Астрономиядан шығармашылық жоба "Күн жүйесінің галактикадағы қозғалысы"

Күн жүйесінің галактикадағы қозғалысы

Біз мектепте Астрономия сабақтарында, көбіне, планеталарды Күнге қатысты зерттейміз. Мысалға, «Күн жүйесіндегі планеталардың орны қандай?», «Күн жүйесіндегі планеталардың қозғалысы» және де осы сынды басқа да тақырыптар. Соның әсерінен біз кейде Күннің де Галактиканы айнала қозғалыста болатынын естен шығарамыз.

Мен жасаған осы макетке қарай отырып, біз планеталардың Күнді эллипс бойымен айналғанымен, оның жүрген жолы «спираль» түрінде болатынын көре аламыз. Бұл тақырып қазіргі өмірде маңыздылығы көп болмағанымен, болашақта, мысалға, «Уақыт машинасын жасау» сияқты сұрақтарды қарастырғанда үлкен рөлді алады. Бала кезімізде барлығымыз «Уақыт машинасы болса мен артқа қайтып, кеше өтіп кеткен туған күніме оралар едім» немесе «Уақыт машинасы болса, мен бос уақытымды ойынмен өткізбей, бақылауға дайындалып, бүгін 2 емес 5 деген баға алар едім» деп армандаған шығармыз. Мүмкін дәл қазір де «Егер уақытты артқа жылжыта алса мен өз өмірімді өзгертер едім» деп ойлайтындар бар шығар. Бірақ біз осы тақырыпты қарастыра отырып, Жердің өзі орналасқан бір нүктеге екінші қайтып келмейтінін байқаймыз. Қайтып келген күннің өзінде бұл процесске шамамен 240 миллион жыл қажет екен. Демек, егер де болашақта тек уақыт бойынша саяхаттауға мүмкіндік беретін құрылғы ойлап табылып жатса, біз тек 240 миллион жыл бұрынғы не кейінгі Жерге ғана саяхаттай алады екенбіз. Ал басқа жағдайларда біз ашық ғырыш кеңістігіне тап боламыз. Сол үшін де алдымен тек қана уақытта емес, кеңістікте де орын ауыстыратын құрылғы керек екен.

Қазіргі күні бұл тек қиял болғанымен, бәлкім болашақта бұл арман шындыққа айналуы әбден мүмкін...