Ақын қыз

Түркістан облысы,Мақтаарал ауданы №34 Бірлік жалпы білім беретін мектеп»коммуналдық мемлекеттік мекемесінің қазақ тілі және әдебиеті пәні мұғалімі Пошанова Айжан Шарибаевна

Ақын қыз

Осы күні мектебіміздің мақтанышына айналған 11-сынып оқушысы Рахматуллаева Айда туралы ой қозғағым келді.

Айда-руханият пен әдебиетке ерекше жақын жас тұлға.11-сынып оқушысы бола тұра,ол жас шамасына қарамастан поэзия әлемінде өзіндік орнын тапқан.Төменгі сыныпта оқып жүрген кезінде-ақ терең мағыналы өлеңдер жаза бастаған бұл қыздың шығармашылығы оның ішкі сезімдері мен ой-толғаныстарын бейнелейді.Айданың бойындағы осындай ақындықты байқаған ұстазы Сандуғаш Абишева оны дамытуға жол ашты,оған дұрыс бағыт-бағдар беріп отырды.Өзінің бір сұхбатында Айда мұғалімін сағына есіне алып: «Болашақта Сандуғаш апайымдай болсам деп,қазақ тілі мен әдебиеті пәнін таңдадым»,- деген еді.

Айда мектеп қабырғасында жүріп,әдеби байқаулар мен шығармашылық кездесулерге белсене қатысады.Оның туындылары мектепте ғана емес,аудандық,облыстық деңгейге де танылып жүр.Биылғы оқу жылының басында ғана аудандық «Махамбет оқулары» байқауының жеңімпазы атанып,облыстан 3-дәрежелі дипломмен марапатталды.

Жастайынан оқырманның жүрегін баурап алатын ақын қыз өмір мен махаббат,достық пен адалдық,болашаққа деген үміт туралы ойларын өлең жолдары арқылы жеткізеді. Оның өлеңдері классикалық және заманауи стильдердің үйлесімін көрсетеді.Айда қазақ поэзиясының терең тамырын сақтай отырып,жаңа заманның үнін сезінеді.Оның шығармаларында адамның ішкі дүниесі,сезімдік әлемі ерекше бейнеленген,ал поэзиясы арқылы өз буынына үн қатып,өз көзқарасын білдіреді.Ақын қыздың өлеңдерінде табиғатқа,туған жерге деген ерекше сүйіспеншілік байқалады.Айданың бойында әдебиетке деген таланты мен тұрақты еңбекқорлығы оны болашақта ірі ақындар қатарына қосатынына және үлкен әдебиет әлемінде есімі жарық жұлдыздай жарқырайтынына сенім зор.

Бүгінгі мектеп жиынында Рахматуллаева Айданың марапатары беріліп,ол өзінің шығармашылығынан өлеңін оқып,өз замандастарына үлгі бола білді.Облыстық «Ақберен» байқауына аудандық кезеңнен оза шауып шыққан ақын қызымыз тағы да жолы болып,2-дәрежелі дипломмен оралды.Айданың алдағы уақытта да биік белесті бағындырарына сеніміміз мол.