Сабақтың мақсаты: оқушыларға сүйіспеншілік құндылығын, мейірімділіктің мәнін үйрету арқылы ұғындыру.

Міндеттері:

• Оқушыларға аяушылық сезімнің мейірімділік екенін түсіндіру.

• Оқушылардың кешірімді болу қасиетін дамыту;

• Оқушыларды шыншылдыққа тәрбиелеу.

Ресурстар: (құралдар, мәліметтер)

Сабақ барысы:

1. Ұйымдастыру кезеңі.

Оқушылардың құрал‑жабдықтарын түгендеу. 5 «Т» ұстанымын еске түсіру.

• Тәртіп

• Талап

• Тыныштық

• Тазалық

• Татулық

Тыныштық сәті: «Нұрға бөлену»

Ыңғайланып отырыңыздар, денелеріңізді түзу ұстаңыздар. Аяқ- қолыңызды айқастырмаңыз, қолыңызды тізеге немесе үстелге қоюға болады. Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады.Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын таза, әсем гүл сіздің әр ойыңызды, әр сезіміңізді, эмоцияңызды тілек қалауыңызды шайып, жүрегіңіздің қауызын ашты.

Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Ой мен осы нұрды қолдарыңызға түсіріңіз. Сіздің қолдарыңыз нұрға бөленіп, сәуле шашуда. Қолымыз тек жақсы, тек ізгі істерді істейді және баршаға көмектеседі. Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады.Олар нұр мен махаббат құралына айналды.

Одан әрі нұр сіздің аузыңызға,тіліңізге тарады.Тіліңіз тек шындықты және жақсы, ізгі сөздер ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көзімізге де жетті. Көзіміз тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ой келеді.

Нұр бірте-бірте қарқынды және шұғылана бастайды, сіздің денеңізден шығып, жан - жағыңызға сәуле шашады. Осы нұрды туысқандарыңызға, мұғалімдеріңізге, достарыңызға, таныстарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз. Олардың да жүрегі нұрға толсын.

Осы нұр бүкіл әлемге: барлық адамдарға, жан-жануарларға, өсімдіктерге, тірі жанға таралсын... Ғаламның барлық түкпір- түкпіріне нұр бағыттаңыз. Ойша айтыңыз: «Мен нұрлымын...Нұр меніңі шімде...Мен Нұрмын»

Осындай Нұр,Махаббат және Тыныштық күйінде отыра тұрыңыз...

Енді осы Нұрды жүрегіңізге орналастырыңыз. Нұрға толы бүкіл әлем сіздің жүрегіңізде. Оны осындай әсем қалыпта сақтаңыз.

Жаймен көзіңізді ашуға болады.

2. Үй тапсырмасын тексеру:

“Сары тауық пен балапандары”

• Сары тауық өз балапандарын қандай жақсы қасиеттерге баулыды?

• Сары тауық өз аналық мейірімін қалай көрсете білді?

• Балапандардың іс-әрекетінен қандай жанашырлықты байқадың?

• Ал,сендер мейірімділік танытқан кезде қандай сезімге бөлендіңдер?

Сабақ барысын талқылау:

3. Дәйек сөз.

«Мейірімділікті анадан үйрен»

Халық даналығы

• Неге мейірімділікті анадан үйрен дейді?

• Ананың өмірдегі орны қандай?

• Мейірімді болу маңызды ма?

4. Әңгімелеу (сұхбат).

Мұғалім сыйы «Сүйіспеншілік» әңгімесі.

Мұғалім әңгімені баяндап болған соң, «Қалпақ» ойынын ойнатады. Қалпақ киген бала тәрбиешінің сұрақтарына жауап береді.

Базарға барайын деп сыртқа шыққан жас келіншек есіктің артында отырған үш қарияны көріп, тұрыңқырап қалды да, бар ниетімен үйіне шақырды. Сонда қарияның біреуі:

• Біз шақырған жерге үшеуміз бірге бармаймыз, - дейді.

• Оң жақтағы досым – Байлық, сол жақтағым болса – Сәттілік. Менің атым – Сүйіспеншілік.

