты әрі көреген,

Күллі елді ұранына бөлеген.

Қазақ жері-содан қалған аманат,

Мұра болған бостандығы көнеден!