Армысың,Алтын күз!

Алтын күз!

Тақырыбы: «Алтын күз!»

Мақсаты: Алтын күз мерекесін өткізу. Күз туралы түсініктерін кеңейту. Балаларға мерекелік көңіл-күй сыйлау.

Ұйымдастыру кезеңі.

Әдемі сазды әуен ойналып тұрады. Балалар тәрбиешімен бірге кіріп, орындықтарға жайғасады.

Жүргізуші: Құрметті қонақтар, ұстаздар! «Алтын күз» атты ертеңгілікке қош келдіңіздер!

Армысыздар халайық,

Бармысыздар халайық!

Күзгі тойды жұп жазбай,

Бірге қарсы алайық!

Жүргізуші: Балалар бүгін барлығымыз күз мерекесіне жиналдық. Қонақтар да келді. Бірақ біздің мерекеге біреу жетіспейді. Ол кім?

Балалар: Ол күз.

Жүргізуші: Ендеше күзді ортаға шақырайық!

Бірге: Берекелі күз келді, мерекелі күз келді.

Күз: Сәлеметсіңдер ме балалар!

Балалар: Сәлеметсіз бе, Алтын күз!

Күз:

Береке бақ дарыған

Жомарт көңіл жарқын жаз

Сары алтынға малынған

Алтын күз деген мен болам!

Армысыңдар құрметті қонақтар, кішкентай бүлдіршіндер. Мен мерекеге кешігіп қалдым ба?

Балалар: Жоқ.

Жүргізуші:

Шоғы толған гүлдей жайнап,

Шақырады жарқын күз

Сайрандаған күліп ойнап

Келді міне, Алтын күз!

Күз: Балалар, сендерді көргеніме қуаныштымын. Мен сендерге бір жұмбақ жасырайын:

Ағайынды бәрі

Шықса жасып

Түссе сары. Бұл не?

Балалар: Жапырақтар.

Күз: Дұрыс жапырақтар, жарайсыңдар!

Жүргізуші: Алтын күз, біздің балалар күз туралы өлең, тақпақтар біледі. Сіз жайланып отырып, балалардың өнерін тамашалаңыз.

Көрініс: «Бауырсақ!» ертегісі.

Күз туралы тақпақтар!

Дархан:

Күзім ау, күзім ау

Мінезің бұзық ау

Жаңбырың сіркіреп

Келгенің қызық ау

Марғұлан:

Қыс құнар береді

Көктем дән береді

Нұрайна:

Жаз бастап өсірсе

Күз жинап береді

Иманжүсіп:

Қуандырып біздерді

Мерекелі күз келді

Зере:

Кел жемісті Алтын күз

Кемелденсін халқымыз.

Мұстафа:

Жайдары күз, жарқын күз

Аяулы күз, алтын күз!

Сымбат:

Дәнге толы кең далам

Дариядай шалқар күз.

Нұршат:

Ұшты талдан жапырақ

Сары көбелек секілді

И. Ануар:

Аспанда жай шатырлап

Тамшы жерге секірді.

Т. Алихан:

Алтын, сары, қызыл, көк,

Алуан-алуан жапырақ

Манура:

Күзгі бақтар күлімдеп

Көз тартады жалтырап.

Жүргізуші: Қане, балалар, осындай молшылық, күз айында бір ойын ойнап жіберейік. Ол ойын: «Кім жылдам?» деп аталады. Шарты: Ұлдар бір себетке көкөністерді жинайды, қыздар екінші себетке жемістерді жинайды.

Ойын: «Кім жылдам?»

Би: «Күзгі вальс»

Жүргізуші: Ендігі кезекті жемістерге арналған тақпақтарға кезек береміз.

Раййан:

Мен алмұртпын, алмұртпын

Аузындамын бар жұрттың!

К. Алихан:

Мен жүзіммін, жүзіммін

Моншақ болып тізілдім.

Ай-Сұлтан: Мен өрікпін, өрікпін

Табиғатқа көрікпін.

Миғраж:

Мен алмамын, алмамын

Таңдайда қалар бар дәмім.

Күз: Өте тамаша, балалар! Ал енді қонақтарымызды сынап көрейік. «Ұйқасын тап» ойыны:

Пісетін кезі дәл күзде

Мезгілсіз оны үзбе

Аузыңнан кетпес бал дәмі

Оның аты......(шабдалы)

Кіп-кішкентай болса да

Ағаштың басын иеді

Жемістерін айырып

Танисың ба.......(шиені)

Жапырақты тасалап

Өсетін жері бақша бақ

Күрен қызыл шіркін-ай

Оның аты......(таңқурай)

Жүргізуші: алтын күз, балалардың өнері ұнады ма?

Күз: Рахмет балалар, мереке қатты ұнады. Ал енді менің келесі топқа баратын уақытым болды. Қош сау болыңдар!

Жүргізуші: Балалар, қонақтар біздің күз мерекесіне арналған «Алтын күз!» атты ертенгілігіміз осымен аяқталды. Қош сау болыңыздар!