Арманның шегі бар ма?

Арманның шегі бар ма?

«Армандай білу — адам болмысының шынайы белгісі» дейді даналар. Шынымен де, адам баласын алға жетелейтін, биікке жетелейтін бір күш бар десек, ол — арман. Армансыз адам — қанатсыз құс, бағытсыз кемедей. Бірақ… арманның шегі бола ма?

Адам өмірге келген сәтінен бастап, үмітке, болашаққа, жақсылыққа сеніп өмір сүреді. Бірі бала кезінде ұшқыш болуды армандайды, енді бірі ақын не дәрігер болсам дейді. Уақыт өте келе сол бала армандар кейде жоғалып, кейде шындыққа айналады. Дегенмен, арманның ең ғажап қасиеті — оның шексіздігінде.

Арман — адамның жан оты

Арман — бұл бос қиял емес. Ол — адамның ішкі әлеуетін оятатын, мақсатқа жетелейтін күш. Қазақта «Армансыз адам — қанатсыз құс» деген сөз тегін айтылмаған. Арман бар жерде үміт бар. Арман бар жерде алға ұмтылыс бар.

Қазақ халқы ғасырлар бойы азаттықты армандады. Алаш зиялылары тәуелсіз мемлекетті көкседі. Бүгінде сол арманның жүзеге асқанын көріп отырмыз.

Арманның шегі болмайды

Арманның шегі болуы мүмкін бе? Жоқ. Өйткені арман — уақытқа да, жасқа да бағынбайды. Бір арман орындалса, оның орнына тағы бір биік мақсат пайда болады. Мысалы, мектеп бітіруші жас — университетке түсуді армандайды. Ол орындалған соң жақсы жұмыс, кейін отбасылық бақыт, қоғамға пайдалы болу сынды жаңа армандар дүниеге келеді.

Арман — биікке жетелейді. Тек шынайы армандап, сол үшін еңбек ету керек. Арманыңа шек қою — өзіңе шек қоюмен тең. Сондықтан адам армандаудан ешқашан шаршамауы керек. Арманда, ізден, еңбектен — сонда ғана өмір мәнді, жолың айқын болады.

Арман — адамды өмірге ғашық ететін сезім. Арман — болашақтың бастамасы. Оның шекарасы жоқ, шексіз көк аспандай.

Сондықтан мен де өз болашағымды үлкен үмітпен елестетемін. Менің арманым — шынайы журналист болып, қоғамның үніне айналу. Бұл мақсатқа жету үшін талмай еңбектенем. Себебі арманым шексіз — мен шексіз мүмкіндіктерге сенем!