Сабақ мақсаты: Оқушыларға білім алу ақиқат құндылығынан туындайтыны туралы түсініктерін кеңейту.

Міндеттері:

• Оқушыларға үздіксіз ізденіп білім алу, ақиқаттың бастауы екенін ұғындыру.

• Оқушылардың шыншылдық, қарапайымдылық, адамгершілік қасиеттерін дамыту.

• Оқушыларды мәдениеттілікке, әдептілікке, еңбексүйгіштікке тәрбиелеу.

Ресурстар:оқулық, дәптер

(аудио,видио жазбалар)

Сабақбарысы:

1.Ұйымдастыру кезеңi: Сәлемдесу.

Оқу құралдарына назар аудару. 5 Т

Талап

Тазалық

Тәртіп

Тыныштық

Татулық

2.Тыныштық сәтi.

«Теңізге саяхат»(5 мин)

(Оқушылардан шеңбер құрып отыруды, қолдарын тізесіне немесе үстел үстіне қоюды, аяқтарын айқастырмауды өтініңіз. Арқаларын тік ұстауын қадағалаңыз. Жайлы, баяу музыка қойыңыз).

Мұғалім: Көзіңізді жұмыңыз және бірнеше рет терең тыныстаңыз; денеңізді босатыңыз. Бірнеше секундтан соң теңіз түбіне саяхат жасаймыз.

Теңіз жағасымен келе жатқаныңызды елестетіңіз. Толқындардың жеңіл шалпылына, шағалалардың шуылына құлақ түріңіз. Жалаң аяқтарыңызбен құмды сезініңіз. Шалғайдан қара нүкте көріп тұрсыз: ол жақындаған кезде дельфин екенін түсіндіңіз. Ол сізді теңіз түбіне алып кету үшін келді. Ол өте әдепті жәндік, сізді шыдамдылықпен күтіп тұр. Жайлап оның арқасына отырыңыз, мықтап ұстап, жолға шығыңыз. Дельфиннің арқасында жайланып отырып, өзіңді қауіпсіз сезіну, су астында жүзу қандай керемет. Жан-жағыңызға қараңыз: мұнда кемпірқосақ тәрізді арлы-берлі жарқырай қалқыған әсем балықтар қаншама. Теңіз түбіне бойлаған сайын айнала қалайша өзгереді, суда тербелген қаншама ғажайып балдырлар. Қараңызшы, қандай орасан зор балықтар, ал енді анау жаққа көз тастаңыз... бұл орасан зор сегізаяқ. Су асты неткен қызықты әрі ғажап әлем. Сіз бір нәрсені байқадыңыз ба? Мұнда неткен тұңғиық, толық тыныштық. Осы тыныштық күйде болыңыз.(Мұғалім бірнеше секунд үнсіз қалады).

Ал қазір жоғарыға, өз әлемімізге кері қайтуға дайындалыңыз. Айналаға жіті қараңыз. Ғажап түстерге тағы бір рет қараңыз және тыныштыққа құлақ түріңіз. Осындай тыныштық сізге самалдай әсер береді. Енді дельфин кері қарай жолға шықты. Сіз су бетіне шықтыңыз, жағаға жақындадыңыз. Дельфиннің арқасынан түсіңіз, оны сипалаңыз және осындай ғажап саяхатқа апарғаны үшін ризашылық білдіріңіз.

Сыныпқа оралыңыз және өз орныңызға келіңіз. Бірнеше секундтан соң көзіңізді ашыңыз, осы түйсінген тыныштықты өз бойыңызда сақтауға тырысыңыз.

Рахмет.

Үй тапсырмасын тексеру:

Тапсырма:

15 – бет, «Білім мен байлық» әңгімесін оқып келу.

«Білім мен байлық»

Білім мен байлықтың қайсысын таңдарын білмей жол айрығында жасөспірім бір ғұламаға келіп ақыл сұраған екен. Сонда ғұлама білімнің артықтығын әр түрлі дәлелмен дәлелдепті.

Білім – даналардан қалған мирас, білім сені бағады, ал байлықты сен бағасың. Білім досыңды көбейтеді, ал байлық дұшпаныңды арттырады. Білім іздеген сайын көбейе, молая береді, жұмсағанмен азаймайды, ал байлық жұмсасаң азаяды, кемиді, жойылады.

Білімің көп болса, ел сені құрмет тұтады, ал байлығың мол болса қызғанады. Білімге есеп-қисап жүргізбейсің, ал байлығыңды күнде есептеп отыруың қажет. Білім қаншама көп болғанымен іріп-шірімейді, бүлінбейді, ал байлық бір жұттық, өледі, жоғалады.

Білім жан дүниеңді байытады, ал байлық қиялыңды, көзқарасыңды шектейді, тура жолдан тайдырады.

