«Ұлттық тәрбие – құндылықтың бастауы»

Мақсаты: Ғаламдану процесінде ұлттық құндылықтарды сақтау, салт-дәстүрлерді меңгерту.

Қатысушылар:

• Жүргізушілер: 2 адам

• Оқушылар: Салт-дәстүр көріністеріне қатысушылар

• Қонақтар: Ардагерлер, ұстаздар, ата-аналар, көрермендер

Кіріспе бөлім

(Сахнаға екі жүргізуші шығады. Қазақтың күмбірлеген күйі ойнап тұрады.Ұлттық киім киген жүргізушілер жайлап сөз бастайды.)

1-жүргізуші:

– Уа, көкірегі ояу, санасы сергек ағайын!

– Уа, ата дәстүрін ардақтайтын, ана тілін аялайтын ұлағатты ұрпақ!

– Ұлт болып ұйысқан жұртым!

– Бүгінгі кеш біз үшін, сіз үшін, ертеңгі ұрпақ үшін қасиетті кеш!

2-жүргізуші:Қазақ тарихын хатпен емес, жүрекпен жазған халық! Қазақ дәстүрін тасқа қашап емес, санасына сақтап сіңірген дана халық!Ал дәстүр, бұл біздің кеудемізде соққан жүрегіміз, ұлт ретінде жүріп өткен жолымыз, ғасырлардан қалған аманатымыз! Дәстүрін жоғалтқан халық , тамыры кесілген бәйтерек секілді. Қанша уақыт тіршілік еткенімен, ол бәрібір бір күні құлайды…Біз құламас үшін, біз жоғалмас үшін ата-бабамыздан қалған асыл мұраны ардақтап, бойымызға сіңіру – парыз!

1-жүргізуші:Бүгінгі кеш , сол парыздың өтеуі! Бүгін біз ұлттық салт-дәстүрлерімізді жаңғыртамыз, айтамыз, көрсетеміз, бірге сезінеміз! Онда, қадірменді қауым, ұлттық құндылықтарымыздың баға жетпес інжу-маржандарын тамашалауға шақырамыз!

Негізгі бөлім

1. Көрісу дәстүрі (Көрініс)

2-жүргізуші: Көрісу бұл жай ғана қол алысып, бетінен сүю емес. Бұл, бауырмалдықтың белгісі! Көрісу бұл алыстағы ағайынның сағынышын басатын, ата мен баланы, ана мен қызды қайта қауыштыратын дәстүр! Көрісу тек Наурызда емес, өмірдің әр күнінде жасалуы тиіс жүрек пен жүректі жалғайтын амандасу!

(Сахнада үлкендерге жастар келіп, қол алысып, көрісіп, амандық сұрасады.)

2. Ұлттық ойындар (Көрініс)

1-жүргізуші: “Жігітке жеті өнер де аз” деген сөз бар. Қазақ баласы шапса тұлпардай, асса сұңқардай, күші арыстандай болған. Ұлттық ойындар біз үшін тек ермек емес, бұл біздің тегіміздің тектілігі! “Көкпар – жүректілердің, теңге ілу – ептілердің, аударыспақ – білектілердің, алтыбақан – көңілділердің ойыны!”

(Сахнада асық ату, арқан тарту, теңге ілу ойындары көрсетіледі.)

3. Бата беру дәстүрі

2-жүргізуші: Бата бұл тек тілек емес. Бата – бұл болашаққа жазылған хат! Қазақ халқы батаны жайдан-жай бермеген. Әр сөзінің астарында ұрпағына деген үміт, тілеулестік, аманат жатыр!

(Құрметті ақсақал ортаға шығып, көрерменге бата береді.)

4. Ырымдар мен тыйымдар (Көрініс)

1-жүргізуші:

Қазақтың әрбір ісінде, әрбір сөзінде мағына бар.“Босағаңды керме, бақ кетеді, табалдырықты баспа, құт кетеді, үлкеннің жолын кеспе, әдеп кетеді” деген сөздер бекер айтылмаған. Бұның бәрі қазақтың көрегендігінің белгісі!

(Оқушылар қазақтың ырымдарына байланысты көріністер көрсетеді.)

5. Айтыс – сөз барымтасы

2-жүргізуші:

Айтыс – ақиқаттың айнасы, сөздің сұңқары, ойдың тұңғиығы! Айтыс – халқымыздың ешқашан өлмейтін, жоғалмайтын, заманға сай түрленетін рухани мұрасы!

1-жүргізуші:

Олай болса, сахна төрінде – жыр додасы! Сөздің найзағайы шарпыссын, шабытымыз шалқысын!

(Айтыскерлер ортаға шығып, ұлттық құндылықтар туралы айтысады.)

6. Киіз басу дәстүрі (Көрініс)

2-жүргізуші: Киіз – көшпенді қазақтың ғажайып өнері. Киіздің әр талында ананың алақанының табы, бабаның аманаты жатыр!

(Көріністе киіз басу көрсетіледі.)

7. Шаш өру дәстүрі (Көрініс)

1-жүргізуші: “Қыздың көркі – шолпысы, шашының әр өрімінде ұрпақтың болашағы бар” дейді қазақ. Қазақ қызы, ибалылықтың символы, ұзын өрілген шаш оның сұлулығының белгісі.

(Қыздар сахнада шаш өру дәстүрін көрсетеді.)

8. Би және ән орындау

2-жүргізуші: «Ән – жүректің үні, би – өмірдің тынысы!»

(Ұлттық би орындалады. Содан кейін дәстүрлі ән шырқалады.қатысушылардың есімдерін жазу)

Қорытынды бөлім

1-жүргізуші: Дәстүр – бұл біздің рухымыздың биіктігі!

2-жүргізуші: Дәстүр – бұл ұлттың мәңгілігінің кепілі!

1-жүргізуші: Біз өткенді бүгінге жалғадық. Бүгіннен болашаққа жол салдық.

2-жүргізуші:Ұлт бар жерде – дәстүр бар! Дәстүр бар жерде – қазақ бар!

1-жүргізуші: Осымен бүгінгі рухани кешіміз аяқталды. Көңіл бөліп, бірге болғандарыңызға рақмет!

Сөз сөйлеу

(Күй ойнап, барлық қатысушылар финалдық көрініс үшін сахнаға шығады.)