Астана.Қосшы қаласының

№ 2 жалпы білім

беретін мектебі

Рахметова Света Шуптибаевна

«Ата сөзі-алтын сөз»

Қазақ халқы ертеден-ақ сөзге ерекше мән берген, сөз арқылы тәрбиелеген, бағыт берген. Әсіресе, үлкендердің, ата-бабаларымыздың айтқан ақыл-кеңесі — ұрпақ тәрбиесінің темірқазығы. «Ата сөзі — алтын сөз» деген мақал осының дәлелі. Бұл — тек сөз емес, өмірлік ұстаным, өнеге, рухани мұра.Ата сөзі дегеніміз — тек көненің сөзі емес, ол — ғасырлар сүзгісінен өткен тәжірибе, көрген-білгеннің қорытындысы, ақылдың тұнығы. Ата-бабаларымыз өз өмірінен түйгенін қысқа да нұсқа, мағыналы түрде жеткізген. Осындай сөздер ұрпаққа жол көрсетіп, адасудан сақтап отырған.

Аталы сөздің баталы болатыны — оның артында жақсылыққа бастайтын тілек, ақ бата, адал ниет тұрады. Бата – тек қуанышта айтылатын емес, сонымен қатар, жас ұрпақты жақсылыққа, адалдыққа, еңбекқорлыққа, кішіпейілділікке баулитын тәрбиелік құралАта сөзі — тек отбасы шеңберінде ғана емес, ел басқаруда, дау-шарды шешуде де басты рөл атқарған. Би-шешендердің, жыраулардың өнегелі сөздері әлі күнге дейін ел есінде. Мысалы, Төле би, Қазыбек би, Әйтеке бидің әділ шешімдері мен ақылға толы сөздері бүгінде де өзекті.

Қазіргі таңда атаның баталы,өнегелі сөзі — тәрбиенің ең маңызды құралы. Әке мен ананың, ата мен әженің әрбір сөзі — баланың санасына сіңіп, оның болашағына әсер етеді. Сондықтан әр ата-ана өз сөзін саралап, өнегелі болуға тырысуы керек.

«Ата сөзі — алтын сөз» деген мақал — халқымыздың рухани байлығының айғағы. Ол – тек ауызекі мұра емес, өмірлік бағдар, ұрпаққа үлгі боларлық құндылық. Бүгінгі ұрпақ осы сөздің қадірін түсініп, оны сақтау мен жалғастыруға жауапты. Ата сөзі — ұлттың жадын, тәрбиесін, парасатын сақтайтын киелі мұра.