Ашық тәрбие сағаты "Тәуелсіздік - елімнің ерлік жолы" 5-11 сыныптар

Тақырыбы: Тәуелсіздік – елімнің ерлік жолы

Мақсаты: оқушыларға еліміздің өткені мен болашағы, даму тарихы туралы мағлұмат бере отырып келешекке сеніммен қарауға, елжандылыққа, ұлтын сүюге, қастерлеуге үйрету. Оқушылардың Отанына, өз халқына деген сүйіспеншілігін күшейту.

Көрнекілігі: слайдтар, бейнефильмдер

Әдісі: сұхбат

Түрі: сұрақ-жауап

Барысы:

І. КІРІСПЕ

ІІ. Слайд

ІІІ. «Желтоқсан ызғары» бейнефильм

ІҮ. Сұрақ-жауап

Ү. Қорытынды.

КҮЙ: «Жұмыр қылыш» орындайтын саз мектебінің түлегі Сауытжан Кәмила

І. КІРІСПЕ

Құрметті қонақтар, ұстаздар, оқушылар! Еліміз тәуелсіздік алып, нарықты заман орнады. Тәуелсіз еліміздің жастары үшін заман талабына сай өнерлі де білімді болып өсу талабы туды. Тәуелсіз еліміз болашаққа айқын бағдар түзеп, өркениетті елдер қатарына аяқ басты. Аспанымыз ашық, еліміз аман болса, бұл мақсатқа да толық жетерміз. Сәби күлкісі мен ана мейірімінің сәні ешқашан бұзылмасын. Тәуелсіздік күні құтты болсын!

Тәуелсіздік – ата-бабам аңсаған,

Жете алмай құрбан болды қанша адам.

Махамбеттер, кешегі өткен Қайраттар,

Әр кезеңде сен деп ерлік жасаған.

Туған елінің азаттығы мен тәуелсіздігі жолында қазақ жастары көтерілген 1986 жылы желтоқсан оқиғасы кезінде қаншама жастар қайсарлық көрсетті. Сол жалынды жастардың ішінде өзінің елі, жері, тәуелсіздік үшін үлесін қосқан жерлесіміз Мұқанов Жайнат Түсіпжанұлы бүгін біздің ортамызда. Бүгінгі кешімізге қош келдіңіз, аға!

СЛАЙД (Мұқанов Жайнат Түсіпжанұлы жайлы слайд көрсетіледі.)

ІІІ. «Желтоқсан желі» бейнефильм

Осы желтоқсан оқиғасында ерлік көрсетіп қаза тапқан желтоқсан құрбандарын 1 минут үнсіздікпен еске алсақ.

ІҮ. Сұрақ-жауап

1. Оқуға өз қалауыңызбен бардыңыз ба?

2. Қандай мамандықты қаладыңыз?

3. Желтоқсан оқиғасы басталғанда сіз нешінші курста оқыдыңыз?

4. Неше жаста едіңіз?

5. Митингіні алдын ала жоспарлап дайындадыңыздар ма, әлде аяқ астынан шықтыңыз ба?

6. Сондағы митингіге шыққандағы мақсаттарыңыз не?

7. Сол оқиғада сіздерді рухтандырып бастап шыққан кім еді?

Келесі бейнефильмге назар аударайық.

«Желтоқсан шері» бейнефильмін тамашалау

Сұрақ-жауап:

1. Осы жерде сіз митингі өтіп жатқанын қалай білдіңіз?

2. Қандай ұранмен шықтыңыз?

3. Осы оқиғадан кейін көптеген аға-әпкелеріміз қуғынға ұшырады. Сіз қалай қашып құтылдыңыз? Кімдер көмектесті?

Бүгінгі кездесуге түйткіл болған, өзіндік бір үлкен үлесін қосқан сіздің жан жолдасыңыз Құмар аға келіп отыр. Ендеше, сізге бір сұрақ:

• Жайнат ағаның досы, жан жолдасы, құрдасы ретінде бір ауыз айтып өтсеңіз.

Жайнат аға, актерлік мамандықты бітірдіңіз. Болашақ ұрпақтарға арнап өзініңіздің шеберлігіңізді көрсетсеңіз. (породия бола ма, ән айтасыз ба, өзіңіз білесіз)

Бүгінде біз тәуелсіздікке аға-апаларымыздың арқасында қол жеткізіп, еліміздің ұлан-байтақ жері, бейбіт сүйгіш халқы бүкіл әлемге танымал болып отыр. Еліміздің егемендік алуы, халқымыздың тарихына жаңа дәуірдің бетін ашты, бүкіл қоғамдық өмірімізге жаңа леп, серпін ала келді. Тәуелсіздігіміздің ең басты жетістігі – еркіндік. Тәуелсіздіктің жалынды жас бүлдіршіндеріміздің тәуелсіздікке деген жыр шумақтарын қабыл алыңыздар.

Мектеп оқушыларының орындауындағы мәнерлеп оқуы

(Дарина, Руслан, Нұртілек)

Ағай, еліміздің болашағы алдыңызда отырған өсіп келе жатқан жас ұрпаққа айтар тілегіңіз болса...

Бейнефильм: «Тәуелсіздік күні»

Сіздердің құрметтеріңізге 7 – сынып білім алушысы Төлеу Әлібектің орындауында «Алға, Қазақстан!» әні. Қабыл алыңыздар!