Авторлық ертегі: «Мөлдір бұлақтың реніші»

Авторы: Муратбекова Ақбаршын Еркенқызы

Лауазымы: Тәрбиеші

Ертегі:

Ерте заманда, биік таулардың етегінде, айналасы жасыл желекке оранған кіп-кішкентай Мөлдір бұлақ болыпты. Оның суы сондай таза, тіпті түбіндегі түрлі-түсті тастары күн сәулесіне шағылысып, жарқырап жататын. Орман аңдары мен құстары күн сайын осы бұлаққа келіп, шөлдерін басатын. Бұлақ бәріне қуана-қуана суын беріп: «Ішіңіздер, шөліңізді қандырыңыз!», - деп сылдырлай ән салатын.

Бірде орманға бір топ саяхатшы келеді. Олар бұлақтың жанына келіп тынығып, тамақтанады. Бірақ кетерлерінде өздерімен бірге әкелген пакеттерін, бос бөтелкелерін және тамақ қалдықтарын бұлақтың жағасына тастап кетеді. Тіпті, кейбір қоқыстар бұлақтың дәл ортасына түседі.

Көп ұзамай бұлақтың мөлдір суы лайлана бастады. Түбіндегі әдемі тастар көрінбей қалды. Бұлақ бұрынғыдай сылдырлап ән салмайтын болды, ол мұңайып, жай ғана сыңсып ағатын. Бір күні су ішуге келген Қоян бұлақтың түріне қарап шошып кетті: — Ой, Мөлдір бұлақ, саған не болған? Суың неге лай, жағаң неге қоқыс? - деп сұрайды. Бұлақ мұңайып: — Адамдар маған ұқыпсыз қарады. Енді менің суымды ішуге болмайды, мен ауырып тұрмын, - деп жауап береді.

Қоян бірден орман достарын шақырады. Аю келіп ауыр бөтелкелерді жинады, Түлкі мен Қасқыр пакеттерді терді, ал Тиын мен Торғай ұсақ қоқыстарды тазалады. Олар бұлақтың жағасын тап-таза етіп жинап шықты.

Сол кезде көктен жауған жаңбыр бұлақтың арнасын қайта толтырып, оны лайдан шайып жіберді. Бұлақ қайтадан мөлдір күйіне енді. Ол достарына алғыс айтып, қайтадан көңілді ән сала бастады.

Осыдан кейін орман аңдары бұлақтың басына: «Табиғатты аяла, суды ластама!» деген белгі қойыпты. Содан бері бұл бұлақ орманның ең таза, ең көрікті жеріне айналыпты.

Ертегінің сұрақтары:

1. Ертегінің басында бұлақ қандай еді?

2. Бұлақтың суы неліктен лайланып, мұңайды?

3. Аңдар бұлаққа қалай көмектесті?

4. Бұл ертегі бізді неге үйретеді?

Әдістемелік ұсыныс: Бұл ертегіні 4-6 жас аралығындағы балаларға арналған «Табиғат – біздің үйіміз» атты ашық сабақтарда қолдану ұсынылады. Ертегіні оқып болған соң, балалармен «Таза бұлақ» атты сурет салу немесе мүсіндеу жұмыстарын жүргізуге болады.