Ақыл-ойды тәртіпке келтіретін математика

«Қазір бой жарыстыратын емес, ой жарыстыратын заман» деп елбасымыз Нұрсұлтан Әбішұлы Назарбаев айтқандай өскелең ұрпақты бәсекеге қабілетті, жарыста алып озар шәкіртті тәрбиелеу әр оқытушының міндеті.

«Ақыл-ойды тәртіпке келтіретін математика, - демекші математика мектептегі өзекті де, негізгі пән. Осыған орай Бидайық негізгі мектебінде «Киелі сандар» атты математика апталығының өткені туралы сіздермен бөлісбекшімін.

Аптаның әр күніне пәнге байланысты қызықты тапсырмалар мен сайыстар болды. Ерекшелеп бір сайысқа тоқталсам, «Алғыр болсаң, озып көр» атты математикалық спорттық жарыс өтті. Бұл жарыстың мақсаты математика пәнінің жан-жақты, барлық пәндерді қамтитынын,және спортпен байланыстырып, оқушыларды жылдам қимылдауға, тапқырлыққа, қимыл іс-әрекетті жасап жүріп, ал ойымен тез есептер шығаруға бейімдеу. Сайыс 8 кезеңнен тұрды. Ойын барысында оқушылар доппен бірге жүгіріп, кедергілерді жеңіп,математикалық терминдерді, есептерді құрастыра білді.

Апталықтың соңғы күнінде «Математика әлемі» атты интеллектуалды қорытынды сайысын ұйымдастырдым. Сайыста 5-9 сыныптар арасынан 12 оқушыны іріктеп алып, 2 топқа біріктірдім. Сайыстың мақсаты оқушылардың ойлау қабілеттерін,тапқырлығын, жылдамдығын, таным белсенділігін арттыру. Математикалық сұраққа сауатты түрде жауап беру, қарым-қатынасты дамыту. Қорытынды сайыстан соң, апта бойы өзін білімімен, ұшқырлығымен, ізденпаздығымен жақсы көзге түскен оқушыларды «Данышпан», «Ұшқыр ойлы», «Еңбекқор» номинацияларымен марапатталып, белсене атсалысқан оқушыларға, Entglobus-тың құрастырған «Элементар математиканың негізгі формулалары» атты анықтамалық кітапшалар сыйға тартылды.