Өзін, жолдастарын таныстырғаннан кейін Сүйіспеншілік әйелге былай деп талап қояды:

• Қазір үйіңізге барып, жолдасыңызбен ақылдасыңыз. Үшеуміздің біреуімізді ғана шақыруға құқыларың бар. Қайсымыз баратынымызды өздеріңіз айтыңыздар, - деді.

Келіншек Сүйіспеншіліктің талабын күйеуіне айтқанда, қатты қуанған ол:

«Қандай жақсы, қандай жақсы», - деп қайталай береді. «Кімді шақыту еркін өзімізге берді емес пе? Біз байлықты шақырайық, үйіміз бірден молшылыққа кенелсін». Күйеуінің шешіміне көңілі толмаған әйел: «сәттілікті шақырғанға қалай қарайсың?» - деді. Екеуі ортақтасып, мынадай шешімге келді. Негізінде ең асыл Сүйіспеншілік қой деймін. Ол бар жерде біз бақытты боламыз.

Есікті ашқан келіншек үш ақсақалға «Қайсыңыз Сүйіспеншіліксіз? Төрлетіңіз. Сізді шақыруды ұйғардық», - деді. Сүйіспеншілік орнынан тұрды да, үйге беттеді. Жолдастары да орындарынан тұрып, оның артынан үйге қарай жүрді. Аң-таң болған келіншек Байлық пен Сәттілікке:

• Тек біреуіміз ғана бара аламыз деп айтып едіңіздер, - деді. Қариялар:

• Егер тек қана Байлықты немесе Сәттілікті шақырсаңыз, басқа екеуміз далада отырар едік. Бірақ сіз сүйіспеншілікті шақырдыңыздар. Сол үшін екеуміз де баруымыз керек. «Өйткені Сүйіспеншіліктің жүрген жерінде біз Байлық пен Сәттілік қашан да біргеміз» деді.

• Әңгімеден не ұқтың?

• Отбасының таңдауымен келісесің бе? Неге?

• Сүйіспеншілік шуағына бөлену дегенді қалай түсінесіңдер?

• Отбасы мүшелері қарияның басқа біреуін таңдаса не болады деп ойлайсыңдар?

5. Шығармашылық жұмыс, топтық жұмыс.

І‑тап: Балалармен жеке жұмыстар жүргізу. Анаға арнап өлең шығару.

Анам менің ардақты,

Мінезі де салмақты.

Мейірім тұнған жүрегі

Ақыл айтып жүреді.

Әлпештеген баласын

Орны бөлек анасың

Жыр арнадым жүректен

Жалғыз өзің ғанасың.

Әлдилеген анашым

Еміреніп баласын

Түнде бесік таяндың,

Тәтті ұйқыңнан ояндың.

ІІ‑тап: «Мейірімділік» кестесін толтырады.

ІІІ-тап: «Менің анам» өз анасының жақсы қасиеттерін жазу.

6. Топпен ән айту

«Бала тілегі» әні

Сөзі: С.Молдасанұлы

Әні: Ф.Лұқпанова

Бал-балалық, балдырған шақ сан арман,

Барлық бала армандауға жаралған.

Кел, достарым, әндетіңдер, билеңдер,

Гүлденсін деп атамекен, қара орман.

Болашақтың иесіміз бәріміз,

Туған жердің түрлендірер нәріміз.

Алтын бесік – ұлан-байтақ елімде,

Жарқын болсын шырқап айтар әніміз.

Қалықтаған көгершіні көгінде,

Мұңаймасын ешбір бала елімде.

Ата берген батаменен көркейсін,

Ұлы Отаным, тілегім сол, менің де.

7. Үй тапсырмасы.

1. Оқулықтағы 95 беттегі «Жиренше шешен мен Қарашаш сұлу» мәтінін оқып келу.

8. Соңғы тыныштық сәті

- Ал енді балалар, бір минут тыныштықта бүгінгі сабақта үйренген жақсы қасиеттерді еске түсіріп, жүректеріңе түйіп алыңдар.