Әлеуметтік педагог – қоғам мен бала арасындағы алтын көпір

Қазіргі қоғамда бала тәрбиесі мен оның жан-жақты дамуы –ең өзекті мәселелердің бірі. Осы бағытта маңызды рөл атқаратын маманның бірі –әлеуметтік педагог. Әлеуметтік педагог-оқушының әлеуметтік ортаға бейімделуіне, оның құқықтары мен мүдделерінің қорғалуына, өмірлік қиындықтарды жеңуіне көмектесетін тұлға.

Әлеуметтік педагогтың басты мақсаты –баланың толыққанды дамуына қолайлы жағдай жасау. Ол оқушының отбасындағы, мектептегі және қоғамдағы қарым-қатынастарын зерттеп, қажет болған жағдайда психологиялық әлеуметтік және құқықтық көмек көрсетеді. Әсіресе, әлеуметтік жағдайы төмен, көпбалалы немесе толық емес отбасынан шыққан балалармен жұмыс әлеуметтік педагогтың негізгі міндеттерінің бірі болып табылады.

Қазіргі қоғамда әртүрлі әлеуметтік жағдайларға байланысты балалар қиындықтарға тап болуы мүмкін. Олардың арасында тұрмыстық мәселелер, отбасындағы қиындықтар, психологиялық қысым немесе білім алу мүмкіндіктерінің шектеулі болуы сияқты жағдайлар жиі кездеседі. Әлеуметтік педагог осы қиындықтарды жеңуге көмектеседі, балалар мен олардың отбасы мүшелері үшін қолдау көрсетеді. Ол балаларды қоғамда дұрыс орнын табуға, өз құқықтарын қорғауға үйретеді.

Сонымен қатар, әлеуметтік педагог балалардың мектепте немесе басқа қоғамдық орындарда өздерін дұрыс ұстап, әлеуметтік қарым-қатынастарды дұрыс дамытуына көмек көрсетеді. Бұл маманның жұмысы тек мектеп аясында ғана емес, сондай-ақ қоғамның басқа да мекемелерінде, әлеуметтік қызметтерде де маңызды рөл атқарады.

Бұл мамандық иесі тек білімді ғана емес, сонымен қатар мейірімді, сабырлы, жауапкершілігі жоғары, адамдармен тез тіл табыса алатын болуы тиіс. Әлеуметтік педагог –әр баланың тағдырына бейжай қарамайтын, оның болашағына сенім ұялататын маман.