Тақырыбы: "Ана деген теңдесі жоқ ұлылық!"

Мақсаты: Оқушыларды мейірімділікке, аналардың шексіз еңбектерін бағалай білуге, анасын сүю арқылы еліне деген сүйіспеншілікке тәрбиелеу. 
Көрнекілігі: қанатты сөздер, мерекелік безендірулер 
Өтілу барысы: 

Хор: «Ана туралы жыр»

1 жүргізуші: Қайырлы күн, қымбатты ұстаздар, аналар, арулар! Көңілдеріңізге көктем шуағындай сезім мен нұр құйып, тағы да 8 наурыз халықаралық әйелдер күні келді.Осынау көркем мерекеcінің қай кезде де орны бөлек. Олай болатыны, аналарға деген ыстық сезім, алғыс пен құрмет ешқашан сөнбек емес. Олар - өмірдің гүлі, көңілдің жыры, әр отбасының алтын діңгегі. Мынау тынымсыз тіршілік пен кең дүниенің өзі тек аналармен ажарлы. Бүгінгі арайлап атқан нұрлы таңмен бірге әрбір сәби жүрегі өзің деп соқса, бүгінгі мерекелік кешіміз де аналарға арналады.

2 - жүргізуші:

Біз ғана емес,қадір тұтқан бабалар.

Аналардан туған небір даналар.

Ана деген тіршіліктің тірегі,

Армысыздар,қасиетті аналар!

1 - жүргізуші

Десек те уақытпен жарыспайды,

Қиялға қиялменен қарыштайды.

Шәкірттер шын жүректен тебіреніп,

Жырларын аналарға бағыштайды. Олай болса шәкірттеріңіздің аналар жайлы өлең шумақтарына назар аударайық.

Данияр – «Ана» Төлеген Айбергенов

1-жүргізуші:

Ана, Ана, Ана... Осы сөздің өзі адамға қандай күш береді. Дүниеде ананың мейіріне, аялы алақанына не жетеді?! Дүниеге келіп, көзіңді ашып көретінің – Ана. Қанаттыға қақтырмай, тұмсықтыға шоқыттырмай бауырына басып, біз үшін жан ұшыра шырылдайтын да – Ана. Тек жақсылық тілейтін де – Ана. Ана – біз үшін пана, дара, дана тұлға. Әр ақынның музасы болған Ана тақырыбы ақындарға шабыт беріп әдемі жыр жолдарын тудыртты. Ендеше, қазақтың аққиық ақыны хан тәңірі болған Мұқағали Мақатаевтың «Аққулар ұйықтағанда» поэмасынан алынған үзіндіден сахналық көрінісімізді ұсынамыз.

Көрініс «Аққулар ұйықтағанда» поэмасы

2-жүргізуші:

Ана дегенде сөзге келмейтін тіл, лүпіл қақпайтын жүрек, мөлтілдемейтін жанар жоқ. Балаға анадан артық, анадан қымбат жан жоқ. Әрбір ана отының өшпеуін, бақытының көшпеуін, шаңырағының құламауын, сәбиіннің жыламауын, сұм соғыстың болмауын, қызыл гүлдің солмауын тілейді.

1- жүргізуші: Қымбатты аналар! Аялап өсіріп отырған ұл –қыздарыңыздың сіздерге арнаған бейнеролигін тамашалауға шақырамын.

Бейнеролик

1 – жүргізуші:

Ана-өмір қолдаушысы әлемнің 
Шаңырақтың шаттығы мен шуағы 
Сейілмесін жанарынан ананың 
Тіршілікке төккен нұрлы шуағы 
Ән «Анашым – ана жаным »

1 – жүргізуші:

Дүниенің ең қымбаты ана екен,
Ананың ең тәттісі бала екен.
Түн ұйқысын төрт бөліп тәрбиелеген,
Ананың орыны бөлек дара екен

2 – жүргізуші:

Балаға ана еңбегі парыз деймін,
Еңбегін өтеу бізге қарыз деймін.
Меккеге апарса да өтелмеген,
Ұрпаққа бұл өсиет аңыз деймін.
«Сені сағындым» Мөлдір

2- жүргізуші: Ана әрбір адамның жарық дүниедегі ең жақыны, жанашыры, қадірлісі, қамқоршысы, ақ сүтін емізіп аялаған, жанын да аямаған ардақтысы. Мен ана деген сөзді қанша айтсам да жалықпаймын. Өйткені ол дүниедегі ең ардақты жан. Ана баланы тоғыз ай көтеріп, толғатып, дүниеге келтіріп қана қоймайды, оны көзінің қарашығындай қорғап, аялап өсіріп аяғынан тік тұрғызады.

1-жүргізуші:

Теңіздей тербетіліп көл бетінде,

Бишілер билеп кетті тербетіле.

Аққудай қалықтаған теңіздегі,

Бишілер өнерлерін көрсетуде,- деп алдарыңызға мың бұралған бишілерімізді ортаға шақырамыз.

Би «Ұйғыр биі»

2- жүргізуші: Әлемдегі жақсылық көзі, адамдық қасиет, ақ тілек мейірбандықтың бәрі ана деген сөзбен астасып жатыр. Ендеше ана туралы әсем әнімізді қабыл алыңыздар.

Ән «Әке -Ана» Қарақат

1 - жүргізуші: Осы бір «АНА» деген үш әріптің аясында адамзат баласын қуаныш сыйлар қаншалықты қасиет бар десеңші! Ару-ана, Ару-асыл жар, Ару – көңілдің гүлі, Ару - өмірдің жыры, тіпті айта берсең сөз жетпейді. Мына жарық дүниеге әкелген Ана алдында бәріміз де бас иеміз.

2- Жүргізуші: Ұлтымыздың бүкіл ұлағат өрісі – аналар. Сіздердің Мейірім шуақтарыңыз жарқырап, шұғылалы сезім сәулелеріңізбен нұрландырып, даналықтың бастауы бола беріңіздер деген тілекпен бүгінгі ашық клас сағатымызды аяқтаймыз.