Білімді адам мәдениетті, әдепті, адамгершілікті болады, ал байлығы мол адам мақтанады, әркімге астамшылық көрсетеді.

Таразының қай басы ауыр тартқанын өздерің бағамдай жатарсыңдар...

• Таразының қай басы ауыр тартты? Неге?

• Білімнің байлықтан артықшылықтарын ата.

• Білім мен байлық туралы қандай ой түйдіңдер?

• Білімді адамды неліктен шыншыл,қарапайым,

мәдениетті,әдепті, еңбексүйгіш деп айтамыз?

• Білім - ақиқат бастауыдегенді қалай түсінесің?

• Білімнің байлықтан артықшылығы туралы сен не айтар едің?

Сабақ барысын талқылау:

1.Дәйексөз.

«Өнер, білім – бәрі де оқуменен табылған».

Ы.Алтынсарин

• Ы.Алтынсариннің «Өнер, білім – бәрі де оқуменен табылған», - деп айтқанын қалай түсінесіңдер?

Дәйексөз оқушылармен талданып, мәні түсіндіріледі.

Дәптерге жазып, 2 рет ұлдарға айтқызу, 2 рет қыздарға айтқызу.

Сергіту сәті

Күлші күлші досым,

Күлші күлші досым.

Бүгін күн міне,

Сәттілікке толсын.

«4»-тік «5»-тік бағалар,

Күнделікте болсын.

2.Әңгiмелеу Мұғалім сыйы

«Байлық пен Кедейлік»

( аңыз әңгіме)

Күндердің бір күнінде Байлық пен Кедейлік “Кім сұлу?” деп сөз таластырыпты. Алайда бір ымыраға келе алмаған соң, жаяулатып келе жатқан ер азаматқа:

-Cіздің сұрағымызға сен жауап бере алатын сияқтысың. Айтшы, екеуміздің қайсымыз әдеміміз, сұлумыз? – деп сұрапты.

“Қап, қалай жауап берсем екен?” – деп жаяу жүргіншінің басы қатады: “Кедейлікті сұлу десем, Байлық ренжіп, менен кетіп қалар. Байлық сұлу десем, Кедейлік маған ызланып, бас сала төнуі мүмкін. Қайтсем екен?”

Ары ойланып, бері ойланып: “Бірден бұл сауалға жауап беру қиын екен. Сендер ары-бері жүріп көріңдер, мен қарап көрейін”, – дейді.

Байлық пен Кедейлік ары да өтеді, бері де өтеді. Бар сұлулығын көрсетуге тырысып бағады.

- Иә? Қайсымыз сұлу екенбіз ә? – дейді екеуі жарыса.

Ер адам жымиып:

- Сен, Кедейлік, кетіп бара жатқанда, яғни артыңнан қарағанда сондай сұлу әрі тартымды көрінесің. Ал, сен, Байлық, керісінше жүзіңмен бері қарап, адамға қарай жүргенде сұлулана түсесің, – деген екен.

• Ер азамат байлық пен кедейліктің сұрақтарына жауап беруге неліктен қиналды?

• Байлық пен кедейлік неге таласты деп ойлайсың?

• Байлық пен кедейліктің сұрағына сен қалай жауап берер едің?

• Сен бай болсаң не істер едің?

• Сен кедей болсаң не істер едің?

• Саған байлық, кедейлік, білім үшеуі кездессе қайсысын таңдар едің? Неге және сол жолға қалай жетер едің?

• Сіздер осы әңгімеден қандай ой түйдіңіздер?

3.Шығармашылық жұмыс, топтық жұмыс.

Тапсырма.

«Мақал – мәтелдердегі көп нүктенің орнына тиісті сөздерді қойып, мақал – мәтелдерді жалғастырып айтыңдар» деген тапсырма беріледі.

Оқу білім...,

Білім өмір....

Оқу .... құдық қазғандай.

Білімдіге дүние ....

Оқымасаң ... жоқ.

Білекті ... жығар,

Білімді ... жығар.

Керекті сөздер: бұлағы, бірді, инемен, шырағы, жарық, мыңды, білім.

4.Топпен ән айту.

«Өміріңе немқұрайлы қарама»

5.Үй тапсырмасы.

Дәптердегі 3 – сабақ, 19 – бет оқу.

6.Соңғы тыныштық сәтi. (Тыныштық... бар жерде, тыныштық... бүкiл әлемде)

• Енді көзімізді жұмып осы сабақта айтылған ойлар мен істерді ой елегінен өткізіп көрейікші.

- Барлық айтылған жақсы ойларды жүрегіміздің түкпіріне апарып орналастырайық.

- Енді көздеріңді аша ғойыңдар. Сабақ аяқталды. Бүгінгі күндерің қуаныш әкелсін!