Балаға мейірімі өзгеше отбасы

Балаға мейірімі өзгеше отбасы

Ата-анамен жұмыс -сынып жетекші жұмыстарының ішіндегі ең өзекті мәселе. Тәрбие жұмысы ішінде осы жұмыс бүгінгі күнде жандандыруды талап етеді. Көп ата-ана жұмыс бабымен жүріп бала тәрбиесі жөнінде мектеппен байланыс жасауды назардан тыс қалдырып жатады.

Мен өз сыныбымдағы бір оқушының отбасы, оның ата-анасы жайында сөз қозғамақпын. Өйткені көпке үлгі болатын отбасы деп осы отбасыны айта аламын.

Мейірім , шапағат туралы сөз қозғағанда менің көз алдыма осы отбасы келеді. Бала мейірім, шапағатты әуелі отбасыдағы ата-анадан көреді. Сондықтан бала тәрбиеcінде отбасының алатын орны үлкен.Балаға ең жақын , ең қымбат адам оның ата-анасы, өзінің ең жақын адамдарынан мейірім көрмеген бала кімнен мейірім күтеді, ал өскенде ол бала кімге мейірім көрсетеді? Сондықтан ата-ана балаға бар махаббатын төккені абзал.

Балаға нағыз мейіріммен қарайтын ата-ана - Ардақ пен Нұрайым. Ардақ пен Нұрайым алғашқы кезде жұмыссыз болатын. Бірі көлік жүргізіп, бірі базарда сатушы боп жұмысын бастаған олар жұмыспен қоса бала тәрбиесін де назардан тыс қалдырмады. Моншақтай 5 қызы, 1 ұлы бар олар балаларының қамы үшін еңбектенуден жалықпайды. Таңертең ерте тұрып, кеш жатады. Бар тапқанын балаларымның несібесі деп қанағат тұтады. Сондай тіршілік күйбеңімен жүрген олар, қазір жеке кәсіпкер. Қаланың ірі сауда орталығында өздері жеке кәсіппен айналысады. Ардақ пен Нұрайымның балаларына берген тәрбиесіне жора-жолдастары , көршілері сүйсіне , тамсана қарайды әрі дән риза. Өйткені бұл отбасыда ұрыс-керіс,дау-жанжал мүлде болмайды. Бір-біріне дауыс көтермей, бір жас үлкен болса да балалары бірін әпке деп, ағасын аға деп сыйластықпен қарайды.Бұл тәрбиенің бастауы Нұрайымның бойында жатыр. Сөйлеген сөзінде де үнемі жақсы сөзді, жақсы арман-мақсаттарын, ізгі ниет-тілектерін жақсы лебізбен өріп отырады. Тек өз отбасында ғана емес, жұмыс барысында да , туған-туыс ортасында да өзгеге қатты сөйлемейтін , жүзінен нұры төгіліп тұратын Нұрайымның бойынан қазақтың дана аналарының қасиетін байқаймын.

Ерлі-зайыпты Ардақ пен Нұрайымның арасындағы сыйластық та өзгеше. Өз жарына , қыздары мен ұлына ерекше мейірім көрсететін Ардақ – қамқор әке.

Бала бойына ата-анасы жас күнінде мейірім ексе, үлкейгенде оның жемісін көретінін осы отбасыдағы тәрбие дәлелдейтін сияқты . Әкешім мен анашым деп ата-анасының құрметін жайына қойып, мейірімге мейіріммен жауап беретін перзенттері ата-анасының мақтанышы боларына сенемін.

Түркістан облысы

Ордабасы ауданы

Шұбарсу ауылы

Б.Нұрлыбеков жалпы орта мектебі

Қазақ тілі мен әдебиеті пәні мұғалімі Назым Аралбаева